তিনিচুকীয়া জিলাৰ মাৰ্ঘেৰিটা মহকুমাৰ বিভিন্ন অঞ্চলত ভয়ংকৰ ৰূপ ধাৰণ কৰি উঠি অহা প্ৰজন্মক তিল তিলকৈ মৃত্যুৰ মুখলৈ ঠেলি দিয়া মাৰাত্মক নিচাযুক্ত দ্ৰব্য ড্ৰাগছৰ বিৰুদ্ধে দেওবাৰে নিশা মাৰ্ঘেৰিটা আৰক্ষী থানাৰ অন্তৰ্গত ডিবং আৰু কেটেতং গাঁৱৰ ৰাইজ একত্ৰিত হৈ ড্ৰাগছ বিক্ৰী কৰা আৰু সেৱনৰ বাবে ব্যৱহাৰ কৰা সন্দেহ জনক ঘৰ সমূহ ঘেৰাও কৰি অভিযান চলায়।
স্থানীয় ৰাইজৰ দ্বাৰা চলোৱা এই অভিযানত ৮ জনকৈ ড্ৰাগছ সেৱনকাৰী তথা বিক্ৰী কৰা যুৱকক আটক কৰি মাৰ্ঘেৰিটা আৰক্ষীক চমজাই দিয়ে। ৰাইজে আটক কৰা যুৱক কেইজন হ’ল ক্ৰমে ডিগবৈৰ বিমান তালুকদাৰ, দুলীয়াজানৰ টিপলিঙৰ চানি গগৈ, মাৰ্ঘেৰিটা চিভিলৰ পৰাগ জ্যোতি বৰা, মাৰ্ঘেৰিটাৰ দেৱজিৎ বৰা, জয়ন্ত বৰা, সঞ্জীৱ চেতিয়া, কেটেতঙৰ হান্নান আলি আৰু ডিবং ফাকিয়ালৰ কৃষ্ণ চেত্ৰী।
ধৃত যুৱক কেইজনৰ পৰা অভিযানকাৰী ৰাইজ কিছু পৰিমাণৰ ড্ৰাগছ উদ্ধাৰ কৰে। ইপিনে সোমবাৰে একাংশ ড্ৰাগছ সেৱনকাৰীৰ পৰিয়ালৰ লোক আহি মাৰ্ঘেৰিটা থানাত বিনা কাৰণত হে গাঁৱৰ ৰাইজে ধৰি অনা বুলি দোষাৰোপ কৰি এক হুলস্থুলীয়া পৰিস্থিতিৰ সৃষ্টি কৰি আটকাধীন যুৱক কেইজনক মোকলাই দিবৰ বাবে আৰক্ষীক দাবী জনাই যদিও বিফল হয়।
আনহাতে ড্ৰাগছ সেৱনকাৰী কেইজনৰ বিৰুদ্ধে এন ডি পি এছৰ অধীনত মাৰ্ঘেৰিটা থানাত এক গোচৰ ৰুজু কৰি কেউজনকে সোমবাৰে জেইল হাজোতলৈ প্ৰেৰণ কৰিছে। উল্লেখ্য যে জিলাখনৰ মাৰ্ঘেৰিটা মহকুমাৰ পেঙেৰী থানাৰ অন্তৰ্গত উলুপ,ইনথেম,নগাপথাৰ, লালমাটি, ব্ৰহ্মাজান, কেটেতং আদি অঞ্চলত একাংশ যুৱক মাৰাত্মক ড্ৰাগছৰ কৱলত পৰিছে।
উক্ত অঞ্চল সমূহৰ একাংশ লোকেই স্থানীয় আবকাৰী বিভাগক আৰু আৰক্ষীক “মেনেজ” কৰি অঞ্চলটোত ড্ৰাগছৰ ৰমৰমীয়া ব্যৱসায় চলাই থকা বুলি অভিযোগ কৰিছে স্থানীয় ৰাইজে। তদুপৰি,মাৰ্ঘেৰিটা, লিডু, জাগুন, লেখাপানী আদি অঞ্চল সমূহতো মাৰাত্মক ড্ৰাগছৰ সমান্তৰালকৈ এচাম অসাধু ব্যৱসায়ীয়ে কানি-গাঞ্জাৰ ৰমৰমীয়া বেহা অব্যাহত ৰখা বুলি অভিযোগ উঠিছে ।
মাৰ্ঘেৰিটা মহকুমাকে ধৰি তিনিচুকীয়া জিলাৰ বিভাগীয় কৰ্তৃপক্ষৰ সোপাঢিলা নীতিৰ সুযোগ গ্ৰহণ কৰি এই সকল সমাজ বিৰোধী ধুৰন্ধৰ প্ৰকৃতিৰ লোকে মাৰাত্মক ড্ৰাগছ, কানি-গাঞ্জাকে ধৰি নিচা জাতীয় দ্ৰব্যৰ ৰমৰমীয়া বেহা উলুপ, কেটেটং, বৰফাকিয়াল, বাঁহবাৰী, বিচা, মৌংলাং খামটি, কথা, জাগুন, বৰগোলাই, মাৰ্ঘেৰিটা এ পি অ কলনিকে আদি অঞ্চল সমূহত এতিয়া মুক্ত ৰূপত নিচা জাতীয় দ্ৰব্যৰ এখন মুকলি বজাৰ গঢ়ি তোলাৰ অভিযোগ উঠি আহিছে।
