এক গোপন সূত্ৰৰ পম খেদি আজি পুৱা শিৱসাগৰ আৰক্ষীয়ে বকতা হাবিগাঁৱৰ পৰা আলফা স্বাধীনৰ এজন সদস্যক গ্ৰেপ্তাৰ কৰিবলৈ সক্ষম হয়। ধৃত সদস্যজনক মৰাণৰ বিৰেন চেতিয়া ওৰফে ৰন্টু অসম বুলি চিনাক্ত কৰা হৈছে।
শিৱসাগৰ জিলাৰ আৰক্ষী অধীক্ষক অমিতাভ সিনহাই এই কথা সদৰী কৰি কয় যে এক গোপন সূত্ৰৰ পম খেদি শিৱসাগৰৰ অতিৰিক্ত আৰক্ষী অধীক্ষক বলীন দেউৰীৰ নেতৃত্বত আৰক্ষী আৰু ১৪৯ চি আৰ পি এফৰ এটা দলে ৰন্টু অসমক আটক কৰিবলৈ সক্ষম হয়।
তেওঁৰ পৰা আৰক্ষীয়ে এটা গ্ৰেনেড, তিনিটা মোবাইল আৰু এন এছ চি এন ৰ কামাণ্ড চাৰ্টিফিকেট এখন জব্দ কৰে।
আনহাতে সোধা-পোচা কৰাত ধৃত আলফা সদস্যজনৰ পৰা বহু বিস্ফোৰক তথ্য লাভ কৰা বুলি আৰক্ষীয়ে জানিবলৈ দিয়ে। সদস্যজনে স্বীকাৰ কৰে যে যোৱা ১৮ নবেম্বৰত ডিমৌত সংঘটিত বোমা বিস্ফোৰণৰ ঘটনাৰ লগত তেওঁ জড়িত আছিল।
আলফাৰ সদস্য আদ্যমানে তেওঁক নাগালেণ্ডলৈ নি গ্ৰেনেড নিক্ষেপ কৰাৰ প্ৰশিক্ষণ দিছিল বুলি জানিবলৈ দি কয় যে প্ৰশিক্ষণ লৈ আহি তেওঁ ডিমৌত বোমা বিস্ফোৰণৰ ঘটনা সংঘটিত কৰিছিল।
ইয়াৰ পিছত তেওঁ নাগালেণ্ডলৈ পলায় যায় আৰু আনুষ্ঠানিকভাৱে আলফাত যোগদান কৰে। আনহাতে ম্যানমাৰৰ শিবিৰত প্ৰশিক্ষণ লৈ থকা সময়ত ম্যানমাৰৰ সেনাই আলফা তথা এন এচ চি এনৰ শিবিৰত আক্ৰমণ কৰাত তাৰ পৰা তেওঁ পলাই আহি নাগালেণ্ডৰ হোৱাইট বস্তি নামৰ আন এটা শিবিৰত আশ্ৰয় লয়হি।
পিছত পুনৰ গ্ৰেনেড আৰু এন এছ চি এনৰ কামাণ্ড চাৰ্টিফিকেট (Government Of The People Republic Of Nagaland) সহ তেওঁ অসমত প্ৰৱেশ কৰে আৰু ডিমৌৰ বিভিন্ন ব্যক্তিৰ পৰা ধন দাবী আৰু ধন সংগ্ৰহ কৰে। আৰক্ষীক জনোৱা মতে তেওঁ এক লাখতকৈ অধিক টকা সংগ্ৰহ কৰিছিল।
স্বাধীনতা দিৱসৰ পূৰ্বে এইজন আলফা স্বাধীনৰ সদস্যক আটক কৰাটো শিৱসাগৰ আৰক্ষীৰ বাবে বৃহৎ সাফল্য বুলি আৰক্ষী অধীক্ষক গৰাকীয়ে দাবী কৰে।