ৰাজ্যখনৰ এগৰাকী বিশিষ্ট চিন্তাবিদ, লেখক, ইতিহাসবিদ তথা অধ্যাপক উদয়াদিত্য ভৰালীৰ দেহাৱসান ঘটিছে। দেওবাৰে নিশা ২-৩৩ বজাত মহানগৰীৰ নিজ বাসগৃহতে শেষ নিশ্বাস ত্যাগ কৰে। মৃত্যুৰ সময়ত তেওঁৰ বয়স আছিল ৭৮ বছৰ। দীৰ্ঘদিন ধৰি বিশিষ্ট চিন্তাবিদগৰাকী দুৰাৰোগ্য ৰোগত আক্ৰান্ত হৈ আছিল।
প্ৰগতিশীল চিন্তা-চৰ্চাৰে অসমৰ সমাজ জীৱনলৈ অনবদ্য বৰঙণি আগবঢ়োৱা অধ্যাপক উদয়াদিত্য ভৰালীলৈ এই বছৰ ‘পৰাগ কুমাৰ দাস সাংবাদিকতা বঁটা’ আগবঢ়োৱা হৈছিল।
১৯৪৭ চনত মৰাণত জন্মগ্ৰহণ কৰা উদয়াদিত্য ভৰালী বৰ্তমান গুৱাহাটীৰ দক্ষিণ শৰণীয়া নিবাসী আছিল। পিতৃৰ কৰ্মসূত্ৰে হোৱা সঘন বদলিৰ বাবে তেওঁ মঙলদৈ, ওদালগুৰি, মাজবাট, গহপুৰ, শিৱসাগৰ, গুৱাহাটী, বৰমা, নলবাৰী আৰু বৰপেটাত বুনিয়াদী আৰু হাইস্কুলীয়া শিক্ষাগ্ৰহণ কৰিছিল।
ভৰালীয়ে তেতিয়াৰ কটন কলেজত কলেজীয়া শিক্ষা সমাপ্ত কৰি তেওঁ গুৱাহাটী বিশ্ববিদ্যালয়ৰ পৰা ইতিহাস বিষয়ত স্বৰ্ণপদকসহ স্নাতকোত্তৰ ডিগ্ৰী লাভ কৰিছিল ।
১৯৬৮ চনৰ ১৪ নৱেম্বৰৰ পৰা ২০০৩ চনৰ ৩১ আগষ্টলৈ কটন কলেজৰ অধ্যাপক হিচাপে সেৱা আগবঢ়োৱা বিশিষ্ট চিন্তাবিদগৰাকীয়ে ২০০২-২০০৩ চনলৈ ইতিহাস বিভাগটোৰ মুৰব্বী হিচাপে আছিল। ২০০৩ চনত কটন কলেজৰ অধ্যক্ষ হিচাপে দায়িত্ব গ্ৰহণ কৰা উদয়াদিত্য ভৰালীয়ে ২০০৬ চনত কৰ্মজীৱনৰ পৰা অৱসৰ গ্ৰহণ কৰে।
অধ্যাপক উদয়াদিত্য ভৰালী The Political History of Assam, Vol-I গ্ৰন্থৰ সহযোগী সম্পাদক আছিল। তদুপৰি, অসম চৰকাৰে প্ৰকাশ কৰা ড০ হেৰম্বকান্ত বৰপূজাৰীৰ জীৱনী গ্ৰন্থখনৰ উপৰি কটন কলেজ শতবৰ্ষ উদযাপন সমিতিয়ে প্ৰকাশ কৰা ‘Hundred Years : History of Cotton College, 1901-2001 শীৰ্ষক গ্ৰন্থৰো তেওঁ মুখ্য সম্পাদক আছিল। গুৱাহাটীৰ সাম্প্রতিক প্রকাশনে প্ৰকাশ কৰা জাতি সমস্যাৰ প্রশ্নত (আগষ্ট ১৯৮১) তেওঁৰ এখন উল্লেখযোগ্য গ্ৰন্থ।
উদয়াদিত্য ভৰালী ২০০৪ চনৰ অসম সাহিত্য সভাৰ বুৰঞ্জী অধিৱেশনৰ সঞ্চালক আছিল।
‘বেইমানৰ ঠিকনা’ শীৰ্ষক গল্প সংকলনৰ বাবে ১৯৯৬ চনত উদয়াদিত্য ভৰালীয়ে অসম সাহিত্য সভাৰ ‘বিষ্ণু্প্ৰসাদ ৰাভা বঁটা’ লাভ কৰিছিল।
অসমৰ সমাজ জীৱনৰ দিক্ নিৰ্দেশক প্ৰসিদ্ধ চিন্তাবিদগৰাকীৰ প্ৰয়াণত তেওঁৰ অজস্ৰ গুণমুগ্ধই শোক প্ৰকাশ কৰিছে।
