সমগ্ৰ দেশত একেলগে নিৰ্বাচন অনুষ্ঠিত কৰাৰ বিধেয়ক সন্দৰ্ভত এখন যুটীয়া সংসদীয় সমিতিয়ে চিন্তা-চৰ্চা চলাই থকাৰ সময়তে এক গুৰুত্বপূৰ্ণ পদক্ষেপ গ্ৰহণ কৰিছে ভাৰতৰ নিৰ্বাচন আয়োগ আৰু ৰাজ্যিক নিৰ্বাচন আয়োগসমূহে। মঙলবাৰে অনুষ্ঠিত এখন ৰাষ্ট্ৰীয় ঘূৰণীয়া মেজ মেলত নিৰ্বাচন আয়োগ আৰু ৰাজ্যিক নিৰ্বাচন আয়োগসমূহে নিজৰ নিৰ্বাচনী আইনসমূহৰ মাজত সমন্বয় সাধন কৰাৰ বাবে সৰ্বসন্মতিক্ৰমে এক প্ৰস্তাৱ গ্ৰহণ কৰিছে। ১৯৯৯ চনৰ পাছত প্ৰথমবাৰৰ বাবে অনুষ্ঠিত হোৱা ভাৰতৰ নিৰ্বাচন আয়োগ আৰু ৰাজ্যিক নিৰ্বাচন আয়ুক্তসকলৰ এই বৈঠকত গ্ৰহণ কৰা ঘোষণাপত্ৰই দেশৰ নিৰ্বাচনী পৰিকাঠামোত একত্ৰীকৰণৰ ইংগিত দিছে।
ভাৰতৰ নিৰ্বাচন আয়োগৰ এগৰাকী মুখপাত্ৰই সদৰী কৰা অনুসৰি, এই ঘোষণাপত্ৰত সংসদ আৰু ৰাজ্যিক বিধানসভাসমূহৰ নিৰ্বাচনৰ সৈতে পঞ্চায়ত আৰু পৌৰ নিগমৰ নিৰ্বাচন সম্পৰ্কীয় আইনসমূহৰ সমন্বয় সাধন কৰাৰ বাবে দুয়োটা সংস্থাই একেলগে কাম কৰাৰ কথা উল্লেখ কৰা হৈছে। কেন্দ্ৰীয় চৰকাৰৰ দ্বাৰা নিযুক্ত ভাৰতৰ নিৰ্বাচন আয়োগে দেশৰ সংসদীয়, বিধানসভা, ৰাষ্ট্ৰপতি আৰু উপ-ৰাষ্ট্ৰপতিৰ নিৰ্বাচন পৰিচালনা কৰে। আনহাতে, ৰাজ্য চৰকাৰসমূহৰ দ্বাৰা নিযুক্ত ৰাজ্যিক নিৰ্বাচন আয়োগসমূহে পঞ্চায়ত আৰু পৌৰসভাৰ স্থানীয় নিৰ্বাচনসমূহ অনুষ্ঠিত কৰে।
ৰাষ্ট্ৰীয় আৰু সাংবিধানিক স্বাৰ্থৰ প্ৰতি লক্ষ্য ৰাখি ভাৰতৰ নিৰ্বাচন আয়োগে সমগ্ৰ দেশৰ সকলো ৰাজ্যিক নিৰ্বাচন আয়োগৰ সৈতে পাৰস্পৰিকভাৱে গ্ৰহণযোগ্য আৰু আইনীভাৱে বৈধ পৰিকাঠামো গঢ়ি তোলাৰ পৰামৰ্শ দিছে। ইয়াৰ জৰিয়তে সকলো সম্ভাৱ্য নিৰ্বাচনী প্ৰক্ৰিয়াৰ লগতে ইচিনেট (ECINET), ইলেক্ট্ৰনিক ভোটিং মেচিন (ইভিএম), ভোটাৰ তালিকা আৰু নিৰ্বাচন আয়োগৰ প্ৰশিক্ষণ প্ৰতিষ্ঠানৰ (IIIDEM) বিশ্বমানৰ আন্তঃগাঁথনি ভাগ-বতৰা কৰাৰ ওপৰত গুৰুত্ব আৰোপ কৰা হৈছে।
অৱশ্যে, লক্ষণীয়ভাৱে এই সৰ্বসন্মত প্ৰস্তাৱত সমগ্ৰ দেশত একেলগে নিৰ্বাচন অনুষ্ঠিত কৰাৰ কথা পোনপটীয়াকৈ উল্লেখ কৰা হোৱা নাই। ইয়াৰ পূৰ্বে ২০২৩-২৪ বৰ্ষত প্ৰাক্তন ৰাষ্ট্ৰপতি ৰামনাথ কোবিন্দৰ নেতৃত্বাধীন এখন উচ্চস্তৰীয় সমিতিয়ে সংসদীয়, বিধানসভা আৰু স্থানীয় নিকায়ৰ নিৰ্বাচন একেলগে অনুষ্ঠিত কৰা আৰু এখন উমৈহতীয়া ভোটাৰ তালিকা প্ৰস্তুত কৰাৰ প্ৰস্তাৱ পৰীক্ষা কৰিছিল। সেই সময়ত উক্ত সমিতিৰ একমাত্ৰ বিৰোধী সদস্য তথা লোকসভাত কংগ্ৰেছৰ তদানীন্তন দলপতি অধীৰ ৰঞ্জন চৌধুৰীয়ে প্ৰক্ৰিয়াটোত অংশগ্ৰহণ কৰিবলৈ অস্বীকাৰ কৰিছিল। পৰৱৰ্তী সময়ত কংগ্ৰেছকে ধৰি অন্যান্য বিৰোধী দলসমূহেও চৰকাৰৰ এই একেলগে নিৰ্বাচন অনুষ্ঠিত কৰাৰ প্ৰস্তাৱৰ তীব্ৰ বিৰোধিতা কৰি আহিছে।
