ঋতু পৰিৱৰ্তনৰ লগে লগে দেহত বিভিন্ন সমস্যাৰ উদ্ভৱ হোৱাটো সাধাৰণ কথা। বিশেষকৈ চকুৰ স্বাস্থ্যৰ ক্ষেত্ৰত এনে সমস্যাসমূহ অধিক পৰিলক্ষিত হয়। চকুৰ শুকান হোৱা বা ড্ৰাই আইজ সমস্যা এতিয়া বহু লোকৰ মাজত সাধাৰণ হৈ পৰিছে। ছাৰ গংগা ৰাম চিকিৎসালয়ৰ চকু বিভাগৰ প্ৰাক্তন বিভাগীয় মুৰব্বী ডাঃ এ.কে. গ্ৰ’ভাৰে এই বিষয়ে সতৰ্ক কৰি কয় যে, যদি এই সমস্যাৰ লক্ষণসমূহ দীৰ্ঘদিন ধৰি থাকে, তেন্তে বিলম্ব নকৰি চিকিৎসকৰ পৰামৰ্শ লোৱা উচিত। চকুৰ শুকানতা মানে চকুলো গ্ৰন্থিৰ পৰা পৰ্যাপ্ত চকুলো উৎপন্ন নোহোৱাৰ ফলত চকুত অস্বস্তি অনুভৱ হোৱা।
ডাঃ গ্ৰ’ভাৰে জানিবলৈ দিয়া মতে, এই সমস্যা বিশেষকৈ মোবাইল ফোন, লেপটপ বা কম্পিউটাৰ দীৰ্ঘ সময় ব্যৱহাৰ কৰা লোকসকলৰ মাজত অধিক দেখা যায়। তদুপৰি শীততাপ নিয়ন্ত্ৰিত পৰিৱেশ, ধূলি, প্ৰদূষণ বা সূৰ্যৰ পোহৰত বহু সময় কটোৱা লোকসকলেও এই সমস্যাৰ সন্মুখীন হয়। বিশেষজ্ঞসকলে কয় যে, ৪০ বছৰৰ ওপৰৰ লোক, কনটেক্ট লেন্স পৰিধানকাৰী, হৰম’নৰ পৰিৱৰ্তন হোৱা মহিলাসকল এই সমস্যাত অধিক আক্ৰান্ত হয়। দেহত পানীৰ অভাৱ, টোপনিৰ অভাৱ, ভিটামিন এৰ অভাৱ, ধূমপান আৰু কিছুমান ঔষধ যেনে এণ্টিহিষ্টামিন, ৰক্তচাপ বা হতাশাৰ ঔষধেও চকুলো উৎপাদনত প্ৰভাৱ পেলায়। বয়স বঢ়াৰ লগে লগে চকুলো উৎপাদন কৰা গ্ৰন্থিবোৰ কম সক্ৰিয় হোৱাৰ ফলত এই সমস্যা বৃদ্ধি পায়। যদি সমস্যাটো দীৰ্ঘদিনীয়া হয়, তেন্তে ই চকুৰ কৰ্ণিয়াৰ ক্ষতি কৰি দৃষ্টিশক্তিৰ ওপৰত গুৰুতৰ প্ৰভাৱ পেলাব পাৰে।
চকু শুকান হোৱা সমস্যাৰ সাধাৰণ লক্ষণসমূহ হৈছে: চকুত জ্বলা-পোৰা বা খজুৱতি অনুভৱ। চকুত কিবা সোমাই থকাৰ দৰে অস্বস্তি। পোহৰৰ প্ৰতি অধিক সংবেদনশীলতা। দীৰ্ঘসময় পঢ়া বা স্ক্ৰীন ব্যৱহাৰৰ পিছত অস্পষ্ট দৃষ্টি। নিশা গাড়ী চলোৱাত অসুবিধা। চকুত সঘনাই পানী ওলোৱা, আঠা আঠা যেন অনুভৱ, ৰঙা পৰা বা বিষ।
যদি এই লক্ষণসমূহ অব্যাহত থাকে, তেন্তে চকুৰ চিকিৎসকৰ ওচৰলৈ যোৱাটো অত্যন্ত প্ৰয়োজনীয়।
ঘৰুৱা উপায়েৰে প্ৰতিৰোধ সম্পৰ্কে বিশেষজ্ঞসকলে কয় যে, চকু শুকান হৈ পৰা, প্ৰতিৰোধ কৰিবলৈ কিছুমান সহজ ঘৰুৱা উপায় অৱলম্বন কৰিব পাৰি:
প্ৰতি ২০ মিনিটৰ মূৰে মূৰে চকু দুটা স্ক্ৰীনৰ পৰা আঁতৰাই ২০ ছেকেণ্ড জিৰণি লওক। সঘনাই চকু টিপিয়াই আৰ্দ্ৰতা বজাই ৰাখক। কোঠাত হিউমিডিফায়াৰ ব্যৱহাৰ কৰক। প্ৰচুৰ পানী খোৱক আৰু ধূমপান-কেফেইন পৰিহাৰ কৰক। ধূলি আৰু সূৰ্যৰ পোহৰৰ পৰা ৰক্ষাৰ বাবে ছানগ্লাছ পৰিধান কৰক। চিকিৎসকৰ পৰামৰ্শ অনুসৰি আই ড্ৰপ ব্যৱহাৰ কৰক।
ডাঃ গ্ৰ’ভাৰে সকীয়াই দিয়ে যে, এই সমস্যাক অৱহেলা নকৰি সময়মতে চিকিৎসা লোৱাটো গুৰুত্বপূৰ্ণ। চকুৰ স্বাস্থ্য সুৰক্ষিত ৰাখি জীৱনটো সুন্দৰ কৰি তুলক।
