আমেৰিকা যুক্তৰাষ্ট্ৰৰ ৰাটগাৰ্চ বিশ্ববিদ্যালয়ে অহা ২৮ ছেপ্টেম্বৰত শ্ৰীমন্ত শংকৰদেৱ সম্পৰ্কে এক বক্তৃতা অনুষ্ঠানৰ আয়োজন কৰিছে ।
বিশ্ববিদ্যালয় খনৰ দক্ষিণ এছিয়া অধ্যয়ন পাঠ্যক্ৰমৰ অন্তৰ্গত এই অনুষ্ঠানটোত বক্তৃতা দিবলৈ আমন্ত্ৰিত হৈছে শ্ৰীমন্ত শংকৰদেৱ সম্পৰ্কে বিগত তিনি দশক ধৰি নিৰৱচ্ছিন্নভাৱে গৱেষণা কৰি থকা ড° সঞ্জীৱ কুমাৰ বৰকাকতি ।
আমেৰিকা যুক্তৰাষ্ট্ৰত থকা প্ৰৱাসী অসমীয়া সকলৰ অনুষ্ঠান ‘নামঘৰ এছ’ছিয়েশ্যন অব আমেৰিকাই অনুষ্ঠানটোত সহযোগিতা আগবঢ়াইছে ।
২৮ছেপ্টেম্বৰৰ সন্ধিয়া৯-৩০ বজাৰ পৰা ১০-৩০ বজালৈ বক্তৃতাটো অনুস্থিত হব ।
ৰাটগাৰ্চ বিশ্ববিদ্যালয়ৰ তৰফৰ পৰা জুলিয়া ষ্টিফেনচে আদৰণি ভাষণ দিব ।
বিশ্ববিদ্যালয় খনত গৱেষণাৰত ছাত্ৰ -ছাত্ৰী সকলৰ উপৰিও অধ্যাপক অধ্যাপিকাসকলেও ইয়াত অংশগ্ৰহণ কৰিব ।
ড° বৰকাকতিয়ে বক্তৃতাৰ অন্তত তেওঁলোকৰ প্ৰশ্নৰ উত্তৰ দিব । জানিব পৰা মতে ড° বৰকাকতিয়ে মহাপুৰুষ শ্ৰীমন্ত শংকৰদেৱৰ বহুমুখী প্ৰতিভা সম্পৰ্কে এটি আভাস তেওঁৰ বক্তৃতাত দিব । সেইবাবে বক্তৃতাটোৰ নাম ‘শ্ৰীমন্ত শংকৰদেৱ-দ্য পলিমেথ ফ্ৰম ইণ্ডিয়া ‘ৰখা হৈছে ।
ইতিমধ্যে শ্ৰোতা দৰ্শকক পঞ্জীয়ন কৰিবলৈ বিশ্ববিদ্যালয়ৰ তৰফৰ পৰা তেওঁলোকৰ ৱেবচাইটত লিংক দিয়া হৈছে । ইয়াৰ পূৰ্বতে ড° বৰকাকতিয়ে ২০১৯ চনত কলম্বোত কেলানিয়া বিশ্ববিদ্যালয়ত অসমৰ সত্ৰ সমূহৰ বিষয়ে এক বক্তৃতা দিছিল ।
২০২০ চনত তেওঁ ‘নামঘৰ এছ’ছিয়েশ্যন অব আমেৰিকাৰ’ সৌজন্যত শ্ৰীমন্ত শংকৰদেৱ সম্পৰ্কে এটি অনলাইন বক্তৃতা দিছিল ।
প্ৰায় তিনিকুৰি গ্ৰন্থৰ প্ৰণেতা ড° বৰকাকতিয়ে মহাপুৰুষ শ্ৰীমন্ত শংকৰদেৱৰ জীৱন আৰু কৃতি সম্পৰ্কে ইতিমধ্যেই ৪১ খন গ্ৰন্থ প্ৰকাশ কৰিছে । উল্লেখযোগ্য যে তাৰ ভিতৰত আধা খিনিয়ে ইংৰাজী ভাষাত ৰচিত ।
বিদেশৰ অনেক বিশ্ববিদ্যালয়ে তেওঁৰ এই গ্ৰন্থসমূহ সংৰক্ষণ কৰিছে ।
এনে বিশ্ববিদ্যালয় সমূহৰ ভিতৰত অক্সফৰ্ড, কেম্ব্ৰিজ, চিকাগো, ষ্টনফৰ্ড, মিচিগান, টৰ’ন্ট, হাইছেলবাৰ্গ, কলম্বিয়া, ৱাচিংটন আদি বিশ্ববিদ্যালয় অন্যতম ।
উল্লেখযোগ্য যে ছচাইটি ফৰ শ্ৰীমন্ত শংকৰদেৱৰ নামত আন্তৰ্জাতিক সংস্থাটোৰ সভাপতি ড°বৰকাকতিয়ে ইন্টাৰনেটৰ মাধ্যমেৰে শ্ৰীমন্ত শংকৰদেৱৰ কৃতি সমূহ প্ৰচাৰ কৰাত বিশেষ ভূমিকা গ্ৰহণ কৰি আহিছে ।
বিগত দহ বছৰ ধৰি তেওঁ কেইবাটাও ৱেবচাইট সৃষ্টি আৰু পৰিচালনা কৰিছে ।
