এপেক্স বেংকৰ ২০.৩০ কোটি টকাৰ কেলেংকাৰী এক বৃহৎ সংঘবদ্ধ লুটপাত— এই দাবী ভাৰতৰ গণতান্ত্ৰিক যুৱ ফেডাৰেছন, চমুকৈ ডি ৱাই এফ আইৰ অসম ৰাজ্যিক কমিটিৰ।
সম্প্ৰতি ৰাজ্যত তোলপাৰ লগোৱা এপেক্স বেংক কেলেংকাৰী সন্দৰ্ভত ৰাজনৈতিক হস্তক্ষেপৰ পৰা মুক্ত উচ্চ পৰ্যায়ৰ তদন্তৰো দাবী কৰিছে ডি ৱাই এফ আয়ে।
উল্লেখ্য যে, সকলো নীতি-নিয়ম ভংগ কৰি এপেক্স বেংকৰ অধ্যক্ষ তথা বিজেপি বিধায়ক বিশ্বজিত ফুকনৰ ঘনিষ্ঠক ঋণ দিয়াৰ ব্যৱস্থা কৰিছে বুলি বিস্ফোৰক অভিযোগ উত্থাপন হৈছে।
কিন্তু এনে এক বৃহৎ কেলেংকাৰীৰ অভিযোগ উঠাৰ পাছতো বিষয়টোকলৈ বেংক কৰ্তৃপক্ষ অথবা চৰকাৰ কোনোৱে উদ্বিগ্ন নহয় বুলি আশ্চৰ্য প্ৰকাশ কৰিছে ডি ৱাই এফ আয়ে।
সংগঠনটোৱে লগতে অধ্যক্ষ বিশ্বজিত ফুকনে পৰিচালন সঞ্চালকক তদন্ত কৰিবলৈ নিৰ্দেশ দিয়ে দায়িত্ব সামৰিছে বুলি অভিযোগ তুলিছে। ডি ৱাই এফ আইৰ অভিযোগ, অধ্যক্ষ আৰু পৰিচালন সঞ্চালক কোনোৱে এই কেলেংকাৰীৰ পৰা মুক্ত নহয়।
“এনে অৱস্থাত পৰিচালন সঞ্চালকে কি তদন্ত কৰিব সেয়া সহজে অনুমেয়। প্ৰকৃততে এয়া সমগ্ৰ কেলেংকাৰীক গাপ দিয়াৰহে চেষ্টা চলাইছে।”— এক বিবৃতি যোগে সংগঠনটোৱে কয়।
ডি ৱাই এফ আইয়ে এই বৃহৎ ৰাজহুৱা ধনৰ লুণ্ঠন ঘটনাৰ এক উচ্চ পৰ্যায়ৰ তদন্ত কৰাৰ লগতে এই প্ৰক্ৰিয়াত যাতে ৰাজনৈতিক হস্তক্ষেপ নহয় তাৰ ব্যৱস্থা কৰিবলৈও দাবী উত্থাপন কৰিছে।
