ৰণবীৰ কাপুৰৰ পিছত এইবাৰ কপিল শৰ্মা, হুমা কুৰেশী, হিনা খান। বলীউডৰ ডাঙৰ ডাঙৰ তাৰকালৈ প্ৰেৰণ কৰা হৈছে চমন। মহাদেৱ বেটিং এপৰ তদন্তত এই তিনি তাৰকাক এনফৰ্চমেন্ট ডাইৰেক্টৰেটে (ইডি) চমন জাৰি কৰিছে।
বুধবাৰে অভিনেতা ৰণবীৰ কাপুৰক ইডিৰ কাৰ্যালয়লৈ মতা হয়। তেওঁ আছিল মহাদেৱ বেটিং এপৰ ‘মুখ’। বিত্তীয় লেনদেনৰ সৈতে জড়িত তথ্য জানিবলৈ ৰণবীৰক মতা হৈছিল। অৱশ্যে ৰণবীৰ কাপুৰ উপস্থিত নহ’ল। এতিয়া কপিল শৰ্মা, হুমা কুৰেশী আৰু হিনা খানলৈ চমন প্ৰেৰণ কৰা হৈছে।
জানিব পৰা মতে, মহাদেৱ বেটিং এপৰ সৈতে জড়িত আছিল কপিল শৰ্মা, হুমা কুৰেশী, হিনা খান। তেওঁলোকৰ মাজতো বৃহৎ পৰিমাণৰ আৰ্থিক লেনদেন সংঘটিত হৈছে। ইডিৰ সূত্ৰ অনুসৰি হুমা কুৰেশী আৰু হিনা খানে মহাদেৱ বেটিং এপৰ প্ৰচাৰ কৰিছিল।
লগতে পঢ়কঃ ছেমি ফাইনেলত বাংলাদেশক বিধ্বস্ত কৰি এছিয়ান গেমছৰ ক্ৰিকেটত সোণৰ পদকৰ দৌৰত ভাৰত
আনহাতে, বিগত বৰ্ষৰ ছেপ্টেম্বৰ মাহত ডুবাইত মহাদেৱ বেটিং এপৰ সফলতাৰ পাৰ্টিত দেখা গৈছিল অভিনেতা কপিল শৰ্মাক। ৪০০ কোটিতকৈ অধিক ধনৰ আৰ্থিক দুৰ্নীতিৰ গোচৰত তেওঁলোক প্ৰত্যক্ষভাৱে জড়িত নেকি সেই বিষয়ে জানিবলৈ ইডিয়ে এই চমন প্ৰেৰণ কৰিছে। তেওঁলোকক কেতিয়া ইডি কাৰ্যালয়ত হাজিৰ হ’বলৈ কোৱা হৈছে সেয়া এতিয়াও জানিব পৰা হোৱা নাই।
ইপিনে, মহাদেৱ বেটিং এপ দুৰ্নীতিৰ গোচৰত বলীউডৰ অভিনেতা ৰণবীৰ কাপুৰকো চমন কৰা হৈছিল। অভিনেতাজনক ব্যক্তিগতভাৱে উপস্থিত হ’বলৈ কোৱা হৈছিল যদিও জানিব পৰা মতে ৰণবীৰে হাজিৰ হ’বলৈ দুসপ্তাহৰ সময় বিচাৰিছে।
লগতে পঢ়কঃ বান বিধ্বস্ত ছিকিমত সন্ধানহীন ভাৰতীয় সেনা জোৱানৰ ভিতৰত আছে অসমৰো এক জোৱান
যোৱা ছেপ্টেম্বৰ মাহত চৰ্চালৈ আহিছিল মহাদেৱ বেটিং চক্ৰৰ দুৰ্নীতি। ইডিয়ে কলকাতাকে ধৰি দেশৰ কেইবাখনো চহৰত তালাচী চলাই ৪১৭ কোটি টকা উদ্ধাৰ কৰে। ইয়াৰ পিছত ইটোৰ পিছত সিটোকৈ অভিনেতাৰ নাম সন্মুখলৈ আহিবলৈ ধৰিলে।
ইডিৰ মতে, ছানী লিয়নীৰ পৰা আৰম্ভ কৰি টাইগাৰ শ্ৰফ, নেহা কক্কৰ, আতিফ আছলাম, ৰাহত ফাতেহ আলী খান, বিশাল দাদলানীলৈকে কেইবাজনো অভিনেতা-গায়ক প্ৰত্যক্ষ বা পৰোক্ষভাৱে জড়িত হৈ আছে।
মহাদেৱ বেটিং চক্ৰৰ ‘মূৰব্বী’ সৌৰভ চন্দ্ৰকাৰৰ বিয়াতো অংশগ্ৰহণ কৰে বলীউডৰ তাৰকাসকলে। ডুবাইত অনুষ্ঠিত হোৱা বিয়াখনে বলীউডৰ যিকোনো তাৰকাৰ বিয়াক পৰাস্ত কৰিলেহেঁতেন। সৌৰভৰ বিয়াত টাইগাৰ শ্ৰফ, ছানি লিয়নী, নেহা কক্কৰ, আতিফ আছলাম, ৰাহত ফাতেহ আলী খান, বিশাল দাদলানী, এলি আব্ৰাহাম, ভাৰতী সিং, ভাগ্যশ্ৰী, কৃতি খাৰবান্দা, নুছৰত ভাৰুচা, কৃষ্ণ অভিষেক, সুখবিন্দৰ সিঙক দেখা গৈছিল।
তেতিয়াই ইডিৰ সূত্ৰই খবৰ দিছিল যে সকলো তাৰকাক সোধা-পোছাৰ বাবে এজন এজনকৈ মাতি অনা হ’ব। বেটিং এপটোৰ সৈতে তেওঁলোকৰ কি সম্পৰ্ক আছিল আৰু সৌৰভৰ বিয়াত অংশগ্ৰহণ কৰিবলৈ তাৰকাসকলে কিমান টকা লাভ কৰিছিল সেই সম্পৰ্কে প্ৰশ্ন কৰা হ’ব।
