অসমত আগন্তুক নিৰ্বাচনৰ প্ৰস্তুতিৰ মাজতে শনিবাৰে নিৰ্বাচন আয়োগে ৰাজ্যৰ খচৰা ভোটাৰ তালিকা প্ৰকাশ কৰিছে। ২৭ ডিচেম্বৰত প্ৰকাশিত এই তালিকাখন ঘৰে ঘৰে গৈ চলোৱা এক বিশেষ প্ৰক্ৰিয়াৰ জৰিয়তে প্ৰস্তুত কৰা হৈছে। এই নতুন খচৰা তালিকা অনুসৰি ৰাজ্যখনত প্ৰায় ৪,৭৮,৯৯২ গৰাকী ভোটাৰক চিনাক্ত কৰি তেওঁলোকৰ নাম তালিকাৰ পৰা কৰ্তন কৰা হৈছে। নিৰ্বাচন আয়োগৰ তথ্য অনুসৰি বৰ্তমান ৰাজ্যখনত মুঠ ভোটাৰৰ সংখ্যা হৈছে ২,৫২,০২,৭৭৫ গৰাকী। ইয়াৰ ভিতৰত ১,২৫,৭২,৫৮৩ গৰাকী পুৰুষ ভোটাৰ থকাৰ বিপৰীতে মহিলা ভোটাৰৰ সংখ্যা হৈছে ১,২৬,২৮,৬৬২ গৰাকী আৰু অন্যান্য লিংগৰ ভোটাৰৰ সংখ্যা হৈছে ৩৭৯ গৰাকী।
২০২৬ চনৰ বিধানসভা নিৰ্বাচনৰ পূৰ্বে এই খচৰা তালিকাখন এক বিশেষ সংশোধন প্ৰক্ৰিয়াৰ জৰিয়তে প্ৰকাশ কৰা হৈছে যাতে ভোটাৰসকলে নিজৰ তথ্যসমূহ পৰীক্ষা কৰি ল’ব পাৰে। যদি কোনো ভোটাৰৰ নাম, বয়স, ঠিকনা বা অন্য কোনো ব্যক্তিগত তথ্যত ভুল থাকে, তেন্তে তেওঁলোকে অহা ২২ জানুৱাৰী ২০২৬ লৈকে দাবী বা আপত্তিৰ আবেদন কৰিব পাৰিব। এই দাবী আৰু আপত্তিসমূহ নিষ্পত্তি কৰাৰ পিছত নিৰ্বাচন আয়োগে অহা ১০ ফেব্ৰুৱাৰী ২০২৬ তাৰিখে চূড়ান্ত ভোটাৰ তালিকাখন প্ৰকাশ কৰিব। ভোটাৰসকলে চৰকাৰী ৱেবচাইট ceoassam.nic.in ত গৈ নিজৰ নাম আৰু তথ্যসমূহ পৰীক্ষা কৰিব পাৰিব।
ইপিনে গুৱাহাটীত কামৰূপ মহানগৰ জিলাৰ আয়ুক্ত সুমিত ছাত্তাৱনে এখন সংবাদমেল সম্বোধন কৰি জিলাখনৰ পাঁচটা বিধানসভা সমষ্টিৰ ভোটাৰ তালিকাৰ তথ্য সদৰী কৰে। তেওঁ জনোৱা অনুসৰি কামৰূপ মহানগৰ জিলাৰ পাঁচটা সমষ্টিত মুঠ ভোটাৰৰ সংখ্যা হৈছে ১০,৭৫,৫৭৬ গৰাকী। জিলাখনত পূৰ্বৰ তুলনাত ১.৬৩ শতাংশ ভোটাৰ বৃদ্ধি পাইছে। সমষ্টিসমূহৰ ভিতৰত দিছপুৰত ২,৪৯,৭৪৬ গৰাকী, ডিমৰীয়াত ২,২১,০৯৯ গৰাকী, নিউ গুৱাহাটীত ১,৯৬,০১৬ গৰাকী, গুৱাহাটী চেণ্ট্ৰেলত ১,৯৮,০৯১ গৰাকী আৰু জালুকবাৰী সমষ্টিত ২,১০,৬২৪ গৰাকী ভোটাৰ আছে। ভোটাৰৰ সংখ্যা বৃদ্ধি পোৱাৰ বাবে জিলাখনত ১০৫ টা নতুন ভোটকেন্দ্ৰ বৃদ্ধি কৰি মুঠ ভোটকেন্দ্ৰৰ সংখ্যা ১২১৮ টা কৰা হৈছে।
জিলা আয়ুক্তগৰাকীয়ে লগতে জানিবলৈ দিয়ে যে ভোটাৰ তালিকাৰ বিসংগতি দূৰ কৰাৰ বাবে অহা ৩, ৪, ১০ আৰু ১১ জানুৱাৰীত বিশেষ শিবিৰৰ আয়োজন কৰা হ’ব। ৰাইজে নিজৰ দাবী বা আপত্তি বৰ্তমানৰ নিৰ্বাচনী পঞ্জীয়ন বিষয়া বা বুথ পৰ্যায়ৰ বিষয়াৰ ওচৰত দাখিল কৰিব পাৰিব। ইয়াৰ উপৰি অনলাইন মাধ্যমৰ জৰিয়তে অৰ্থাৎ ভোটাৰ হেল্পলাইন এপ বা নিৰ্বাচন আয়োগৰ ৱেবচাইটৰ জৰিয়তেও এই আবেদনসমূহ কৰাৰ সুবিধা উপলব্ধ কৰা হৈছে। নিৰ্বাচনৰ পূৰ্বে নিজৰ ভোটাৰ পৰিচয় পত্ৰৰ তথ্য সঠিক কৰি ৰাখিবলৈ সকলোৰে প্ৰতি আহ্বান জনোৱা হৈছে।
