কৰোনা আৰু মাংকিপক্সৰ পাছত এইবাৰ বিশ্বজুৰি ঘাতক ইবোলা ভাইৰাছে নতুনকৈ আতংকৰ সৃষ্টি কৰিছে। ডেমক্ৰেটিক ৰিপাব্লিক অৱ কংগো আৰু উগাণ্ডাত ইবোলা ভাইৰাছৰ ভয়াৱহ প্ৰাদুৰ্ভাৱৰ বাবে বিশ্ব স্বাস্থ্য সংস্থাই ইয়াক আন্তঃৰাষ্ট্ৰীয় স্বাস্থ্য জৰুৰী অৱস্থা হিচাপে ঘোষণা কৰিছে। এই পৰিস্থিতিত ভাৰতত যাতে কোনো কাৰণতে এই মাৰাত্মক ভাইৰাছৰ সংক্ৰমণ বিয়পিব নোৱাৰে তাৰ বাবে সোমবাৰে দেশৰ অসামৰিক বিমান চলাচল নিয়ন্ত্ৰক সংস্থা ডিজিসিএয়ে সকলো বিমান কোম্পানীৰ বাবে এক কঠোৰ নিৰ্দেশনা জাৰি কৰিছে। কেন্দ্ৰীয় স্বাস্থ্য আৰু পৰিয়াল কল্যাণ মন্ত্ৰালয়ৰ নিৰ্দেশনা মানি যোৱা বাইশ মে’ তাৰিখে জাৰি কৰা এক আদেশত কোৱা হৈছে যে কংগো আৰু উগাণ্ডাৰ সীমান্তৱৰ্তী দেশবোৰতো এই ৰোগ বিয়পাৰ আশংকা অতি বেছি। সেয়েহে ভাৰতৰ সুৰক্ষা সুনিশ্চিত কৰিবলৈ এই পদক্ষেপ গ্ৰহণ কৰা হৈছে।
ডিজিসিএৰ নতুন নিৰ্দেশনা অনুসৰি উগাণ্ডা বা কংগোৰ পৰা পোনপটীয়াকৈ বা অন্য দেশৰ মাজেৰে ভাৰতলৈ অহা সকলো বিমানৰ ক্ষেত্ৰত বিশেষ নিয়ম প্ৰযোজ্য হ’ব। সেই আক্ৰান্ত দেশসমূহৰ পৰা অহা সকলো যাত্ৰীয়ে ভাৰতত নমাৰ আগতে বাধ্যতামূলকভাৱে এখন স্ব-ঘোষণা পত্ৰ পূৰণ কৰিব লাগিব। ইয়াৰ লগতে আকাশমাৰ্গত বিমান চলি থকাৰ সময়ত বিমানৰ কৰ্মীসকলক ইবোলাৰ লক্ষণ আৰু ইয়াৰ প্ৰতিকাৰৰ বিষয়ে যাত্ৰীসকলক অৱগত কৰিবলৈ বিশেষ ঘোষণা কৰিবলৈ কোৱা হৈছে।
ঘোষণাত যাত্ৰীসকলক জনোৱা হ’ব যে যদি কোনো যাত্ৰীৰ জ্বৰ, অত্যাধিক ভাগৰ, পেশীৰ বিষ, মূৰৰ বিষ, ডিঙিৰ বিষ, বমি, ডায়েৰিয়া বা শৰীৰত ৰেচ ওলোৱা আদি লক্ষণ থাকে তেন্তে তেওঁলোকে লগে লগে বিমানৰ কৰ্মীসকলক জনাব লাগিব। লগতে ভাৰতত উপস্থিত হোৱাৰ একৈশ দিনৰ ভিতৰত যদি কোনো যাত্ৰীৰ দেহত এনে লক্ষণ দেখা যায়, তেন্তে তেওঁক লগে লগে চিকিৎসালয়লৈ গৈ স্বাস্থ্য পৰীক্ষা কৰাবলৈ নিৰ্দেশ দিয়া হৈছে।
যদি কোনো আন্তঃৰাষ্ট্ৰীয় বিমানত যাত্ৰা কৰা অৱস্থাত কোনো যাত্ৰীৰ দেহত ইবোলাৰ লক্ষণ ফুটি উঠে তেন্তে সংক্ৰমণ ৰোধ কৰিবলৈ বিমান কোম্পানীসমূহে নিৰ্দিষ্ট কিছুমান নিয়ম মানি চলিব লাগিব। অসুস্থ যাত্ৰীগৰাকীৰ চোৱাচিতা কৰিবলৈ কেৱল এজন নিৰ্দিষ্ট কৰ্মীক দায়িত্ব দিব লাগিব আৰু আন কোনো তেওঁৰ সংস্পৰ্শলৈ আহিব নোৱাৰিব। আক্ৰান্ত যাত্ৰীগৰাকীক আন যাত্ৰীৰ পৰা আঁতৰাই বিমানৰ একেবাৰে পিছফালৰ শাৰীলৈ লৈ যাব লাগিব। সন্দেহযুক্ত আক্ৰান্ত যাত্ৰীগৰাকীৰ সন্মুখৰ, পিছফালৰ আৰু কাষৰ তিনিখনকৈ আসন পাৰিলে খালী ৰাখিব লাগিব। সেই যাত্ৰীগৰাকীৰ ব্যৱহাৰৰ বাবে বিমানৰ এটা নিৰ্দিষ্ট শৌচাগাৰ আবণ্টন কৰিব লাগিব যিটো আন কোনেও ব্যৱহাৰ নকৰে। আক্ৰান্ত যাত্ৰীগৰাকীক মাস্ক আৰু পিপিই কিট দিব লাগিব আৰু তেওঁৰ ওচৰত বহা যাত্ৰীসকলক উন্নত মানৰ মাস্ক প্ৰদান কৰিব লাগিব। ভাৰতৰ মাটিত বিমানখন অৱতৰণ কৰাৰ লগে লগে গোটেই বিমানখন সম্পূৰ্ণৰূপে বীজাণুমুক্ত কৰিব লাগিব।
বিমান অৱতৰণ কৰাৰ পাছত পাইলট বা কৰ্মীসকলে সেই সন্দেহযুক্ত যাত্ৰীগৰাকীৰ আসন নম্বৰ, লক্ষণ আৰু তেওঁৰ কাষত বহা যাত্ৰীসকলৰ বিৱৰণ বিমানবন্দৰৰ স্বাস্থ্য বিভাগক অৰ্পণ কৰিব লাগিব যাতে পৰৱৰ্তী একৈশ দিন তেওঁলোকৰ ওপৰত নজৰ ৰাখিব পৰা যায়। সকলো আন্তঃৰাষ্ট্ৰীয় বিমানতে পৰ্যাপ্ত পৰিমাণৰ প্ৰাথমিক চিকিৎসাৰ সামগ্ৰী, পিপিই কিট, মাস্ক আৰু ছেনিটাইজাৰ ৰখাৰ নিৰ্দেশ দিয়া হৈছে। ইপিনে এই আন্তঃৰাষ্ট্ৰীয় স্বাস্থ্য সংকটৰ মাজত ভাৰতৰ বাবে সকাহৰ খবৰ এয়াই যে দেশত এতিয়ালৈকে ইবোলা ভাইৰাছত আক্ৰান্ত কোনো ৰোগী পোৱা হোৱা নাই। সোমবাৰে কেন্দ্ৰীয় স্বাস্থ্যমন্ত্ৰী জে পি নাড্ডাই দেশৰ সামগ্ৰিক প্ৰস্তুতি আৰু নিৰীক্ষণ ব্যৱস্থাৰ এক পৰ্যালোচনা বৈঠক সম্পন্ন কৰে। চৰকাৰী সূত্ৰই জনোৱা মতে ভাৰতৰ সকলো আন্তঃৰাষ্ট্ৰীয় বিমানবন্দৰ আৰু বন্দৰত যাত্ৰীসকলৰ স্বাস্থ্য পৰীক্ষাৰ ব্যৱস্থা কৰা হৈছে আৰু আফ্ৰিকাৰ পৰা অহা যাত্ৰীসকলৰ ওপৰত বিশেষ নজৰ ৰখা হৈছে।
