শিক্ষা বিভাগৰ পুনৰ দায়িত্ব লোৱাৰ পাছত শিক্ষা মন্ত্ৰী হিচাপে আজি প্ৰথমখন সংবাদমেল সম্বোধন কৰে মন্ত্ৰী হিমন্ত বিশ্ব শৰ্মাই। জনতা ভৱনৰ চি এম ব্লকত হোৱা এই সংবাদমেলত শিক্ষা বিভাগৰ কেইবাটাও গুৰুত্বপূৰ্ণ ঘোষণা কৰে মন্ত্ৰীগৰাকীয়ে।
মন্ত্ৰীগৰাকীয়ে কয় যে ৯৬৩৫ টা নিয়মীয়া প্ৰাথমিক শিক্ষক পদৰ বিজ্ঞাপন ওলাল। এপ্ৰিল মে’ ৰ ভিতৰত এই সংখ্যা ১৫ হাজাৰ হ’বগৈ।
ফেব্ৰুৱাৰি মাহৰ ভিতৰত মাধ্যমিক টেটৰ ফলাফল ঘোষণা কৰা হ’ব। বহাগ বিহুৰ আগত ৬০০০ মাধ্যমিক শিক্ষকক নিযুক্তি দিয়া হ’ব। পাছলৈ এই সংখ্যা ৮০০০ লৈ বৃদ্ধি কৰা হ’ব।
১০ জনতকৈ বেছি শিক্ষাৰ্থীয়ে মেট্ৰিক দিব নোৱাৰা বিদ্যালয়ক ওচৰৰ বিদ্যালয়ৰ লগত সংলগ্ন কৰা হ’ব, তেতিয়া শিক্ষকৰ সমস্যা নাইকিয়া হ’ব।
এপ্ৰিল মে’ মাহৰ ভিতৰত শিক্ষকৰ ৯০ শতাংশ সমস্যাই সমাধান হ’ব।
অহা ১৫ আগষ্টৰ ভিতৰত আইনৰ গণ্ডিত থকা ৪৯৯৩ খন বিদ্যালয় প্ৰাদেশীকৰণ, ১৩৩৬২ জন প্ৰাথমিক আৰু মধ্য ইংৰাজী বিদ্যালয়ৰ শিক্ষকৰ প্রাদেশীকৰণ হ’ব।
১৫ আগষ্টৰ ভিতৰতে প্ৰায় ৬২৬ খন হাইস্কুল প্ৰাদেশীকৰণ কৰা হ’ব আৰু প্ৰায় ৪৮২৮ জন শিক্ষকৰ চাকৰি প্ৰাদেশীকৰণ হ’ব।
৩০ খন নতুন মহাবিদ্যালয় প্ৰাদেশীকৰণ কৰাৰ লগতে সেই মহাবিদ্যালয়ৰ ৯০০ শিক্ষকৰ চাকৰি প্ৰাদেশীকৰণ হ’ব।
৭৬৮ জন DROP OUT শিক্ষকক UGC স্কেলত আনি চাকৰি নিয়মীয়াকৰণ কৰা হ’ব।
তেওঁ জানিবলৈ দিয়ে যে ৰাজ্যৰ বিভিন্ন মহাবিদ্যালয়ত ৬০০ শিক্ষক পদ খালী হৈ আছে। এতিয়াৰে পৰা পোনপটীয়াকৈ অধক্ষ্যই শিক্ষক পদৰ বাবে বিজ্ঞাপন দিব পাৰিব।
৫৮০০ ঠিকাভিত্তিক হাইস্কুল শিক্ষকক নিয়মীয়া শিক্ষকৰ সমহাৰত দৰমহা , DA, ৬০ বছৰলৈকে চাকৰিৰ নিৰাপত্তা, অন্যান্য সুবিধা সামৰি অহা ৪ মাৰ্চত দাখিল কৰা বাজেটত এখন আঁচনি অন্তৰ্ভুক্ত কৰা হ’ব।
ষ্টেট পুলত কাম কৰা সকলকো নিয়মীয়া শিক্ষকৰ সুবিধাসমূহ সমহাৰত লাভ কৰিব পৰাকৈ বাজেটত এখন আঁচনি অন্তৰ্ভুক্ত কৰা হ’ব।
আনহাতে, কম্পিউটাৰ শিক্ষকৰ সুবিধা সমূহ বৃদ্ধি কৰা হ’ব। লগতে ৰাজ্যৰ বিদ্যালয়সমূহত অসমীয়া বিষয় বাধ্যতামূলক কৰা হ’ব।
মন্ত্ৰীগৰাকীয়ে লগতে জনায় যে নিযুক্তি প্ৰক্ৰিয়া চলি থকা সময়ত শিক্ষকৰ বদলিকৰণৰ কাম হাতত লোৱা নহয়। কোনো শিক্ষক সন্থাৰ লোকক নিযুক্তি প্ৰক্ৰিয়া চলি থকা সময়ত সাক্ষাৎ কৰা নহ’ব, কাহিলিপাৰা, দিছপুৰলৈ কোনো আহিব নালাগে। অহা ৭ দিনৰ ভিতৰত এটা ই-মেইল আৰু ৱেবচাইট মুকলি কৰা হ’ব য’ত স্মাৰক পত্ৰ দিব পাৰিব বা পৰামৰ্শ প্ৰদান কৰিব লাগিব।
বিদ্যালয় কৰ্তৃপক্ষ আৰু SMDC ৰ জৰিয়তে ইউনিফৰ্ম যোগান ধৰা হ’ব। এইবছৰৰ পৰা চাৰিজোৰ ইউনিফৰ্ম পাব। প্ৰথম শ্ৰেণীৰ পৰা অষ্টম শ্ৰেণীলৈকে দিয়া হ’ব ইউনিফৰ্ম। তিনিযোৰ গতানুগতিক আৰু এযোৰ স্পৰ্টিং, পেন্ট বা স্কাৰ্ট হ’ব।
উচ্চ ন্যায়ালয়ত গোচৰ চলি থকা বাবে এবছৰ ইউনিফৰ্ম যোগান বন্ধ হৈ আছিল বুলিও তেওঁ কয়। ৰাজ্য চৰকাৰৰ স্ব অগ্ৰাধিকাৰ বাজেটৰ পৰা ৪৯৪ কোটি টকা SMDC ক দিয়া হৈছে। প্ৰতিযোৰ ইউনিফৰ্মৰ বাবদ ৩০০ টকা দিয়া হ’ব।
নৱম-দশম শ্ৰেণীৰ ছাত্ৰ-ছাত্ৰীক দুযোৰ ইউনিফৰ্ম দিয়া হ’ব। এই দুই শ্ৰেণীৰ বাবে এযোৰ ইউনিফৰ্মৰ বাবদ ৩৫০ টকা ধৰা হৈছে।
অহা ৩ ফেব্ৰুৱাৰিৰ পৰা ৬ মাহৰ ভিতৰত এই কামসমূহ সম্পূৰ্ণ কৰা হ’ব। সমগ্ৰ কামৰ বাবদ ৩০০০ কোটি টকা ধাৰ্য্য কৰা হ’ব।