ৰাজ্যখনৰ এগৰাকী বিশিষ্ট শিক্ষাবিদ, গুৱাহাটী বিশ্ববিদ্যালয়ৰ ৰাজনীতি বিজ্ঞান বিভাগৰ প্ৰাক্তন অধ্যাপক তথা কলাগুৰু ড০ নিৰু হাজৰিকাৰ দেওবাৰে পুৱতি নিশা ৩ বাজি ৪৫ মিনিটত গুৱাহাটী মেডিকেল কলেজ হাস্পাতালত কোভিডত আক্ৰান্ত হৈ পৰলোকপ্ৰাপ্তি ঘটে।
মৃত্যুৰ সময়ত তেওঁৰ বয়স হৈছিল ৭৩বছৰ।
ড০ হাজৰিকা বিগত কেইমাহ ধৰি অসুস্থ হৈ আছিল। যোৱা ডিচেম্বৰ মাহত ষ্ট্ৰ’কত আক্ৰান্ত হৈ ডাউন টাউন হাস্পাতালত ভৰ্তি হৈ চিকিৎসা গ্ৰহণ কৰি সুস্থ হৈ উঠিছিল যদিও চলিত জুলাই মাহত ঘৰতে পুনৰ পৰি গৈ কঁকালত আঘাত পাইছিল।
ডাউন টাউন হাস্পাতালত সুকলমে অস্ত্ৰোপচাৰ হোৱাৰ পাছত হাস্পাতালৰ পৰা আহি ঘৰত আৰোগ্যমুখী হোৱাৰ সময়তে পুনৰ কোভিডত আক্ৰান্ত হয় ড০ হাজৰিকা।
যোৱা ২১ জুলাইত গুৱাহাটী মেডিকেল কলেজ হাস্পাতালত ভৰ্তি হোৱা ড০ নিৰু হাজৰিকাই অৱশেষত দেওবাৰে অজস্ৰ গুণমুগ্ধক শোকস্তব্ধ কৰি ইহলীলা সম্বৰণ কৰে।
গুৱাহাটী বিশ্ববিদ্যালয়ৰ প্ৰাক্তন কলাগুৰু তথা নতুন দিল্লীৰ ICSSRৰ প্ৰাক্তন সদস্য নিৰু হাজৰিকাই প্ৰায় তিনি দশক কাল গুৱাহাটী বিশ্ববিদ্যালয়ৰ ৰাজনীতি বিজ্ঞান বিভাগৰ অধ্যাপক হিচাপে সেৱা আগবঢ়ায়।
তেওঁ গুৱাহাটী বিশ্ববিদ্যালয়তে শিক্ষকতা আৰম্ভ কৰি এই বিশ্ববিদ্যালয়খনৰ পৰাই অৱসৰ গ্ৰহণ কৰিছিল। তেওঁ এই বিশ্ববিদ্যালয়খনৰে ছাত্ৰীও আছিল।
ড০ নিৰু হাজৰিকা D.Litt ডিগ্ৰী লাভ কৰা উত্তৰ পূব ভাৰতৰ প্ৰথমগৰাকী মহিলা আছিল। তেওঁৰ তত্ত্বাৱধানত বিভিন্ন বৃত্তিত জড়িত হৈ থকা ৭০গৰাকীতকৈয়ো অধিক ছাত্ৰই পিএইচডি ডিগ্ৰী লাভ কৰিছে।
ড০ হাজৰিকা উত্তৰ পূব ভাৰতৰ ৰাজহুৱা প্ৰশাসন, চৰকাৰ আৰু ৰাজনীতি তথা মান অধিকাৰ বিষয়ৰ বিশেষজ্ঞ হিচাপে পৰিচিত আছিল। তেওঁ কেইবাখনো উল্লেখযোগ্য গ্ৰন্থৰ প্ৰণেতা তথা সহ প্ৰণেতা আছিল।
তেওঁৰ উল্লেখযোগ্য কৰ্মৰ ভিতৰত আছে, ‘পাব্লিক চাৰ্ভিছ কমিছন ইন ইণ্ডিয়া’, এথনিক অট’নমি ইন নৰ্থইষ্ট ইণ্ডিয়া: এ ছাৰ্চ ফৰ এন এঞ্চাৰ, ইনছাৰজেন্সি এণ্ড বিয়ণ্ড’, ‘এ চেঞ্চুৰি অফ চিভিল চাৰ্ভিছ ইন নৰ্থইষ্ট ইণ্ডিয়া’ ইত্যাদি।
ড০ হাজৰিকাই আমেৰিকা যুক্তৰাষ্ট্ৰ, ইংলেণ্ড, ফ্ৰান্স, হলেণ্ড, স্পেইন আদি বিভিন্ন দেশত কেইবাখনো শৈক্ষিক আন্ত:ৰাষ্ট্ৰীয় সন্মিলনতো অংশগ্ৰহণ কৰিছিল। তেওঁৰ বিভিন্ন গৱেষণামূলক প্ৰৱন্ধ ৰাষ্ট্ৰীয় তথা আন্ত:ৰাষ্ট্ৰীয় পত্ৰিকাত প্ৰকাশ পাইছে।
ড০ নিৰু হাজৰিকাৰ সহস্ৰাধিক ছাত্ৰ-ছাত্ৰী বৰ্তমান দেশৰ বিভিন্ন সেৱাত জড়িত হৈ আছে। তদুপৰি, অসমৰ ৰাজনীতি তথা সামাজিক নেতৃত্ব বহন কৰা বহু ব্যক্তিয়ে ড০ হাজৰিকাৰ অধীনত অধ্যয়ন কৰাৰ লগতে গৱেষণাও কৰিছিল।
অসমৰ ৰাজনীতিৰ জগতখনৰ সৈতেও ড০ নিৰু হাজৰিকাৰ যথেষ্ট সম্পৰ্ক আছিল। প্ৰাক্তন মুখ্যমন্ত্ৰী শৰৎ চন্দ্ৰ সিংহ আৰু হিতেশ্বৰ শইকীয়াৰ ৰাজনৈতিক পৰিক্ৰমাৰ সৈতে বিশেষভাৱে পৰিচিত আছিল হাজৰিকা।
প্ৰাক্তন মুখ্যমন্ত্ৰী হিতেশ্বৰ শইকীয়াৰ কাৰ্যকালত ড০ নিৰু হাজৰিকাই কেবিনেট মৰ্যাদাৰে ৰাজনৈতিক উপদেষ্টা পদতো কাৰ্যনিৰ্বাহ কৰিছিল।
বিশিষ্ট শিক্ষাবিদ, আন্তৰ্জাতিক খ্যাতি সম্পন্ন গৱেষক পণ্ডিত গৰাকীৰ মৃত্যুত শোকস্তব্ধ হৈ পৰিছে তেওঁৰ অজস্ৰ গুণমুগ্ধ তথা ছাত্ৰ-ছাত্ৰী।
