অসম বিধানসভাৰ নিয়োগ পৰ্যালোচনা কমিটীয়ে জিলাখনত বিভিন্ন বিভাগত খালী হৈ থকা পদৰ বুজ ল’বলৈ বঙাইগাঁৱত উপস্থিত হয় ৷
ইয়াৰ পিছতে জিলা উপায়ুক্তৰ সভাকক্ষত এক পৰ্যালোচনা বৈঠকত মিলিত হয়।
কোকৰাঝাৰ (পূৱ) বিধানসভা সমষ্টিৰ বিধায়ক লৰেন্স ইছলাৰীৰ নেতৃত্বত অহা নিয়োগ পৰ্যালোচনা কমিটীৰ দলটোত আন সদস্য হিচাপে নগাঁও সমষ্টিৰ বিধায়ক ৰূপক শৰ্মা, লামডিঙৰ বিধায়ক শিবু মিশ্ৰ, ডিগবৈৰ বিধায়ক সুৰেন ফুকন, অভয়াপুৰী উত্তৰ বিধানসভা সমষ্টিৰ বিধায়ক আব্দুল বাতেন খন্দকাৰ, বৰক্ষেত্ৰী সমষ্টিৰ বিধায়ক দিগন্ত বৰ্মন, তেজপুৰ সমষ্টিৰ বিধায়ক পৃথ্বীৰাজ ৰাভা আৰু চিদলী বিধানসভা সমষ্টিৰ বিধায়ক জয়ন্ত বসুমতাৰী আছিল ৷
কমিটীখনৰ সদস্যসকলে জিলা উপায়ুক্ত ডা: এম এচ লক্ষ্মী প্ৰিয়া তথা অসম বিধানসভাৰ আন উচ্চ পদস্থ বিষয়া আৰু জিলা উন্নয়ন আয়ুক্ত ভাস্কৰ দাস, অতিৰিক্ত উপায়ুক্ত পংকজ চমুৱাৰ উপস্থিতিত বিভাগীয় বিষয়াৰ সৈতে সংশ্লিষ্ট বিভাগত খালী হৈ থকা চৰকাৰী মঞ্জুৰীপ্ৰাপ্ত পদৰ বিষয়ত বুজ লয়।
অসম বিধানসভাৰ নিয়োগ পৰ্যালোচনা কমিটীৰ অধ্যক্ষ লৰেন্স ইছলাৰীয়ে কয় যে চৰকাৰৰ নিৰ্দেশনামৰ্মে তেওঁলোকে জিলাসমূহত বিভিন্ন বিভাগত খালী থকা পদৰ বুজ লৈ চৰকাৰক প্ৰতিবেদন দাখিল কৰিব আৰু সেইমৰ্মে চৰকাৰে পৰ্যায়ক্ৰমে পদসমূহ পূৰণ কৰাৰ ব্যৱস্থা গ্ৰহণ কৰিব।
তদুপৰি বিভাগসমূহত ৰোষ্টাৰ অনুযায়ী পদসমূহ পূৰণ কৰা হৈছে নে নাই, বহি: উৎসৰ পৰা কিমান লোকে কাম কৰি আছে সেয়াও নিৰীক্ষণ কৰিব কমিটীখনে।
উল্লেখ্য যে বঙাইগাঁৱত পৰ্যটন বিভাগৰ বিষয়া-কৰ্মচাৰীৰ প্ৰয়োজন। আনহাতে বঙাইগাঁও জিলা উদ্যোগ আৰু বাণিজ্য কেন্দ্ৰ, এপিডিচিএল, দক্ষতা বিকাশ বিভাগ আদিত ভালে সংখ্যক পদ খালী হৈ আছে বুলি বিভাগীয় বিষয়াই নিয়োগ পৰ্যালোচনা কমিটীক জানিবলৈ দিয়ে ৷
কমিটীখনৰ অধ্যক্ষ ইছলাৰীয়ে কয় যে জিলাখনত বিভাগসমূহত খালী হৈ থকা পদসমূহৰ বিষয়ে চৰকাৰক জনাব আৰু পদসমূহ পূৰণ কৰাৰ বাবে তেওঁলোকৰ কৰণীয়খিনি তেওঁলোকে কৰিব।
