তেতিয়া মাজনিশা। গোটেই দিনটো কাম কৰি ক্লান্ত ৰাজস্থানৰ পাঁচজন শ্ৰমিকে দিল্লীৰ ৰাজপথত জিৰণি লৈছিল। গোটেই দিনটো ভাগৰুৱা হোৱাৰ পিছত সিহঁতে ফুটপাথতে শুই পৰিছিল। তেতিয়াও তেওঁলোকে জনা নাছিল যে তেওঁলোকৰ বাবে কি ভয়ানক পৰিণতি অপেক্ষা কৰি আছে।
মাজনিশা তেওঁলোক শুই থকা অৱস্থাত দিল্লীত সংঘটিত হয় এক মৰ্মান্তিক ঘটনা। শুই থকা প্ৰব্ৰজিত শ্ৰমিকক মহতিয়াই পেলায় এখন গাড়ীয়ে। নিমিষতে ৰক্তাক্ত হৈ পৰে ৰাজধানীৰ পথ। পাঁচজনৰ মৃত্যু ঘটে। দিল্লীৰ এটা অভিজাত এলেকাত নিশাৰ আন্ধাৰত ঘটিছে এই কাণ্ড। এই ঘটনাত কঁপি উঠিছে সাধাৰণ ৰাইজ।
সংবাদ মাধ্যমত প্ৰকাশ পোৱা খবৰ মতে, এই ঘটনা সংঘটিত হৈছিল যোৱা ৯ জুলাইৰ নিশা প্ৰায় ১:৪৫ বজাত। ঘটনা সন্দৰ্ভত এজন বিষয়াই কয় যে শনিবাৰে দক্ষিণ-পশ্চিম দিল্লীৰ বসন্ত বিহাৰ অঞ্চলৰ শিৱ কেম্পৰ সমীপৰ পদপথত ৫জন লোক শুই আছিল। দুটা দম্পতী আৰু এটা শিশু আছিল।
মাজনিশা এখন অ’ডি গাড়ীয়ে সিহঁতক মহতিয়াই পেলালে। লাধি (৪০), তেওঁৰ আঠ বছৰীয়া কন্যা বিমলা, লাধিৰ স্বামী সাবামী ওৰফে চিৰ্মা (৪৫), ৰাম চন্দ্ৰ (৪৫) আৰু তেওঁৰ পত্নী নাৰায়ণী (৩৫)। এই আটাইকেইজনেই ৰাজস্থানৰ বাসিন্দা।
জানিব পৰা মতে, ঘাতক গাড়ীখনৰ চালক উৎসৱ শেখৰ নামৰ এজন ব্যক্তি, যাৰ বয়স ৪০ বছৰ। আৰক্ষীয়ে নিশ্চিত কৰিছে যে এই ঘটনাৰ সময়ত লোকজন মাতাল অৱস্থাত আছিল। ঘটনাৰ প্ৰাৰম্ভিক তদন্ত আৰু প্ৰত্যক্ষদৰ্শীৰ বক্তব্যৰ পৰাও এই পাঁচজন শিৱ কেম্পৰ সন্মুখৰ ফুটপাথত শুই থকা বুলি জানিব পৰা গৈছে। হঠাৎ গভীৰ নিশা তেওঁলোকৰ ওপৰেৰে বগা ৰঙৰ অ’ডি গাড়ী চলি যায়।
তেওঁলোকক চিকিৎসালয়লৈ লৈ যোৱা হয় যদিও তেওঁলোক বাচি থকা নাই বুলি কেইবাটাও সংবাদ মাধ্যমত প্ৰকাশ পাইছে। আনহাতে, দুৰ্ঘটনাটোত ঘাতক গাড়ীখনো ভাঙি চূৰমাৰ হৈছে। দুৰ্ঘটনা সংঘটিত হোৱাৰ পিছত গাড়ীখনৰ ছবি ইতিমধ্যে ৰাজহুৱা হৈছে। সেইবোৰত অ’ডিৰ ক্ষতিগ্ৰস্ত সন্মুখৰ অংশটো দেখা যায়। যদিও চালকজন আহত হৈছে নে নাই সেয়া এতিয়াও জানিব পৰা হোৱা নাই।
জানিব পৰা মতে অভিযুক্ত চালক শেখৰ দ্বাৰকাৰ বাসিন্দা। দুৰ্ঘটনাৰ খবৰ পোৱাৰ পিছতে আৰক্ষীয়ে সেই স্থানত উপস্থিত হয়। থিতাতে গ্ৰেপ্তাৰ কৰা হয় শেখৰক। আৰক্ষীয়ে জনোৱা মতে, অভিযুক্তৰ বিৰুদ্ধে আইনী ব্যৱস্থা গ্ৰহণ কৰা হৈছে। অধিক বিশদ তথ্যৰ বাবে আৰক্ষীয়ে তদন্ত অব্যাহত ৰাখিছে।
শেহতীয়াকৈ কেইবাটাও পথ দুৰ্ঘটনা সংঘটিত হৈছে। দেশৰ বিভিন্ন প্ৰান্তত অসাৱধানতাৰে দ্ৰুতবেগী গাড়ী চালনাৰ বলি হৈছে একাংশ। পথ দুৰ্ঘটনাৰ সন্দৰ্ভত একাধিক নিয়ম আৰু সতৰ্কবাণী থকাৰ পিছতো বহুতে এইবোৰ বিষয়ত গুৰুত্বই দিয়া নাই।
