ভয়াবহ কোভিড পৰিস্থিতিৰ বাবে আজি পৰ্য্যন্ত অনুষ্ঠিত কৰিব পৰা নগ’ল ৰাজ্যৰ হাইস্কুল শিক্ষান্ত পৰীক্ষাৰ লগতে উচ্চতৰ মাধ্যমিক শিক্ষান্ত পৰীক্ষা। যাৰ বাবে অনিশ্চয়তাত পৰিছিল লাখ লাখ শিক্ষাৰ্থীৰ ভৱিষ্যত।
কিন্তু আজি জনতা ভৱনত অনুষ্ঠিত কৰা এক সংবাদমেলযোগে অতি সোনকালেই মেট্ৰিক আৰু হায়াৰ চেকেণ্ডেৰী পৰীক্ষা অনুষ্ঠিত হ’ব বুলি ঘোষণা কৰে ৰাজ্যৰ শিক্ষামন্ত্ৰী ডাঃ ৰনোজ পেগুৱে।
তেওঁ কয়, ‘খুব সোনকালে পৰীক্ষা অনুষ্ঠিত কৰাৰ বাবে সিদ্ধান্ত লোৱা হ’ব। বিভিন্ন ছাত্ৰ সংগঠন, বুদ্ধিজীৱী আৰু শিক্ষাবিদৰ পৰা মতামত গ্ৰহণ কৰা হৈছে।‘
আজি বিয়লি ৪:৩০ বজাৰ পৰা পৰীক্ষা অনুষ্ঠিত কৰাৰ সন্দৰ্ভত সিদ্ধান্ত লোৱা প্ৰক্ৰিয়া আৰম্ভ হৈছে বুলি তেওঁ সংবাদমেলত জনায়।
এদিন বা দুদিনৰ ভিতৰতে সিদ্ধান্ত লোৱা প্ৰক্ৰিয়া সম্পন্ন হ’ব বুলি তেওঁ জনায়।
অৱশ্যে পৰীক্ষা কেনেধৰণে বা কি পদ্ধতিত অনুষ্ঠিত কৰিব সেই সম্পৰ্কত কোনো ধৰণৰ মন্তব্য প্ৰকাশ নকৰিলে শিক্ষা মন্ত্ৰী পেগুৱে।
এতিয়া পৰীক্ষাৰ্থীসকল সাজু হ’বৰ হ’ল কিয়নো পৰীক্ষা অনুষ্ঠিত হোৱাৰ ১৫ দিন পূৰ্বেহে পৰীক্ষাৰ সময়সূচী আৰু তাৰিখ ঘোষণা কৰিব ৰাজ্যৰ শিক্ষাবিভাগে।