আবকাৰী দুৰ্নীতিৰ গোচৰত ১৫ দিনৰ বাবে তিহাৰ কাৰাগাৰলৈ প্ৰেৰণ কৰা হৈছে দিল্লীৰ মুখ্যমন্ত্ৰী অৰবিন্দ কেজৰিৱালক। সোমবাৰে আদালতে এই নিৰ্দেশ প্ৰদান কৰিছে।
এই নিৰ্দেশৰ পিছতে ৰামায়ণ-গীতা পঢ়াৰ ইচ্ছা প্ৰকাশ কৰিছে অৰবিন্দ কেজৰিৱালে।
উল্লেখ্য যে অৰবিন্দ কেজৰিৱালৰ ইডিৰ জিম্মা আজি অন্ত পৰিল। আজি ইডিয়ে আদালতত কেজৰিৱালৰ জিম্মা বিচৰা নাছিল। বৰঞ্চ জেলে জিম্মাত লোৱাৰ বাবে আবেদন জনাইছিল।
ইডিৰ অধিবক্তাই আদালতত কয় যে কেজৰিৱালে তদন্তত সহযোগ কৰা নাই। প্ৰায় সকলো প্ৰশ্নৰ উত্তৰ দিয়াৰ পৰা বিৰত আছে। আনহাতে মোবাইলৰ পাছৱৰ্ডো দিয়া নাই কেজৰিৱালে।
ইফালে কেজৰিৱালে এই গ্ৰেপ্তাৰ অবৈধ বুলি দাবী কৰে। তেওঁ কয় যে তেওঁৰ বিৰুদ্ধে ষড়যন্ত্ৰ ৰচনা কৰা হৈছে।
সদ্যহতে তিহাৰ কাৰাগাৰতে থাকিব লাগিব কেজৰিৱাল। আদালতে কেজৰিৱালক পত্নী সুনীতা কেজৰিৱাল, আপ নেতা আতিশী আৰু সৌৰভ ভৰদ্বাজক সাক্ষাৎ কৰিবলৈও অনুমতি প্ৰদান কৰিছে।
অৱশ্যে কাৰাগাৰৰ জিম্মাত থকা অৱস্থাত কেজৰিৱালে কেইবাটাও সামগ্ৰী বিচাৰিছিল। তাৰ ভিতৰত আছিল ৰামায়ণ, গীতা আৰু ‘প্ৰধানমন্ত্ৰীয়ে কেনেকৈ সিদ্ধান্ত লয়’ এই ৩ খন গ্ৰন্থ।
আনহাতে, এই গ্ৰেপ্তাৰৰ বিৰুদ্ধে কেজৰিালে দিল্লী উচ্চ ন্যায়ালয়ত আবেদন জনাইছে। তদন্তকাৰী সংস্থাটোৱে তেওঁৰ মৌলিক অধিকাৰ খৰ্ব কৰা বুলি দাবী কৰিছে কেজৰিৱালে। কাইলৈৰ ভিতৰত এই গ্ৰেপ্তাৰৰ প্ৰত্যুত্তৰ দিবলৈ দিল্লী উচ্চ ন্যায়ালয়ে নিৰ্দেশ প্ৰদান কৰিছে ইডিক।
অহা ৩ এপ্ৰিলত এই গোচৰৰ পৰৱৰ্তী শুনানি গ্ৰহণ কৰিব আদালতে।
