ইলন মাস্কে আমেৰিকাক দুটা দলৰ ৰাজনৈতিক প্ৰভাৱৰ পৰা মুক্ত কৰিব বিচাৰে। এইবাৰ পোনপটীয়াকৈ ৰাজনৈতিক ক্ষেত্ৰখনত প্ৰৱেশ কৰিছে বিশ্বৰ আটাইতকৈ ধনী ব্যক্তিজনে। শনিবাৰে তেওঁ ‘এক্স’ হেণ্ডেলত নিজৰ ৰাজনৈতিক দল ‘আমেৰিকা পাৰ্টি’ৰ ঘোষণা কৰে।
মাস্কে লিখিছে, “আজি আপোনালোকৰ স্বাধীনতা ঘূৰাই দিবলৈ ‘আমেৰিকা পাৰ্টি’ৰ গঠন কৰা হ’ল। আমি একদলীয় ৰাজনৈতিক ব্যৱস্থাত বাস কৰোঁ, এইটো গণতন্ত্ৰ নহয়।”
আন এটা পোষ্টত তেওঁ স্পাৰ্টানসকলৰ উদাহৰণ দি লিখিছে, “যেনেকৈ তেওঁলোকৰ অপৰাজেয় ধাৰণাটো ভাঙি দিয়া হৈছিল, আমি সেইদৰে এই ৰাজনৈতিক ব্যৱস্থাটোক সলনি কৰিম।”
ইয়াৰ পূৰ্বে ৪ জুলাই অৰ্থাৎ আমেৰিকাৰ স্বাধীনতা দিৱসত মাস্কে জনমত সমীক্ষা চলাইছিল, য’ত তেওঁ এই প্ৰশ্নটো কৰিছিল – “মই আমেৰিকা পাৰ্টি গঠন কৰিমনে?” সেই সমীক্ষাত ৬৫.৪ শতাংশ লোকে ‘লাগে’, ৩৪.৬ শতাংশ লোকে ‘নালাগে’ বুলি কয়। মাস্কে দাবী কৰে যে এই সমৰ্থনে তেওঁক দল গঠনৰ সিদ্ধান্তত উপনীত হোৱাত সহায় কৰিছে।
আমেৰিকাৰ ৰাজনীতিৰ প্ৰতি মাস্কৰ আগ্ৰহ নতুন নহয়। তেওঁ আছিল ট্ৰাম্প প্ৰশাসনৰ উপদেষ্টা। কিন্তু পিছত তেওঁ সেই পদ এৰি ট্ৰাম্পৰ কেইবাটাও নীতিক সমালোচনা কৰে। ট্ৰাম্পেও কটুক্তিৰে প্ৰতিক্ৰিয়া প্ৰকাশ কৰে। তেতিয়াৰ পৰাই জল্পনা-কল্পনা আৰম্ভ হৈছে যে মাস্কে নিজেই নতুন ৰাজনৈতিক দল গঠন কৰিব পাৰে। অৱশেষত সেই জল্পনা-কল্পনা শনিবাৰে সঁচা হ’ল।
