হোজাই জিলাৰ কমৰাকাটা গাঁও পঞ্চায়তৰ অধীনৰ যাঠিহুৰাত এজাক বনৰীয়া হাতীৰ গচকত আজি এগৰাকী ৭৫ বছৰীয়া বৃদ্ধ লোকে প্ৰাণ হেৰুৱাবলগীয়া হয়।
দিনৰ প্ৰায় ১২ বজাত উক্ত ঘটনাটো সংঘটিত হয়। নিহত লোকজনক খাৰ্কে বাহাদুৰ ছেত্ৰী বুলি চিনাক্ত কৰা হৈছে।
প্ৰাপ্ত তথ্য মতে কমাৰকাটা সংৰক্ষিত বনাঞ্চলত নিজৰ গাই গৰুজনী চৰাই ঘৰলৈ আহি থকা অৱস্থাতে বনৰীয়া হাতীৰ জাকটোৰ সন্মুখত পৰে ছেত্ৰী। হাটীৰজাকটোৱে তেওঁক আক্ৰমণ কৰাত লোকজনৰ থিতাতে মৃত্যু হয়।
এগৰাকী গাঁওবাসীয়ে ভাষ্য অনুসৰি, ‘আমি কাম কৰি আছিলো, হঠাতে হাতীয়ে কাৰোবাক মাৰিলে বুলি মানুহৰ মাজত চিঞৰ বাখৰ কৰা শুনিবলৈ পালো। স্থানীয় লোকসকলে ঘটনাস্থলীত গৈ মৃতদেহটো উদ্ধাৰ কৰে।‘
উল্লেখযোগ্য যে যোৱা কিছুদিন ধৰি অঞ্চলটোত বনৰীয়া হাতীয়ে যথেষ্ট উপদ্ৰৱ চলাই আহিছে।
