কেন্দ্ৰীয় চৰকাৰে গৃহীত কৰা তিনিখন নতুন কৃষি আইন বাতিলৰ দাবীত দিল্লী সিঙ্ঘু সীমান্তত বিক্ষোভ প্ৰদৰ্শন কৰি থকা কৃষকসকলৰ সমৰ্থনত পুনৰ এবাৰ মাত মাতিছে সমাজকৰ্মী আন্না হাজৰেই।
৮৩ বছৰীয়া আন্না হাজাৰেই কৃষক আন্দোলনক কেন্দ্ৰ কৰি কেন্দ্ৰীয় চৰকাৰলৈ আৰু এখন পত্ৰ লিখিছে, য’ত তেওঁ কৈছে যে কৃষি মন্ত্ৰীয়ে লিখিত ৰূপত দিয়া প্ৰতিশ্ৰুতি পালন কৰা নাই সেয়ে মই জীৱনৰ অন্তিম অনশন কাৰ্যসূচী গ্ৰহণ কৰিম।
তেওঁ লগতে এই অনশন কাৰ্যসূচী দিল্লী নে মুম্বাই নে তেওঁ নিজৰ গাঁৱত গ্ৰহণ কৰিব সেই কথা পৰৱৰ্তীন সময়ত জনাব বুলিও উল্লেখ কৰে।
আন্না হাজাৰেৰ এই হুংকাৰৰ পিছতেই বিজেপিত হাহাকাৰ লাগে আৰু মঙলবাৰে দলৰ কেইজনমান নেতাই আন্নাক সাক্ষাৎ কৰাও দেখা যায়।
সংবাদ মাধ্যমৰ আগত আন্নাই কয় যে মোক সাক্ষাৎ কৰিবলৈ কেইজনমান লোক আহিছিল, তেওঁলোকে মোক কয় যে কিছু সময় দিয়ক অনশনৰ প্ৰয়োজন নপৰে, আপুনি এই আন্দোলনত চামিল নহ’ব।
উল্লেখ্য যে আন্না হাজাৰেক বুজাবলৈ বিজেপিৰ কেন্দ্ৰীয় নেতৃত্বই বিজেপিৰ ৰাজ্যসভাৰ সাংসদ ভাগৱত কৰাড় আৰু মহাৰাষ্ট্ৰ বিধানসভাৰ প্ৰাক্তন অধ্যক্ষ হৰীভাউ বাগড়েক পঠিয়াইছিল।
সমাজকৰ্মীজনে ইয়াৰ পূৰ্বে কৈছিল যে যদি অতি শীঘ্ৰে কৃষকৰ দাবী পূৰণ নহয় তেন্তে তেওঁ কেন্দ্ৰীয় চৰকাৰৰ বিৰুদ্ধে গণআন্দোলন গঢ়ি তুলিব।
তেওঁ লগতে কৈছিল যে লোকপাল আন্দোলনে যেনেদৰে কংগ্ৰেছ চৰকাৰক ওফৰাই পেলাইছিল, মই কৃষকৰ আন্দোলনো সেই দৃষ্টিভংগীৰে চাও।
আনহাতে সীমাত বহি প্ৰতিবাদ কৰি থকা কৃষকসকল দেশৰ নাগৰিক, পাকিস্তানী নহয় যে তেওঁলোকৰ কথা চৰকাৰে নুশুনিব বুলিও তীব্ৰ বাক্যবাণেৰে চৰকাৰক সমালোচনা কৰে আন্না হাজাৰেই।
