কোকৰাঝাৰ জিলাৰ কচুগাঁৱত আজি আৰক্ষী আৰু সেনা বাহিনীয়ে এক যুটীয়া অভিযান চলাই অস্ত্ৰসহ এজন দুৰ্ধৰ্ষ এন ডি এফ বি (স)ৰ কেডাৰ আটক কৰিবলৈ সক্ষম হয়।
আটকাধীন কেডাৰজনক গোসাঁইগাঁও আৰক্ষী থানাৰ অন্তৰ্গত চৰাইবিলৰ প্ৰয়াত ধৰমদাস নাৰ্জাৰীৰ পুত্ৰ ৰোহিটন নাৰ্জাৰী (৩৩) বুলি চিনাক্ত কৰা হৈছে।
আটক কৰাৰ সময়ত আৰক্ষীয়ে তেওঁৰ পৰা এটা ৭.৬৫ এম এম পিষ্টল ১৫ জাঁই সক্ৰিয় গুলী উদ্ধাৰ কৰে যদিও জেৰাৰ সময়ত তেওঁ নিজৰ ঘৰত লুকুৱাই ৰখা এটা এ কে ৫৬ ৰাইফল, এটা মেগজিন আৰু ২১ জাঁই সক্ৰিয় গুলী উলিয়াই দিয়ে।
গোসাঁইগাঁও আৰক্ষীৰ এক সূত্ৰই জনোৱা মতে এক গোপন সূত্ৰৰ পৰা পোৱা খবৰৰ ভিত্তিত আজি পুৱা প্ৰায় ৭:৩০ বজাত অভিযান চলাই নাৰ্জাৰীক আটক কৰা হয়।
আনহাতে ইয়াৰ পূৰ্বে ২০১৭ চনত এবাৰ গ্ৰেপ্তাৰ হোৱা ৰোহিটন নাৰ্জাৰীৰ জ্যেষ্ঠ ভাতৃ এন ডি এফ বি (স)ৰ কেডাৰ মেজৰ ছেনডইউ ২০১৭ চনত আৰক্ষীৰ সৈতে হোৱা এক সংঘৰ্ষত নিহত হৈছিল বুলি আৰক্ষীয়ে জানিবলৈ দিয়ে।
সমপ্ৰতি ধৃত ৰোহিটনৰ বিৰুদ্ধে কচুগাঁও আৰক্ষী থানাত ৪৬/২০১৯ ইউ/এছ ১২০ (বি)/১২১/১২১(এ)/১২২ নম্বৰৰ এক গোচৰ ৰুজু কৰি তদন্ত চলাই থকা হৈছে।
