বিহাৰ বিধানসভা নিৰ্বাচনৰ ভোটগণনা আৰম্ভ; প্ৰাথমিক ট্ৰেণ্ডত মহাজোঁটৰ অগ্ৰগতি
আৰু কেইঘন্টামানৰ ভিতৰতে বিহাৰত কোনে নতুন চৰকাৰ গঠন কৰিব সেয়া স্পষ্ট হৈ পৰিব। তৰুণৰ নেতৃত্বত নতুন শক্তি নে অভিজ্ঞতাৰ জোখেৰে পুৰণি মিত্ৰজোঁট সেয়া জানিবলৈ আৰু বেছি অপেক্ষা নাই।
সুদীৰ্ঘ ১৫ বছৰৰ পাছত তেজস্বী যাদৱৰ নেতৃত্বত লালুপ্ৰসাদৰ দল আৰজেডিৰ যাত্ৰা শুভ বুলিয়েই ক’ব পাৰি। বিহাৰৰ নিৰ্বাচনত ইতিমধ্যে প্ৰতিষ্ঠান বিৰোধী ঢৌৱে ব্যাপক প্ৰভাৱ পেলোৱা দেখা গৈছে।
ইপিনে নিজৰ নাক কাটি সতিনীৰ যাত্ৰা ভংগ কৰা ছিৰাগ পাছোৱানৰ ওপৰতো নিৰ্বাচনী সমীকৰণ বহুখিনি নিৰ্ভৰ কৰিছে।
লোকসভা নিৰ্বাচনত মোদী ধুমুহাৰ কোনো ৰেশ দেখা নগ’ল বিহাৰ বিধানসভাৰ নিৰ্বাচনত। বৰঞ্চ এনডিএৰ সমাৱেশসমূহ নিষ্প্ৰভহে হৈ পৰিছিল।
বিপৰীতে তেজস্বীৰ নেতৃত্বত বিহাৰত মহাজোঁট বন্ধনে নতুন প্ৰাণৰ সঞ্চাৰ কৰিছে।
ৰাজ্যখনৰ ৩৮খন জিলাৰ ৫৫টা ভোটগ্ৰহণ কেন্দ্ৰত ইতিমধ্যে ভোটগণনা আৰম্ভ হৈছে।
প্ৰাথমিক ট্ৰেণ্ড অনুসৰি জেডিয়ুৱে ইয়াৰ নিজস্ব আসনসমূহ ধৰি ৰখাত ব্যৰ্থ হোৱাৰ বিপৰীতে বিজেপিয়ে কোনোমতে পুৰণি স্থিতি ধৰি ৰাখিবলৈ সক্ষম হৈছে।
বিহাৰ বিধানসভাৰ মুঠ ২৪৩খন আসনৰ ভিতৰত ২১৬খন আসনৰ গণনাৰ প্ৰাথমিক ট্ৰেণ্ডত আৰ জি ডি নেতৃত্বৰ মহাজোঁট বন্ধনে ১২৩খন আৰু এনডিএ ১০৯খন আসনত অগ্ৰগতি লৈ আছে।
চৰকাৰ গঠন কৰিবলৈ মুঠ ১২২খন আসনৰ প্ৰয়োজন হ’ব।