বিশ্বৰ অন্যতম ধনী ব্যক্তি ইলন মাস্কৰ মালিকানাধীন ছ’চিয়েল মিডিয়া প্লেটফৰ্ম এক্স (পূৰ্বৰ টুইটাৰ) এক বৃহৎ চাইবাৰ আক্ৰমণৰ বলি হৈছে। সোমবাৰে পুৱাৰে পৰা এছিয়া, ইউৰোপ আৰু উত্তৰ আমেৰিকাৰ বিভিন্ন দেশত এই প্লেটফৰ্মৰ ব্যৱহাৰকাৰীসকলে কাৰিকৰী সমস্যাৰ সন্মুখীন হৈছে। বহুতে এক্সেত প্ৰৱেশ কৰিব পৰা নাছিল, আনহাতে কিছুমানে লগ ইন কৰিবলৈ সক্ষম হৈছিল যদিও বিভিন্ন ফিচাৰ ব্যৱহাৰ কৰিব পৰা নাছিল।
ব্যৱহাৰকাৰীসকলৰ এই অস্বস্তিৰ মাজতে ইলন মাস্কে নিজেই ফেচবুকত এটা পোষ্টৰ জৰিয়তে চাইবাৰ আক্ৰমণৰ কথা নিশ্চিত কৰে। তেওঁ লিখিছে, “এক্স এটা ডাঙৰ চাইবাৰ আক্ৰমণৰ সন্মুখীন হৈছে (আৰু এতিয়াও আছে)। অৱশ্যে বহু ব্যৱহাৰকাৰীয়ে জনাইছে যে কাৰিকৰী বিজুতিৰ পিছতো এক্স কিছু সময়ৰ বাবে ব্যৱহাৰ কৰিবলৈ সক্ষম হৈছে।
যদিও ইলন মাস্কে প্ৰত্যক্ষভাৱে ইয়াক চাইবাৰ আক্ৰমণ বুলি দাবী কৰিছিল, তথাপিও তেওঁ কোনো নিৰ্দিষ্ট প্ৰমাণ দিয়া নাছিল। ইয়াৰ পূৰ্বে ২০২৩ চনৰ আমেৰিকাৰ ৰাষ্ট্ৰপতি নিৰ্বাচনৰ প্ৰাকক্ষণত এক্সৰ একেধৰণৰ সমস্যা হৈছিল।
সেই সময়ত প্ৰাক্তন ৰাষ্ট্ৰপতি ড’নাল্ড ট্ৰাম্পৰ সৈতে হোৱা সাক্ষাৎকাৰ কাৰিকৰী ত্ৰুটিৰ বাবে নিৰ্ধাৰিত সময়তকৈ ৪০ মিনিট পিছত আৰম্ভ হৈছিল। তেতিয়াও ইলন মাস্কে ইয়াৰ বাবে চাইবাৰ আক্ৰমণকে দায়ী কৰিছিল।
চাইবাৰ সুৰক্ষা বিশ্লেষকসকলে কয় যে এক্সৰ চাৰ্ভাৰ আৰু অপাৰেটিং চিষ্টেমসমূহ পৰ্যালোচনা নকৰাকৈ নিশ্চিতভাৱে একো কোৱা সম্ভৱ নহয়। কিন্তু দীৰ্ঘ সময় ধৰি সমস্যাটো অটল থকাৰ পৰিপ্ৰেক্ষিতত বহুতে চাইবাৰ আক্ৰমণৰ সম্ভাৱনাক নুই কৰা নাই।
অৱশ্যে এয়া চাইবাৰ আক্ৰমণ নে প্লেটফৰ্মৰ আভ্যন্তৰীণ কাৰিকৰী ত্ৰুটি সেই সন্দৰ্ভত এতিয়াও কোনো নিশ্চিত তথ্য পোৱা নাই। এই সন্দৰ্ভত ইলন মাস্ক বা এক্সে কোনো বিতং ব্যাখ্যা দিয়া নাই।
