অৰুণাচলৰ প্ৰদেশৰ ৫০ কিলোমিটাৰতকৈও অধিক ভূমি চীনে আগ্ৰাসন কৰা বুলি মঙলবাৰে সদনৰ মজিয়াত মন্তব্য কৰিছে ৰাজ্যখনৰ বিজেপি সাংসদ টাপিৰ গাৱে।
লোকসভাৰ শূন্যকালীন ঘণ্টাত এই গুৰুত্বপূৰ্ণ বিষয়টো উত্থাপন কৰি সাংসদগৰাকীয়ে অৰুণাচলক দ্বিতীয় দোকলামত পৰিণত নকৰিবলৈ চৰকাৰক অনুৰোধ জনায়।
গাৱে লগতে কয় যে যেতিয়াই ৰাষ্ট্ৰপতি, প্ৰধান মন্ত্ৰী, প্ৰতিৰক্ষা মন্ত্ৰী নাইবা গৃহ মন্ত্ৰী অৰুণাচল ভ্ৰমণলৈ যায় তেতিয়াই চীনে বিভিন্ন আপত্তিজনক মন্তব্য কৰা পৰিলক্ষিত হয়।
অলপতে প্ৰতিৰক্ষা মন্ত্ৰী ৰাজনাথ সিঙে টাৱাং ভ্ৰমণলৈ যোৱাৰ সময়ত চীনে সংবাদমেলৰ জৰিয়তে বিভিন্ন প্ৰশ্ন উত্থাপন কৰা বুলিও গাৱে সদনত সদৰী কৰে।
সাংসদগৰাকীয়ে লগতে কয় যে চীনে বাৰম্বাৰ এইদৰে আপত্তি দৰ্শোৱাৰ পিছতো আমাৰ চৰকাৰ, দল-সংগঠন তথা সংবাদ মাধ্যমে চীনৰ আগ্ৰাসনৰ বিষয়ে মাত নামাতে।
ইয়াৰ উপৰি চলিত বছৰৰ চেপ্তেম্বৰ মাহতো সাংসদগৰাকীয়ে চীনা সৈন্যই ভাৰতৰ ভূখণ্ডত প্ৰৱেশ কৰি অৰুণাচলৰ অঞ্জাও জিলাৰ সীমান্ত অঞ্চলত দলং নিৰ্মাণ কৰি থকাৰ অভিযোগ উত্থাপন কৰিছিল।
কিন্তু ইয়াৰ প্ৰত্যুত্তৰত কেন্দ্ৰীয় ক্ৰীড়া আৰু যুৱ কল্যাণ মন্ত্ৰী কিৰেণ ৰিজিজুৱে অৰুণাচল প্ৰদেশত ভাৰত-চীন সীমান্তত কোনোধৰণৰ সমস্যা নাই বুলি মন্তব্য আগবঢ়াইছিল।
উল্লেখ্য যে ১৯৬১ চনৰ পৰা ভুটানৰ মানচিত্ৰত অন্তৰ্ভুক্ত ছিকিমৰ সীমান্তৱৰ্তী অঞ্চল দোকলামত ২০১৭ চনত চীনা সৈন্যই পথ নিৰ্মাণ কাৰ্য আৰম্ভ কৰিছিল। পিছত এই কাৰ্যক বাধা দিবলৈ অঞ্চলটোত ভাৰতীয় সেনাৰ প্ৰৱেশ ঘটাত এক অচলাৱস্থাৰ সৃষ্টি হয়।
চীনে নিজৰ বুলি দাবী কৰা অহা দোকলামত ৭৩ দিনলৈ অব্যাহত থকা অচলাৱস্থাৰ অন্ত পৰে ২০১৭ চনৰ ২৮ আগষ্টত। ভাৰতীয় সেনা আৰু চীনা সৈন্যৰ মাজত হোৱা এক চুক্তি মৰ্মে চীনে নিৰ্মাণ কাৰ্য বন্ধ ৰাখিবলৈ মান্তি হয় আৰু ভাৰতে দোকলামৰ পৰা নিজৰ সৈন্য বাহিনী প্ৰত্যাহাৰ কৰে।
উল্লেখযোগ্য যে, ভাৰত আৰু চীনৰ মাজত প্ৰায় ৪০০০ কিলোমিটাৰ দৈৰ্ঘ্যৰ আন্তঃৰাষ্ট্ৰীয় সীমা আছে যাক বৰ্তমানো নিৰ্দিষ্টভাৱে সীমাংকন কৰা হোৱা নায়।
