সুশান্ত সিং ৰাজপুতৰ হত্যাৰ সম্ভাৱনা সম্পূৰ্ণ নস্যাৎ কৰিছে এইমছে। ইয়াৰ ফৰেইনছিক বিভাগৰ মুৰব্বী ডাঃ সুধীৰ গুপ্তাই স্পষ্ট কৰি দিছে যে বলীউদ অভিনেতা সুশান্ত সিং ৰাজপুতে আত্মহত্যাই কৰিছে।
এইবাৰ সেই মেডিকেল ৰিপ’ৰ্টটোৰ পুনৰীক্ষণ কৰাৰ আৰ্জি জনাই প্ৰধান মন্ত্ৰী নৰেন্দ্ৰ মোদীক পত্ৰ লিখিছে বিজেপিৰ সাংসদ সুব্ৰমনিয়াম স্বামীয়ে।
স্বামীয়ে তেওঁৰ পত্ৰত এইমছৰ ৰিপ’ৰ্টৰ কিছুমান আসোঁৱাহৰ কথা উল্লেখ কৰিছে।
বৃহস্পতিবাৰে এক টুইটত স্বামীয়ে লিখিছে,’’ যদি সুশান্ত সিং ৰাজপুতৰ মৰণোত্তৰ পৰীক্ষা সম্পৰ্কত ডাঃ সুধীৰ গুপ্তা কমিটিৰ পৰ্যালোচনাৰ পুনৰীক্ষণৰ সন্দৰ্ভত প্ৰধান মন্ত্ৰীৰ পৰা কোনো সদুত্তৰ নাপাওঁ, তেনেহ’লে জনস্বাৰ্থজনিত গোচৰ তৰাৰ মোৰ অধিকাৰ আছে। অনুচ্ছেদ ১৯আৰু ২১ৰ অধীনত সুশান্তৰ জীৱন কেনেকুৱা বঞ্চনাৰ বলি হৈছিল সেইটো জনাৰ তথা ক্ষিপ্ৰ বিচাৰৰ আবেদন জনোৱাৰ বাবে মোৰ অধিকাৰ আছে।‘’
If I do not get response from PM on the need to re-review the review of Dr. Sudhir Gupta Special Committee findings on Sushant Singh Rajput’s autopsy, I have a right to file a PIL. Under Articles 19 and 21 I have right to know how SSR’s life was deprived and for speedy justice.
— Subramanian Swamy (@Swamy39) October 22, 2020
আনহাতে, সুশান্তৰ পৰিয়ালৰ অধিবক্তা বিকাশ সিঙেও চিবিআইক সেই ৰিপ’ৰ্টৰ সম্পৰ্কত বিচাৰ কৰাৰ আবেদন জনাইছে।
সংবাদ মাধ্যমত প্ৰকাশ পোৱা অনুসৰি সুশান্তৰ মৃত্যুৰ তদন্তত চিবিআইয়ে শেষ পৰ্যায়ত উপনীত হৈছে।
ইপিনে, বৃহস্পতিবাৰে সুশান্তৰ প্ৰসংগত মুখ খুলিছে অভিনেতা হৃতিক ৰোছনৰ মাতৃ পিংকি ৰোছনে।
নিজৰ ইনষ্টাগ্ৰাম প্ৰফাইলত সুশান্তৰ ছবি শ্বেয়াৰ কৰি পিংকি ৰোছনে লিখিছে, ‘’সকলোৱে সত্য জানিব বিচাৰে, কিন্তু কোনোৱে সত্যটো ক’ব নিবিচাৰে।‘’
পিংকি ৰোছনৰ এই প’ষ্টত কাক ইংগিত কৰা হৈছে সেয়া অস্পষ্ট যদিও ইয়াক লৈ প্ৰতিক্ৰিয়া প্ৰকাশ কৰিছে বিভিন্নজনে।
