দেওবাৰে কামৰূপৰ ৰামপুৰৰ দৰাবিলৰ বাকৰিত ‘দৰাবিল গো-চৰণীয়া পথাৰ সুৰক্ষা সমিতি’ৰ উদ্যোগত এখনি বিশাল ৰাজহুৱা সভা অনুষ্ঠিত হৈ যায়। দৰাবিলৰ চৌপাশৰ ৰাইজকে ধৰি ডেৰ সহস্রাধিক লোকে এই সভাত অংশগ্ৰহণ কৰে আৰু গো-চৰণীয়া পথাৰ তথা দৰাবিল আৰ্দ্ৰভূমি অঞ্চল সুৰক্ষাৰ দাবীত ঐক্যবদ্ধ স্থিতি লয়।
অশ্বিনী মজুমদাৰ, অৱনী কুমাৰ দাস আৰু প্ৰবীণ গোস্বামীয়ে পৰিচালনা কৰা এই গুৰুত্বপূৰ্ণ সভাত স্থানীয় ৰাইজৰ উপৰিও বৰদুৱাৰ বাগান ভূমি পট্টন দাবী সমিতি, কুলশী নদীবান্ধ বিৰোধী মঞ্চ, দ্বীপৰ বিল সুৰক্ষা সমিতি, ভূমি অধিকাৰ যৌথ সংগ্ৰাম সমিতি, কৃষক মুক্তি সংগ্ৰাম সমিতি, সংগ্রামী কৃষক শ্রমিক সংঘ, দক্ষিণ কামৰূপ ছাত্র সন্থা, ৰামপুৰ আঞ্চলিক মহাবিদ্যালয় ছাত্র একতা সভা, ছয়গাঁও মহাবিদ্যালয় ছাত্র একতা সভা, বৃহত্তৰ বৰিহাট নাগৰিক মঞ্চ, সদিচ্ছা (মির্জা), কুকুৰমাৰা আঞ্চলিক ব্যবসায়ী সন্থা, বন্য বন্ধু (কামৰূপ) আদি সংগঠনৰ বহুকেইজন নেতৃবৃন্দ উপস্থিত থাকে। সকলোৱে দৰাবিল ৰক্ষাৰ ক্ষেত্ৰত সহমত পোষণ কৰে।
সভাৰ আৰম্ভণিতে অসমৰ জনপ্ৰিয় শিল্পী জুবিন গাৰ্গৰ প্ৰতিচ্ছবিত বন্তি প্ৰজ্বলন আৰু পুষ্পাঞ্জলি অৰ্পণ কৰি কাৰ্যসূচী আৰম্ভ হয়। শিল্পীগৰাকীৰ প্ৰকৃতি প্ৰেম আৰু মানৱ প্ৰেমক সুঁৱৰি তেখেতৰ জনপ্ৰিয় ‘মায়াবিনী’ শীৰ্ষক গীতটি সমস্বৰে পৰিৱেশন কৰা হয়।
ইয়াৰ পিছতে ৰাইজৰ সৰ্বসন্মতিক্ৰমে দৰাবিল ৰক্ষাৰ স্বাৰ্থত গো-চৰণীয়া পথাৰ সামৰি সমগ্ৰ বিল আৰু আৰ্দ্ৰভূমি অঞ্চল যিদৰে আছে অনন্তকাললৈ তেনেদৰে ৰখাৰ পোষকতা কৰি প্ৰস্তাৱ গ্ৰহণ কৰা হয়। সভাই প্ৰস্তাৱিত Logistic Park বাতিল কৰাৰ দাবী জনাই প্ৰস্তাৱ গ্ৰহণ কৰে।, দৰাবিল আৰ্দ্ৰভূমি আৰু সমগ্ৰ দক্ষিণ কামৰূপ অঞ্চলৰ ক্ষতি কৰিব পৰা কুলশী নদীৰ প্ৰস্তাৱিত নদীবান্ধ বাতিলৰ দাবী জনাইও প্ৰস্তাৱ গ্ৰহণ কৰা হয়।, চৰকাৰ-প্ৰশাসনে যদি ৰাইজৰ মতামকক অগ্ৰাহ্য কৰে, তেন্তে দৰাবিল আৰ্দ্ৰভূমি সংৰক্ষণৰ স্বাৰ্থত পৰিস্থিতি সাপেক্ষে যিকোনো ধৰণৰ কাৰ্যপন্থা গ্ৰহণ কৰিবলৈ ৰাইজে সাজু থকাৰ প্ৰস্তাৱ লোৱা হয়।
দৰাবিল-গো-চৰণীয়া পথাৰ সুৰক্ষাৰ স্বাৰ্থত সভাত উপস্থিত সকলো ৰাইজ আৰু সংগঠনে ঐক্যবদ্ধভাৱে কাম কৰি যোৱাৰ প্ৰস্তাৱ গ্ৰহণ কৰে। ৰাজহুৱা সভাখনত গ্ৰহণ কৰা এই প্ৰস্তাৱসমূহে দৰাবিল আৰ্দ্ৰভূমি সুৰক্ষাৰ ক্ষেত্ৰত এক শক্তিশালী জনমত প্ৰতিফলিত কৰিলে বুলি মত ব্যক্ত কৰে আয়োজক সমিতিয়ে।
