ভাৰতত ডায়েবেটিছ ৰোগীৰ সংখ্যা ক্ৰমান্বয়ে বৃদ্ধি পাইছে। বেছিভাগ মানুহেই ভাৱে যে যদি ফাষ্টিং ছুগাৰ, খোৱাৰ পিছৰ ছুগাৰ আৰু ৰিপ’ৰ্ট নৰ্মেল থাকে, তেন্তে তেওঁলোকৰ ডায়েবেটিছৰ কোনো আশংকা নাই। কিন্তু এতিয়া বিশেষজ্ঞসকলে কয় যে এই ধাৰণা সম্পূৰ্ণ শুদ্ধ নহয়। বহু সময়ত শৰীৰত ডায়েবেটিছৰ আৰম্ভণি হৈয়েই থাকে, কিন্তু আমাৰ সাধাৰণ ছুগাৰ টেষ্টে ইয়াক ধৰা পেলাব নোৱাৰে।
শেহতীয়াকৈ মেডিকেল জাৰ্নেল কিউৰেছত প্ৰকাশিত এক গৱেষণাই এই কথা পুনৰ চৰ্চালৈ আনিছে। পুনেৰ বি জে চৰকাৰী মেডিকেল কলেজৰ চিকিৎসকসকলে নৱজাতকৰ ডায়েবেটিছৰ এক বিৰল ঘটনা পোহৰলৈ আনিছে, য’ত জিন টেষ্টিঙৰ জৰিয়তে ৰোগটোৰ প্ৰকৃত কাৰণ জানিব পৰা গৈছে। এই ঘটনাই প্ৰমাণ কৰে যে বৰ্তমান সময়ত কেৱল তেজৰ ছুগাৰ পৰীক্ষা কৰাই যথেষ্ট নহয়, বৰঞ্চ ৰোগৰ মূল কাৰণ বিচাৰি উলিওৱাটোও অতি প্ৰয়োজনীয়।
নেচনেল ইনষ্টিটিউট অৱ হেল্থৰ মতে ডায়েবেটিছ হঠাতে নহয়। ইয়াৰ আগতে শৰীৰে আমাক বহুতো সংকেত দিয়ে। সমস্যাটো হ‘ল এই সংকেতসমূহ প্ৰায়ে সাধাৰণ ছুগাৰ টেষ্টত ধৰা নপৰে। যদি আপোনাৰ পেটৰ চাৰিওফালে চৰ্বি বাঢ়িছে, ফেটি লিভাৰৰ সমস্যা আছে বা শৰীৰত ইনচুলিন ৰেজিষ্টেন্স বাঢ়িছে, তেন্তে এয়া ভৱিষ্যতে ডায়েবেটিছ হোৱাৰ ডাঙৰ সংকেত হ’ব পাৰে। কিন্তু ফাষ্টিং ছুগাৰ পৰীক্ষাই বহু সময়ত এই আৰম্ভণিৰ পৰিৱৰ্তনসমূহ ধৰা পেলাব নোৱাৰে।
মুম্বাইৰ চিকিৎসক ডাঃ ৰাজীৱ কোভিলৰ মতে, ফেটি লিভাৰক এতিয়া ইনচুলিন ৰেজিষ্টেন্সৰ আৰম্ভণিৰ সংকেত বুলি গণ্য কৰা হয়। আনহাতে, শৰীৰৰ ভিতৰত অংগসমূহৰ চাৰিওফালে জমা হোৱা চৰ্বিয়েও ডায়েবেটিছৰ আশংকা বৃদ্ধি কৰে। সেইবাবেই এতিয়া চিকিৎসকসকলে কেৱল মানুহৰ ওজন চোৱাৰ পৰিৱৰ্তে শৰীৰৰ গঠন আৰু মেটাবলিক স্বাস্থ্যৰ ওপৰত অধিক গুৰুত্ব দিবলৈ লৈছে।
বৰ্তমান সময়ত এনে বহুতো উন্নত পৰীক্ষা উপলব্ধ আছে যিয়ে ডায়েবেটিছৰ আশংকা আগতেই ধৰা পেলাব পাৰে। কন্টিনিউৱাছ গ্লুক‘জ মনিটৰিং হৈছে এটা সৰু চেন্সৰ যিয়ে গোটেই দিনটো ছুগাৰৰ উঠা-নমাৰ ওপৰত চকু ৰাখে। ইয়াৰ দ্বাৰা ৰাতি বা খোৱাৰ পিছত ছুগাৰ বৃদ্ধি পোৱাৰ কথাও জানিব পৰা যায়। হোমা-আই আৰ টেষ্টে শৰীৰত ইনচুলিন ৰেজিষ্টেন্স ধৰা পেলায়, যিটো ডায়েবেটিছ হোৱাৰ বহু বছৰ আগৰ পৰাই বাঢ়িবলৈ আৰম্ভ কৰিব পাৰে।
মেয়‘ ক্লিনিকৰ এক প্ৰতিবেদন অনুসৰি ডায়েবেটিছক কেৱল ছুগাৰৰ বেমাৰ বুলি ভবাটো এতিয়া পুৰণি ধাৰণা হৈ পৰিছে। এইটো সম্পূৰ্ণৰূপে আমাৰ মেটাবলিক স্বাস্থ্যৰ সৈতে জড়িত এক সমস্যা। যদি আপোনাৰ পৰিয়ালত ডায়েবেটিছৰ ইতিহাস আছে, পেটৰ চাৰিওফালে চৰ্বি বাঢ়িছে বা ফেটি লিভাৰৰ সমস্যা আছে, তেন্তে কেৱল নৰ্মেল ছুগাৰ ৰিপ’ৰ্ট চাই নিশ্চিন্ত হৈ নাথাকিব। প্ৰয়োজন অনুসৰি চিকিৎসকৰ পৰামৰ্শ লৈ উন্নত পৰীক্ষা কৰাওক। মনত ৰাখিব, এই লেখাত দিয়া তথ্যসমূহ কেৱল সজাগতা সৃষ্টিৰ বাবেহে দিয়া হৈছে, যিকোনো স্বাস্থ্যজনিত সিদ্ধান্তৰ বাবে চিকিৎসকৰ পৰামৰ্শ লোৱাটো অতি প্ৰয়োজনীয়।
