কংগ্ৰেছ নেতা ৰাহুল গান্ধীয়ে ‘ভোট প্ৰৱঞ্চনা’ক লৈ এক নতুন বিস্ফোৰক অভিযোগ উত্থাপন কৰিছে। তেওঁ দাবী কৰিছে যে কৰ্ণাটকৰ আলণ্ড বিধানসভা সমষ্টিত ‘ভোট প্ৰৱঞ্চনা’ৰ ৬০০০ চেষ্টা কৰা হৈছিল। প্ৰথম অৱস্থাত নিৰ্বাচন আয়োগে ৰাহুলগান্ধীৰ অভিযোগ খাৰিজ কৰিছিল। পিছত এই অভিযোগ আয়োগে আংশিকভাৱে গ্ৰহণ কৰে। এতিয়া এই সমস্যাৰ প্ৰতিকাৰৰ ব্যৱস্থা লোৱা হৈছে।
এতিয়াৰ পৰা যদি আপুনি অনলাইনযোগে ভোট ডিলিট কৰিব বিচাৰে, ভোট পঞ্জীয়ন কৰিব বিচাৰে বা কোনো ধৰণৰ সংশোধন কৰিব বিচাৰে তেন্তে ই-চহী কৰাটো বাধ্যতামূলক। ইয়াৰ লগতে বাধ্যতামূলক আধাৰ কাৰ্ড সংযুক্ত ফোন নম্বৰো প্ৰয়োজন। ইয়াৰ পূৰ্বে অনলাইনযোগে আপোনাৰ ভোট ডিলিট বা শুধৰণিৰ বাবে আবেদন কৰিবলৈ কেৱল ইপিআইচিৰ সৈতে লিংক কৰা ফোন নম্বৰৰ প্ৰয়োজন আছিল। সেই ফোন নম্বৰৰ কোনো ভেৰিফিকেচন হোৱা নাছিল। সোমবাৰলৈকে আয়োগৰ এপ বা ৱেবছাইটত ভোটাৰ কাৰ্ড শুধৰণি বা মচি পেলাবলৈ ই-চহীৰ প্ৰয়োজন নাছিল। মঙলবাৰৰ পৰা এই নিয়ম কাৰ্যকৰী হৈ।
আমোদজনক কথাটো হ’ল, যদিও ৱেবছাইটটো আপডেট কৰা হৈছে, এই সন্দৰ্ভত আয়োগে কোনো জাননী জাৰি কৰা হোৱা নাই। অৰ্থাৎ আয়োগে মনে মনে ভোট ডিলিট কৰাৰ প্ৰক্ৰিয়াটো পূৰ্বতকৈ অধিক সুৰক্ষিত কৰি তুলিছে। কংগ্ৰেছে দাবী কৰিছে যে আয়োগৰ এই পৰিৱৰ্তন ৰাহুল গান্ধীয়ে আলণ্ড বিধানসভা সমষ্টিত ভোটৰ ৰিগিংৰ অভিযোগ উত্থাপন কৰাৰ পিছতহে আহিছে। এই সন্দৰ্ভত ছ’চিয়েল মিডিয়াতো আয়োগক সমালোচনা কৰিছে স্বয়ং ৰাহুলে।
আয়োগে পূর্বে উল্লেখ কৰিছিল যে আলণ্ড বিধানসভা সমষ্টিত ভোটাৰৰ নাম বাদ পৰাৰ কিছু বিফল প্রচেষ্টা চলিছে৷ এই বিষয়টোৰ তদন্তৰ বাবে নির্বাচন আয়োগে নিজেই এফআইআৰ দাখিল কৰিছে৷ অৱশ্যে কংগ্ৰেছে অভিযোগ কৰিছে যে আয়োগে এতিয়ালৈকে তদন্তত সহযোগ কৰা নাই।
