দুধনৈ আৰক্ষীৰ অভিযানত নিদ্ৰা হৰিছে বাইক চোৰৰ৷
দুধনৈ আৰক্ষী থানাৰ ভাৰপ্ৰাপ্ত আৰক্ষী বিষয়া মুকুট কাকতিৰ নেতৃত্বত ৰংজুলি আৰক্ষীৰ সহযোগত অসম আৰক্ষীৰ মোষ্ট ৱান্টেড হিচাবে পৰিচিত ৰংজুলি কাণকাটাৰ পৰা ভুৱা ডিটিঅ’ তথা দুধৰ্ষ গাড়ী চোৰ আব্দুল বাৰিকসহ ভিন্ন ঠাইৰ পৰা আন পাঁচজন চোৰ ক্ৰমে খেৰোপাৰাৰ নুৰ আলম ওৰফে ৰাহুল, কানকাটাৰ সোমেৰ আলী ওৰফে তাৰুণ, মাটিয়া মামুদপুৰৰ আব্দুল ৰহিম আলি, মালেক হুচেইন আৰু বামুনপাৰাৰ ৰাজিবুল ইছলামক গ্ৰেপ্তাৰ কৰা হৈছে৷
লগতে ভুৱা ডিটিঅ’ কাৰ্যালয় এটাও উৎখাত কৰে৷
দীৰ্ঘদিন ধৰি আৰক্ষীৰ চকুত ধূলি দি পলাই ফুৰা ধৃত চোৰকেইজনৰ তথ্যৰ ভিত্তিত বৰ্তমানলৈ মুঠ ৪৩ খন বাইক আৰু এখন টাটা ডিআই উদ্ধাৰ কৰাৰ লগতে মুঠ ১৭ জনকৈ গাড়ী চোৰক গ্ৰেপ্তাৰ কৰে আৰক্ষীয়ে ৷
ধৃত চোৰ কেইজনৰ পৰা ভুৱা পঞ্জীয়ন নম্বৰ প্লেট, লেপটপ, স্কেনাৰ, গেছ পাইপ, ইঞ্জিন আৰু চেচিচ নম্বৰ সলনি কৰা আইৰণ ডাইচ, হেন্দেল লক, পেট্ৰল টেংকী লক আৰু গাড়ী চুৰি কাৰ্যত ব্যবহৃত বিভিন্ন সামগ্ৰীও উদ্ধাৰ কৰা হয়৷
অঞ্চলটোত গাড়ী চুৰিৰ লগত জড়িত সকলোকে আটক নকৰালৈকে এই অভিযান চলি থাকিব বুলি আৰক্ষীয়ে জানিবলৈ দিয়ে৷ উল্লেখ্য যে সমগ্ৰ অসমত গাড়ী চোৰৰ বিৰুদ্ধে অসম আৰক্ষীৰ এইটোৱেই বৃহৎ অভিযান৷
এই সংক্ৰান্তত গোৱালপাৰা জিলা আৰক্ষী অধীক্ষক ভি ভি ৰাকেশ ৰেড্ডীয়ে গাড়ী চুৰিৰ লগত জড়িত চক্ৰটোক উৎখাত কৰাৰ বাবে দুধনৈ আৰক্ষী থানাৰ ভাৰপ্ৰাপ্ত আৰক্ষী বিষয়া মুকুট কাকতিৰ লগতে গোৱালপাৰা আৰক্ষীক ধন্যবাদ জনাইছে৷
