বিত্তীয় জালিয়াতিৰ গোচৰত গ্ৰেপ্তাৰ কৰা হৈছে জেট এয়াৰৱেজৰ প্ৰতিষ্ঠাপক ৭৪ বছৰীয়া নৰেশ গোৱেলক। শুকুৰবাৰে এনফ’ৰ্চমেন্ট ডিৰেক্টৰেট (ইডি)-য়ে তেওঁক গ্ৰেপ্তাৰ কৰে। তেওঁৰ বিৰুদ্ধে ৫৩৮ কোটি টকাৰ বিত্তীয় জালিয়াতিৰ অভিযোগ উত্থাপন হৈছে। সূত্ৰ অনুসৰি এই বিত্তীয় কেলেংকাৰী কানাড়া বেংকৰ সৈতে সংঘটিত হৈছে।
ইডিৰ সূত্ৰ অনুসৰি, শুকুৰবাৰে নিশা মুম্বাইৰ পৰা গ্ৰেপ্তাৰ কৰা হয় নৰেশ গোৱেলক। দীৰ্ঘদিনীয়া জেৰাৰ অন্তত তেওঁক বিত্তীয় জালিয়াতি প্ৰতিৰোধ আইনৰ অধীনত গ্ৰেপ্তাৰ কৰা হয়।
আজি তেওঁক পিএমএলএৰ বিশেষ আদালতত হাজিৰ কৰা হ’ব। ইডিয়ে জিম্মাত লোৱাৰ বাবে আবেদন কৰিব বুলি জানিব পৰা গৈছে।
লগতে পঢ়ক: শিলসাঁকোৰ নগ্ন প্ৰতিবাদক লৈ তীব্ৰ সমালোচনাৰ সন্মুখীন হিমন্ত বিশ্ব শৰ্মা নেতৃত্বাধীন ৰাজ্য চৰকাৰ
বাতৰি মতে, জেট এয়াৰৱেজৰ প্ৰতিষ্ঠাপক নৰেশ গোৱেল, তেওঁৰ পত্নী অনিতা গোৱেল আৰু কোম্পানীটোৰ কেইবাগৰাকীও প্ৰাক্তন কাৰ্যবাহীৰ বিৰুদ্ধে বিত্তীয় জালিয়াতিৰ অভিযোগত এফআইআৰ দাখিল কৰা হৈছিল। তেওঁলোকৰ বিৰুদ্ধে কানাড়া বেংকক ৫৩৮ কোটি টকা প্ৰতাৰণা কৰাৰ অভিযোগ অনা হয়।
এফআইআৰ অনুসৰি কানাড়া বেংকে জেট এয়াৰৱেজক ৮৪৮.৮৬ কোটি টকাৰ ঋণ আৰু ক্ৰেডিট লিমিট প্ৰদান কৰে। ইয়াৰে ৫৩৮.৬২ কোটি টকাই পৰিশোধ কৰিবলৈ বাকী আছে।
লগতে পঢ়ক: হিংসা শাম কটা নাই মণিপুৰত! ২৯ আগষ্টৰ পৰা তিনি দিনত নিহত ৮ জন, আহত ২৯জন
২০২১ চনৰ জুলাই মাহত চিবিআইয়ে এই বিত্তীয় প্ৰতাৰণাক জালিয়াতি বুলি ঘোষণা কৰিছিল। ইয়াৰ উপৰিও কানাড়া বেংকে অভিযোগ উত্থাপন কৰে যে জেট এয়াৰৱেজ কোম্পানীয়ে ধনৰ অপব্যৱহাৰ কৰি বিভিন্ন শাখা প্ৰতিষ্ঠানক ১৪১০ কোটি টকা দিয়া হৈছিল। সংস্থাটোৰ কৰ্মচাৰীসকলৰ দৰমহা, ফোন বিল পৰিশোধ, গাড়ীৰ খৰচো জেট এয়াৰৱেজৰ ধনেৰে আদায় দিয়া হয়।
