ৰাজ্য চৰকাৰে অহা ছেপ্টেম্বৰ মাহৰ পৰা ৰাজ্যৰ শিক্ষানুষ্ঠানসমূহ পুনৰ খোলাৰ পৰিকল্পনা কৰিছে বুলি শিক্ষা মন্ত্ৰী হিমন্ত বিশ্ব শৰ্মাই কয়।
তেওঁ সোমবাৰে কয় যে অসমত ক’ৰ’নাৰ সংক্রমণ লাহে লাহে নিয়ন্ত্রণলৈ আহিছে৷ বিগত কিছু দিনৰ পৰা ৰাজ্যত আক্রান্ত হোৱা লোকতকৈ সুস্থ হোৱা লোকৰ সংখ্যা বৃদ্ধি পাবলৈ আৰম্ভ কৰিছে৷
আগষ্ট মাহৰ শেষৰফালে ক’ৰ’নাৰ সংক্ৰমণৰ হাৰ কমিব আৰু তাৰ পিছত ছেপ্তেম্বৰ মাহৰ পৰা ৰাজ্যৰ শিক্ষানুষ্ঠান সমূহ খুলিব পাৰিব বুলি আশা কৰিছে ৰাজ্য চৰকাৰে।
উল্লেখযোগ্য যে সামাজিক সংক্রমণৰ আশংকা কৰা বহু স্থানত ক্রমাৎ আক্রান্তৰ সংখ্যা হ্রাস পাবলৈ আৰম্ভ হৈছে৷ সামাজিক সংক্রমণে ভয়াৱহ ৰূপ ধাৰণ কৰা গুৱাহাটীতো ক্রমাৎ আক্রান্তৰ সংখ্যা হ্রাস পাবলৈ আৰম্ভ হৈছে৷
গুৱাহাটীত আক্ৰান্তৰ সংখ্যা হ্ৰাস পোৱাৰ প্ৰধান আৰু একমাত্ৰ কাৰণ লকডাউন বুলিয়েই মন্তব্য কৰে মন্ত্ৰী শৰ্মাই।
সোমবাৰে জি এম চি এইচৰ প্রেক্ষাগৃহত ১৫০জন লেবৰেটৰী টেকনিচিয়ানক নিযুক্তি পত্র বিতৰণ কৰি মন্ত্রী শৰ্মাই প্রকাশ কৰে যে ক’ৰ’নাৰ বাবে অসমৰ শিক্ষার্থীসকলৰ এটা শিক্ষাবর্ষ নষ্ট হ’বলৈ দিব নোৱাৰি৷ গতিকে চৰকাৰে কি প্রকাৰে পুনৰ শিক্ষানুষ্ঠান খুলিব পাৰে তাৰ পৰিকল্পনা কৰি আছে৷