অসমৰ জাতীয় নাট্য আন্দোলনত বৈশিষ্ট্যপূৰ্ণ অভিনয়, অশেষ নাট্য-সাহিত্য সৃষ্টিৰে অৱদান আগবঢোৱা প্ৰতিভাধৰ নাট্যশিল্পী তথা সংবাদিক দীপক মহন্তৰ সোঁৱৰণত ১-৫ ছেপ্তএম্বৰলৈ অনুষ্ঠিত হ’ব লগা নাট সমাৰোহৰ প্ৰস্ত্ততি ইতিমধ্যে সম্পূৰ্ণ হৈ উঠিছে।
সমাৰোহত মঞ্চস্থ হ’ব দুলাল ৰায়ৰ কালজয়ী নাট ‘ড্ৰেগন’সহ মুঠ ৮ খন নাট। দীপক মহন্তৰ দ্বাৰা ৰচিত ‘বিলত তিৰেবিৰাই’ শীৰ্ষক নাটকখনো সমাৰোহত আনুষ্ঠানিকভাৱে মুকলি কৰা হ’ব বুলি জানিবলৈ দিয়ে উদ্যোক্তাসকলে।
তেজপুৰৰ মনিকূট কলাক্ষেত্ৰৰ উদ্যোগত তেজপুৰৰ জিলা পুথিভঁৰালৰ প্ৰেক্ষাগৃহত অনুষ্ঠিত হ’ব লগা এই সমাৰোহখন অনুষ্ঠানিকভাৱে উদ্বোধন কৰিব অসম নাট্য সন্মিলনৰ সভাপতি তথা যশস্বী নাট্যকাৰ দুলাল ৰয়ে।
সমাৰোহৰ প্ৰথম নিশা অৰ্থাৎ ১ ছেপ্তেম্বৰত চতিয়াৰ মঞ্চতীৰ্থই মঞ্চস্থ কৰিব পংকজজ্যোতি ভূঞাৰ পৰিচালিত নাট ‘মৰুদ্যানত গধূলি’ আৰু উদ্বোধন কৰিব চতিয়া সমষ্টিৰ বিধায়ক পদ্ম হাজৰিকাই। ২ ছেপ্তেম্বৰ সন্ধিয়া ৬ বজাৰ পৰা তেজপুৰৰ সংস্কৃতিক অনুষ্ঠান চাতকে মঞ্চস্থ কৰিব পংকজজ্যোতি ভূঞা ৰচিত আৰু ভৱানী ভূঞাৰ পৰিচালিত আন এখন নাট ‘ৰঙীন পখিলা’। এই নাটকখন আনুষ্ঠানিকভাৱে উদ্বোধন কৰিব ৰাজেন বৰঠাকুৰে। ইয়াৰ পিছতেই ‘সুমথিৰাৰ ৰ’দ’ উদ্বোধন কৰিব কণ্ঠশিল্পী পংকজ বৰদলৈয়ে। ৩ ছেপ্তেম্বৰত বিশ্বনাথ চাৰিআলিৰ তুৰংগমে দীপক মহন্ত ৰচিত ‘উলংগ ৰজা’ মঞ্চস্থ কৰিব আৰু উদ্বোধন কৰিব বৃন্দাবন গোস্বামীয়ে। ইয়াৰ পিছতেই নগাওঁ পুৰণিগুদামৰ ৰংগালয় নাট্যগোষ্ঠী্য়ে দুলাল ৰয়ৰ কালজয়ী নাটক ‘ড্ৰেগন’ মঞ্চস্থ কৰিব। ৪ ছেপ্তেম্বৰত অৰুণ নাথ ৰচিত ‘কৌন বনেগা পতি’ শীৰ্ষক নাটকখন মঞ্চস্থ কৰিব তৰজপুৰৰ কৰুনাময়ী কলানিকেতনে আৰু উদ্বোধন কৰিব কৰিব পংকজ কুমাৰ নাথে। দ্বিতীয়খন নাটক অৰুণ নাথ ৰচিত ‘প্ৰেম’ আৰু উদ্বোধন কৰিব শিক্ষাবিদ ভুৱনেশ্বৰ চহৰীয়াই। নাট সমাৰোহৰ অন্তিম দিনা দীপক মহন্তৰ বহুচৰ্চিত নাট ‘ধনীৰামৰ থিয়েটাৰ’ আৰু এই নাটকখন আনুষ্ঠানিকভাৱে উদ্বোধন কৰিব সংবাদিক ঋতুস্মিন শৰ্মাই।
সমাৰোহত সন্মানীয় অতিথি হিচাপে অসমৰ মুখ্য মন্ত্ৰীৰ প্ৰেছ উপদেষ্টা হৃষীকেশ গোস্বামী আৰু বিশিষ্ট অতিথি হিচাপে অসম চৰকাৰৰ তথ্য আৰু জনসংযোগ বিভাগৰ সঞ্চালক ৰাজীৱ বৰুৱা, দৈনিক জনমভূমি কাকতৰ সম্পাদক উৎপল বৰুৱা আৰু শোণিতপুৰ জিলাৰ উপায়ুক্ত মনোজ কুমাৰ ডেকা উপস্থিত থাকিব।
