যি সময়ত অসমৰ শক্তি মন্ত্ৰী গৰাকীয়ে বিদ্যুৎ বিভাগত নতুন গতি প্ৰদানৰ বাবে বিদ্যুৎ বিল পৰিশোধকে ধৰি বিভিন্ন কাৰ্যপন্থা গ্ৰহণ কৰি সকলোৰে দৃষ্টি আকৰ্ষণ কৰিবলৈ সক্ষম হৈছে সেই সময়ত চৰকাৰী বিভাগৰ কাৰ্যালয় সমূহৰ অনাদায় হৈ থকা বিদ্যুৎ বিলৰ পৰিমানে ভবাই তুলিছে জনসাধাৰণক।
জানিবপৰা মতে যোৰহাট জিলাৰ টীয়ক বৈদ্যুতিক সংমণ্ডলৰ অধীনস্থ চৰকাৰী কাৰ্যালয় সমূহে পৰিশোধ কৰিব লগা বিদ্যুৎ বিলৰ পৰিমাণ প্ৰায় ডেৰ কোটি ।
ইয়াৰ ভিতৰত জনস্বাস্থ্য কাৰিকৰী বিভাগৰ অনাদায় হৈ আছে সৰ্বাধিক প্ৰায় ৭২ লাখ টকা, জলসিঞ্চন বিভাগৰ প্ৰায় ২০ লাখ টকা, টীয়ক পৌৰসভাৰ অনাদায় হৈ আছে প্ৰায় ৬১ হাজাৰ টকা , অন্যান্য চৰকাৰী কাৰ্যালয়ৰ অনাদায় হৈ থকাৰ ধনৰ মূঠ পৰিমান প্ৰায় ১৫ লাখ টকা ।
এনেদৰে চৰকাৰী কাৰ্যালয় সমূহৰ অনাদায় হৈ থকা বিদ্যুৎ বিল পৰিশোধৰ বেলিকা কি ব্যৱস্থা গ্ৰহণ কৰিব সেয়া লক্ষনীয় হব ।
ইয়াৰ বিপৰীতে কিন্তু ব্যক্তিগত বিদ্যুৎ গ্ৰাহক সকলে নিয়মিত বিদ্যুৎ বিল প্ৰদান কৰাৰ ফলত পূৰ্বৰ সকলো অভিলেখ ভংগ কৰি প্ৰায় ২৬ হাজাৰ বিদ্যুৎ গ্ৰাহক থকা টীয়ক বিদ্যুৎ সংমণ্ডলৰ অধীনস্থ কাকজান আৰু টীয়ক বৈদ্যুতিক উপ সংমণ্ডলত ৰাজহ জমা হৈছে কোটিৰ ঘৰত ।
ইপিনে টীয়ক উপ সংমণ্ডলৰ অধীনস্থ উত্তৰ দুলীয়া গাঁৱৰ বহু দৰিদ্ৰ সীমাৰেখাৰ তলৰ লোকৰ ঘৰত সংযোজিত কুটিৰ জ্যোতি আঁচনিৰ বিদ্যুৎ বিল মাহত পোন্ধৰ হাজাৰ টকাৰ পৰা পঁচিশ হাজাৰ টকা পৰ্যন্ত অহা ঘটনাই ব্যাপক প্ৰতিক্ৰিয়াৰ সৃষ্টি কৰিছে ।
ছাত্র সন্থাই দৰিদ্ৰ লোকসকলৰ অত্যাধিক বিল অহা বিষয়টোৰ ক্ষেত্ৰত বিহিত ব্যৱস্থা গ্ৰহণৰ দাবী জনোৱাৰ লগতে অনাদায় হৈ থকা চৰকাৰী কাৰ্যালয়ৰ বিদ্যুৎ বিল পৰিশোধ কৰিবলৈ সংশ্লিষ্ট কাৰ্যালয় সমূহৰ মুৰব্বীক আহ্বান জনাইছে ।
