দুৰ্গম যাতায়াত ব্যৱস্থা আৰু আৰ্থিক-সামাজিক দিশত পিছ পৰা জিলা ডিমা হাছাওৰ ৩৭ খনকৈ চৰকাৰী বিদ্যালয় বন্ধ কৰা কাৰ্যক ভাৰতৰ গণতান্ত্ৰিক যুৱ ফেডাৰেছন (ডি ৱাই এফ আই)ৰ অসম ৰাজ্যিক কমিটিয়ে কঠোৰ ভাষাৰে গৰিহণা জনাইছে আৰু এয়া চৰকাৰৰ ভুল নীতিৰ পৰিণাম বুলি অভিহিত কৰিছে।
এয়া পাহাৰীয়া জিলাখনৰ প্ৰতি চৰকাৰখন প্ৰেমৰ নমুনা বুলি ডি ৱাই এফ আইয়ে অভিহিত কৰিছে।
সংবাদ মাধ্যমত প্ৰকাশিত খবৰ অনুসৰি পাহাৰীয়া জিলাখনৰ উক্ত বিদ্যালয়সমূহত দীৰ্ঘদিন ধৰি পৰ্যাপ্ত শিক্ষক নাছিল। বহু বিদ্যালয়ৰ ঘৰ-দুৱাৰেই নাছিল। চৰকাৰৰ ভুল নীতিৰ বাবেই যে চৰকাৰী বিদ্যালয়ৰ এই পয়ালগা অৱস্থা হৈছে সেয়া নিশ্চিত।
আন এটা উদ্বেগজনক দিশ হৈছে সমতলৰ বিদ্যালয়ৰ দৰে তুলনামূলকভাৱে জনবসতি পাতল পাহাৰীয়া অঞ্চলৰ ছাত্ৰ-শিক্ষকৰ অনুপাত মিলাই শিক্ষক নিযুক্তিৰ ব্যৱস্থা কৰা। বহু দুৰ্গম অঞ্চলত জনবসতি অতি কম অথচ দূৰ-দূৰণিলৈ কোনো বিদ্যালয় নাই। এনে অৱস্থাত পাহাৰীয়া অঞ্চলৰ বিদ্যালয় সম্পৰ্কত অন্য ধৰণে চিন্তা কৰাৰ প্ৰয়োজন আছিল যদিও চৰকাৰে কোনো পদক্ষেপ লোৱা নাই।
আনকি বহু অঞ্চলত মাতৃভাষাত শিক্ষা গ্ৰহণৰো কোনো সুবিধা নাই। এনে বহু সমস্যাই চৰকাৰী শিক্ষা ব্যৱস্থাক দুৰ্বল কৰি পেলাইছে আৰু শেষত তেনে বিদ্যালয় চৰকাৰে বন্ধ কৰি দিয়াৰ সিদ্ধান্ত লৈছে।
চৰকাৰে ইতিমধ্যে যোৱা ৬ বছৰত চৰকাৰে ৭৫৫২খন বিদ্যালয় বন্ধ কৰিছে। চৰকাৰে ৰাজহুৱা শিক্ষাৰ পৰা নিজৰ দায়িত্ব আঁতৰাই আনিব বিচাৰিছে আৰু তাৰেই পৰিণাম হিচাপে অসমৰ ইমূৰৰ পৰা সিমূৰলৈ বিদ্যালয় বন্ধ প্ৰক্ৰিয়া আৰম্ভ কৰিছে। আৰ্থিক দিশত পিছ পৰা ৰাজ্যখনৰ বাবে এয়া মুঠেই সুখবৰ নহয়।
ডি ৱাই এফ আইয়ে বিদ্যালয় বন্ধ প্ৰক্ৰিয়া বাতিল কৰি চৰকাৰী বিদ্যালয়ৰ দুৰ্বলতাসমূহ চিনাক্ত কৰা আৰু তাৰ ভিত্তিত বিদ্যালয়সমূহ উন্নত কৰি গঢ়ি তোলাৰো দাবী জনাইছে।