ৰাজ্যত মাতৃভাষাত হ’ব মেডিকেল কলেজ। অৰ্থ্যাৎ মাতৃভাষাতে অধ্যয়ন কৰিব পাৰিব চিকিৎসা বিজ্ঞানৰ ইচ্ছুক ছাত্ৰ-ছাত্ৰীসকলে। ঢেকিয়াজুলিত অসমমালা আঁচনি শুভাৰম্ভ কৰি ভাষণ প্ৰসংগত দেশৰ প্ৰধান মন্ত্ৰী নৰেন্দ্ৰ মোদীয়ে এই কথা ঘোষণা কৰিছে।
তেওঁ কয় যে ৰাজ্যত অসমীয়া ভাষাতে চিকিৎসা বিজ্ঞানৰ পাঠ্যক্ৰম গ্ৰহণ কৰিব পৰাকৈ এখন মেডিকেল কলেজ থাকিব।ইয়াৰ বাবে চৰকাৰে পদক্ষেপ গ্ৰহণ কৰা বুলিও তেওঁ উল্লেখ কৰে। ইয়াৰ লগতে অসমীয়া মাধ্যমত অধ্যয়ন কৰিব পৰাকৈ এখন প্ৰযুক্তিবিদ্যা মহাবিদ্যালয় স্থাপনৰ কথাও ঘোষণা কৰে প্ৰধান মন্ত্ৰীগৰাকীয়ে।
এইখিনিতে প্ৰশ্ন উঠিছে, অসমীয়া ভাষাত কেনেকৈ সম্ভৱ হ’ব মেডিকেল কলেজত অধ্যয়ন? নে নিৰ্বাচনৰ পূৰ্বে এয়া একপ্ৰকাৰৰ চমক সৃষ্টি কৰিলে প্ৰধানমন্ত্ৰীগৰাকীয়ে? ইয়াৰোপৰি, বহিঃৰাজ্যৰ পৰা অহা অধ্যাপকসকলে কিদৰে অসমীয়া বিষয়ত শিক্ষাদান কৰিব ছাত্ৰ-ছাত্ৰীসকলক?
বিভিন্ন গৱেষণামূলক গ্ৰন্থ বা বিষয়সমূহ অসমীয়া ভাষাত উপলব্ধ হোৱাটো সহজলভ্য হ’ব নে? নে পূৰ্বে দেখুৱাই যোৱা বহু স্বপ্নৰ দৰেই এয়াও অসমবাসীৰ বাবে হ’ব নেকি এটা সপোন? বাস্তৱত অসমীয়া ভাষাত মেডিকেল কলেজ কিমান দূৰ সম্ভৱ তাক লৈ প্ৰতিক্ৰিয়া প্ৰকাশ কৰিছে যুৱ সাংসদ গৌৰৱ গগৈয়ে।
তেওঁ কয় ‘মোদীৰ এই ঘোষণা ফুলজাৰিৰ দৰে। এক ৰাতিৰ ভিতৰতে পাহৰি যাব। মানুহে ৰাতি শোৱাৰ সময়ত চিন্তা কৰিব, যিমানখিনি আয় মানুহৰ হ’ব লাগিছিল সেইখিনি এতিয়ালৈকে হোৱা নাই বা নিৱনুৱা সমস্যাও সমাধান হোৱা নাই। কোভিডৰ ভেকচিনৰ ক্ষেত্ৰত অসমৰ মেডিকেল কলেজৰ ছাত্ৰ-ছাত্ৰীসকলে কি কি গৱেষণা চলি আছে সেই কথা জানিব লাগে। যদি প্ৰধান মন্ত্ৰীৰ ঘোষণা ৰূপায়ণ হয় তেনেহ’লে হায়দৰাবাদৰ অধ্যাপকে ছাত্ৰ-ছাত্ৰীক অসমত আহি অসমীয়াত কেনেকৈ পঢ়াব সেইখিনি আগতীয়াকৈ জনাব লাগিছিল। তেওঁৰ এয়া নিৰ্বাচনী চমক তথা কথাৰ ফুলজাৰি।‘
ইপিনে, প্ৰধান মন্ত্ৰী নৰেন্দ্ৰ মোদীয়ে তেওঁৰ বক্তব্যৰ পৰা বহুকেইটা বিষয় এৰাই চলা বুলি গুৰুতৰ অভিযোগ তোলে যুৱ সাংসদগৰাকীয়ে। প্ৰধানতঃ বান গৰাখহনীয়া সমস্যাৰ কথা, নিযুক্তি কেলেংকাৰিৰ তদন্ত, চিণ্ডিকেটৰ প্ৰসংগ, চাহ শ্ৰমিকৰ মজুৰি বৃদ্ধি ইত্যাদি প্ৰসংগ এৰাই চলিলে প্ৰধানমন্ত্ৰী নৰেন্দ্ৰ মোদীয়ে।
তেওঁ কয় ‘প্ৰধানমন্ত্ৰীগৰাকীয়ে ঢেকিয়াজুলি শোণিতপুৰ জিলাত গৈ বান-গৰাখহনীয়া সমস্যাক লৈ যিখিনি কথা ক’ব লাগিছিল সেইখিনি নক’লে। ঢেকিয়াজুলি, চতিয়া, তেজপুৰ, বৰচলাত বহুত বানপানীৰ সমস্যা আছে। তেওঁ না খাওঙ্গা, না খানে দুঙ্গা কোৱাৰ পাছতো কেনেদৰে কয়লা চিণ্ডিকেট, গৰু চিণ্ডিকেট, SI, APSC কেলেংকাৰিৰ চলি আছে সেই বিষয়েহে উল্লেখ কৰিব লাগিছিল।‘
এইবোৰ কথা উল্লেখ নকৰি প্ৰধানমন্ত্ৰীগৰাকীয়ে অসমৰ মানুহক ৰঙীন চশমা পিন্ধাই থৈ গ’ল বুলিও গগৈয়ে কটাক্ষ কৰে।
মাতৃভাষাক স্বীকৃতি প্ৰদানৰ উদ্দেশ্যেৰে মেডিকেল পাঠ্যক্ৰম অসমীয়াত আৰম্ভ কৰাটো অতিকৈ গুৰুত্বপূৰ্ণ পদক্ষেপ হিচাপে বিবেচিত হ’ব বিজেপি চৰকাৰৰ। কিন্তু অসমীয়া মাধ্যমত মেডিকেল পাঠ্যক্ৰম আৰম্ভ কৰিবলৈ চৰকাৰে কেনেধৰণৰ প্ৰত্যাহ্বানৰ সন্মুখীন হ’ব লাগিব? তথা এয়া কেৱল প্ৰতিশ্ৰুতিতে সীমাবদ্ধ হৈ ৰ’ব নেকি? সেয়া সময়ত লক্ষণীয় হ’ব।