দিল্লীৰ লালকিল্লাৰ সমীপত সংঘটিত বোমা বিস্ফোৰণৰ তদন্তৰ কেন্দ্ৰস্থল হৈ পৰিছে ফৰিদাবাদৰ আল-ফালাহ বিশ্ববিদ্যালয়। আজি পুৱা ৫ বজাৰ পৰা কেন্দ্ৰীয় তদন্তকাৰী সংস্থা এনফৰ্চমেণ্ট ডাইৰেক্টৰেট (ED)-এ বিশ্ববিদ্যালয়ৰ চৌহদ, ট্ৰাষ্টীসকল, সম্পৰ্কিত ব্যক্তি, আৰু প্ৰতিষ্ঠানসমূহত অভিযান আৰম্ভ কৰিছে। একেলগে দিল্লীৰ ওখলা আৰু জামিয়া নগৰসহ ২৫টা স্থানত ইডিয়ে তালাচী চলাইছে।
বিশ্ববিদ্যালয়খনৰ বিৰুদ্ধে আৰ্থিক অনিয়মৰ গুৰুতৰ অভিযোগ উত্থাপিত হৈছে। ইডিয়ে ইয়াৰ পুঁজিৰ উৎস আৰু লেনদেনৰ তদন্ত আৰম্ভ কৰিছে। সূত্ৰ অনুসৰি, বিস্ফোৰণৰ কেইবাটাও সন্দেহভাজন অভিযুক্ত বিশ্ববিদ্যালয়খনৰ সৈতে জড়িত থকাৰ সন্দেহ প্ৰকাশ পাইছে। তদন্তকাৰীসকলে প্ৰতিষ্ঠানটোৰ তথ্য, বিত্তীয় লেনদেন আৰু প্ৰশাসনিক অনুমোদনসমূহ পৰীক্ষা কৰিছে, যাতে সন্ত্ৰাসবাদী কাৰ্যকলাপৰ সৈতে যিকোনো যোগাযোগ পোৱা যায়।
অধ্যক্ষ জাভেদ আহমেদ ছিদ্দিকীক চমন:
দিল্লী আৰক্ষীয়ে ইতিমধ্যে আল-ফলাহ বিশ্ববিদ্যালয়ৰ অধ্যক্ষ জাভেদ আহমেদ ছিদ্দিকীক দুবাৰকৈ চমন জাৰি কৰিছে। অধ্যক্ষৰ বক্তব্যত প্ৰতিষ্ঠানৰ কাৰ্যকলাপ আৰু সম্পৰ্কিত ব্যক্তিৰ কাম-কাজত বহুত বিসংগতি পোৱা গৈছে, যাৰ ফলত এই চমন জাৰি কৰা হৈছে। আৰক্ষীৰ সূত্ৰ মতে, এই চমন বিস্ফোৰণৰ ব্যাপক তদন্তৰ অংশ। অভিযুক্তসকলৰ একাংশ বিশ্ববিদ্যালয়খনৰ সৈতে জড়িত আছিল।
দিল্লী আৰক্ষীয়ে বিশ্ববিদ্যালয়খনৰ বিৰুদ্ধে আৰ্থিক আৰু প্ৰশাসনিক অনিয়মৰ জালিয়াতিৰ দুটাকৈ গোচৰ (FIR) ৰুজু কৰিছে।
অবৈধ নিৰ্মাণৰ নতুন অভিযোগ:
বিস্ফোৰণ তদন্তৰ লগতে আল-ফলাহ বিশ্ববিদ্যালয়ৰ সম্প্ৰসাৰণত ব্যাপক নিয়মভংগ কৰাৰ অভিযোগ উত্থাপিত হৈছে। তদন্তকাৰী সংস্থাসমূহে সন্দেহ প্ৰকাশ কৰিছে যে অনুমোদন নথকা কেইবাটাও নিৰ্মাণ কাৰ্য সম্পন্ন হৈছে। সেয়ে প্ৰশাসনে তদন্ত প্ৰক্ৰিয়া অধিক কঠোৰ কৰি তুলিছে। সূত্ৰ অনুসৰি, শীঘ্ৰেই বিশ্ববিদ্যালয়খন পৰিদৰ্শন কৰি অবৈধ নিৰ্মাণসমূহ ভাঙি পেলাব পাৰে।
এতিয়া প্ৰশাসনৰ পৰৱৰ্তী পদক্ষেপৰ ওপৰত সকলোৰে দৃষ্টি নিবদ্ধ হৈ আছে।
