সমগ্ৰ দেশৰ লগতে অসম তথা উত্তৰ-পূবতো প্ৰদৰ্শিত হ’বলগীয়া প্ৰধান মন্ত্ৰী মোদীৰ জীৱনভিত্তিক বলিউদি চিনে’মা ‘পি এম নৰেন্দ্ৰ মোদী’ৰ মুক্তিত বুধবাৰে নিষেধাজ্ঞা আৰোপ কৰিছে ভাৰতৰ নিৰ্বাচন আয়োগে।
লোকসভা নিৰ্বাচনৰ ভোট গ্ৰহণ শেষ নোহোৱা পৰ্য্যন্ত চিনে’মাখনৰ মুক্তি নিষিদ্ধ কৰা হৈছে।
“এইধৰণৰ ‘ৰাজনৈতিক বিষয়বস্তু’ সম-সুযোগৰ প্ৰতি গুৰুতৰ ভাবুকি কাৰণ টে’লিভিঝন/ চিনে’মা/ ইণ্টাৰনে’ট নিৰ্ভৰ বিনোদন কাৰ্য্যসূচী/ চ’চিয়েল মিদিয়াৰ যোগেদি প্ৰদৰ্শিত হৈ এনে বিষয়বস্তুৱে সত্যতাৰ এক ধাৰণা সৃষ্টি কৰিব পাৰে। আৰু সেয়ে সম-সুযোগ নিশ্চিত কৰা আৰু মুক্ত আৰু নিকা নিৰ্বাচন অনুষ্ঠিত কৰাৰ বৃহত্তৰ স্বাৰ্থত আচৰণবিধি উলংঘা ৰোধৰ বাবে নিৰ্বাচনৰ সময়ত এনে ৰাজনৈতিক বিষয়বস্তু নিয়ন্ত্ৰণ কৰাৰ প্ৰয়োজন,” আয়োগৰ নিৰ্দেশত উল্লেখ।
চিনেমাখনে “দৰ্শক আৰু ভোটাৰক হেৰফেৰ, প্ৰভাৱিত আৰু মোহিত” কৰিব বুলি আপত্তিৰে কংগ্ৰেছ নেতা এগৰাকীয়ে দাখিল কৰা আবেদনৰ ভিত্তিত এই নিৰ্দেশ দিছে আয়োগে।
দেশৰ সমাগত লোকসভা নিৰ্বাচনৰ ভোট গ্ৰহণ আৰম্ভ হোৱাৰ দিনটোতে ১১ এপ্ৰিলত চিনেমাখন মুক্তি দিব খোজা হৈছিল।
অভিযোগকাৰী অমন পনৱাৰৰ লেখ আবেদন (WP (C) no 450/ 2019) সন্দৰ্ভত সিদ্ধান্ত কৰাৰ বাবে নিৰ্বাচন আয়োগহে উপযুক্ত কৰ্তৃপক্ষ বুলি মঙলবাৰে দেশৰ উচ্চতম ন্যায়ালয়ে ৰায় দিছিল।
চিনে’মাখনৰ “উদ্দেশ্য”ক কংগ্ৰেছ আৰু বিৰোধী দলসমূহৰ লগতে বিভিন্ন ব্যক্তিয়ে তীব্ৰ সমালোচনা কৰিছিল।
বিৰোধিতা কৰাক লৈ ৰাহুল গান্ধীকে ধৰি বিভিন্নজনৰ সৈতে যুক্তি-তৰ্কত নামি পৰা অভিনেতা ৱিৱেক অবেৰয়ো এতিয়া টুইটাৰত প্ৰতি-সমালোচনাৰ পাত্ৰ হৈ পৰা পৰিলক্ষিত হৈছে।
অৱেৰয়ে চিনে’মাখনত প্ৰধান মন্ত্ৰী মোদীৰ ৰূপত মুখ্য ভূমিকাত অভিনয় কৰিছে।
