কণী হৈছে পুষ্টিৰ ভঁৰাল। প্ৰটিন, ভিটামিন আৰু খনিজ পদাৰ্থৰে ভৰপূৰ কণী আমাৰ দৈনন্দিন খাদ্যৰ এক গুৰুত্বপূৰ্ণ অংশ। কিন্তু গৰম দিন অহাৰ লগে লগে বহুতো মানুহৰ মনত এটা প্ৰশ্ন জাগে যে গৰমত কণী খালে শৰীৰ বেছি গৰম হয় নেকি? গৰমৰ দিনত কণী খোৱাটো কমাই দিব লাগে নেকি? পুষ্টিবিদ আৰু চিকিৎসকসকলৰ মতে, সুস্থ মানুহে গৰমৰ দিনত কণী খোৱাক লৈ ভয় কৰাৰ কোনো কাৰণ নাই। বৰঞ্চ সঠিকভাৱে সংৰক্ষণ আৰু ৰান্ধিলে কণী গৰমৰ দিনতো এবিধ নিৰাপদ আৰু উপকাৰী খাদ্য হিচাপে পৰিগণিত হয়।
আমাৰ সমাজত বহুদিন ধৰি এটা ধাৰণা চলি আহিছে যে কণী খালে শৰীৰৰ তাপমাত্ৰা বৃদ্ধি পায়। ইয়াৰ মূল কাৰণ হৈছে কণীত থকা উচ্চ পৰিমাণৰ প্ৰটিন। প্ৰটিন হজম কৰিবলৈ শৰীৰক অলপ বেছি পৰিশ্ৰম কৰিবলগীয়া হয়, যাৰ ফলত সামান্য তাপ উৎপন্ন হয়। কিন্তু বিশেষজ্ঞসকলৰ মতে, এই প্ৰক্ৰিয়াই শৰীৰৰ মূল তাপমাত্ৰা বৃদ্ধি নকৰে আৰু ইয়াৰ ফলত হিটষ্ট্ৰোক বা গৰমৰ লগত জড়িত আন কোনো বেমাৰ নহয়। বহুত সময়ত গৰমৰ দিনত অতিৰিক্ত তেল-মছলাযুক্ত আহাৰ খোৱাৰ পিছত পেটত যি অস্বস্তি অনুভৱ হয়, তাক মানুহে ভুলতে কণীৰ প্ৰভাৱ বুলি ভাবি লয়।
গৰমৰ দিনতো কণী আমাৰ শৰীৰৰ বাবে অতি গুৰুত্বপূৰ্ণ। কণীত উচ্চ মানদণ্ডৰ প্ৰটিন, ভিটামিন বি ১২, ভিটামিন ডি, আইৰণ আৰু স্বাস্থ্যকৰ চৰ্বি থাকে। এই পুষ্টি উপাংশবোৰে পেশীৰ স্বাস্থ্য বজাই ৰখাত, শৰীৰত শক্তি যোগোৱাত আৰু বহু সময়লৈকে পেট ভৰাই ৰখাত সহায় কৰে। গৱেষণাত দেখা গৈছে যে খাদ্যৰ লগত কণী খালে ভোক কমকৈ লাগে, যিয়ে অতিৰিক্ত কেলৰি গ্ৰহণ কৰাত বাধা দিয়ে। ইয়াৰ উপৰিও নিয়মীয়াকৈ আৰু সঠিক পৰিমাণত কণী খালে হৃদৰোগৰ আশংকা বৃদ্ধি পোৱাৰ কোনো প্ৰমাণ পোৱা হোৱা নাই।
বিশেষজ্ঞসকলৰ মতে, গৰমৰ দিনত কণী খোৱাতকৈ বেছি গুৰুত্বপূৰ্ণ কথাটো হ’ল কণী কেনেকৈ সংৰক্ষণ কৰা হৈছে। অত্যাধিক গৰমত বেক্টেৰিয়া অতি সোনকালে বৃদ্ধি পায়। সেয়েহে ফ্ৰীজত নৰখাকৈ বা বহু সময় ধৰি বাহিৰত পেলাই থোৱা কণীৰ পৰা সংক্ৰমণ হোৱাৰ আশংকা থাকে। সেয়ে কণী কিনোতে বাকলি ফাটি আছে নেকি সেয়া লক্ষ্য কৰাটো জৰুৰী। একেদৰে ৰন্ধা কণীৰ আঞ্জা বহু সময় ধৰি বাহিৰৰ সাধাৰণ উষ্ণতাত থৈ নিদিবলৈ পৰামৰ্শ দিয়া হয়।
গৰমৰ দিনত অতিৰিক্ত তেল-মছলা দিয়া খাদ্য বহু মানুহৰ বাবে অস্বস্তিকৰ হ’ব পাৰে। সেয়েহে বেছি তেলত ভজা বা জলা-মছলাযুক্ত কণীৰ সলনি কম তেলত ৰন্ধা কণী খোৱাটো ভাল। সিজোৱা কণী, পচ, কম তেলত বনোৱা অমলেট বা পাচলিত কণী দি বনোৱা আঞ্জা গৰমৰ দিনত বেছি আৰামদায়ক আৰু উপকাৰী। ইয়াৰ ফলত পুষ্টিগুণো অটুট থাকে আৰু হজম কৰিবলৈকো সহজ হয়।
লগতে গৰমৰ সময়ত ঘামৰ জৰিয়তে শৰীৰৰ পৰা বহুত পানী ওলাই যায় বাবে প্ৰটিনযুক্ত খাদ্য খোৱাৰ লগতে পৰ্যাপ্ত পৰিমাণে পানী খোৱাটো অতি প্ৰয়োজনীয়। পানী, বতৰৰ ফলমূল আৰু পানী থকা শাক-পাচলিয়ে শৰীৰটোক সতেজ কৰি ৰখাত সহায় কৰে। সাধাৰণতে সুস্থ মানুহৰ বাবে কণী সম্পূৰ্ণ নিৰাপদ যদিও বৃক্কৰ বেমাৰ বা আন কিবা বিশেষ ৰোগ থকা লোকসকলে কণী খোৱাৰ পৰিমাণৰ বিষয়ে চিকিৎসকৰ পৰামৰ্শ লোৱা উচিত। গৰমত কণী খালে শৰীৰ অত্যাধিক গৰম হয় বা বেমাৰ বাঢ়ে বুলি কোৱা কথাটোৰ কোনো বৈজ্ঞানিক ভিত্তি নাই। কণী সদায় এক সহজলভ্য আৰু পুষ্টিকৰ খাদ্য। সেয়ে গ্ৰীষ্মকালতো কণী খোৱা বন্ধ কৰাৰ কোনো প্ৰয়োজন নাই। কেৱল সঠিকভাৱে ৰখা, পৰিমাণমতে খোৱা, কম তেল-মছলাত ৰন্ধা আৰু পৰ্যাপ্ত পানী খোৱাৰ অভ্যাস কৰিলে গৰমৰ দিনতো নিশ্চিন্ত মনেৰে কণী খাব পাৰি।
