ৰাঁচীত INDIA জোঁটৰ শক্তি প্ৰদৰ্শনঃ মঞ্চত কেজৰিৱাল, ছোৰেনৰ নামত দুখনকৈ খালী চকী

লোকসভা নিৰ্বাচনৰ বাবে আজি ৰাঁচীত শক্তি প্ৰদৰ্শন কৰে বিৰোধী মিত্ৰজোঁট INDIAই। ঝাৰখণ্ড মুক্তি মৰ্চাৰ উদ্যোগত অনুষ্ঠিত হোৱা ‘উলগুলন ন্যায় মহাৰেলী’ নামৰ এই সমাৱেশত মুঠ ২৮টা ৰাজনৈতিক দলে অংশগ্ৰহণ কৰে।

এই সমাৱেশত INDIA জোঁটৰ দুই অংশীদাৰ নেতা কাৰাবন্দী দিল্লীৰ মুখ্যমন্ত্ৰী অৰবিন্দ কেজৰিৱাল আৰু ঝাৰখণ্ডৰ প্ৰাক্তন মুখ্যমন্ত্ৰী হেমন্ত ছোৰেনৰ বাবে এখনকৈ খালী চকী মঞ্চত ৰখা হৈছিল।

অৱশ্যে এই দুটা নেতা মঞ্চত উপস্থিত নাথাকিলেও তেওঁলোকৰ পত্নী কল্পনা ছোৰেন আৰু সুনীতা কেজৰিৱাল মঞ্চত উপৱিষ্ট থাকে। কেজৰিৱাল আৰু ছোৰেনৰ অনুপস্থিতিত নেতাদ্বয়ৰ পত্নী দুগৰাকীয়ে ৰাজনৈতিক ভূমিকা গ্ৰহণ কৰিবলৈ সাজু হৈছে।

কল্পনা আৰু সুনীতাৰ উপৰিও জেএমএমৰ শীৰ্ষতম নেতা শিবু ছোৰেন, নেচনেল কনফাৰেন্সৰ সভাপতি ফাৰুক আব্দুল্লা, আৰজেডি নেতা তথা বিহাৰৰ প্ৰাক্তন উপ-মুখ্যমন্ত্ৰী তেজশ্বী যাদৱ, সমাজবাদী পাৰ্টিৰ মুৰব্বী অখিলেশ যাদৱ, পঞ্জাৱৰ মুখ্যমন্ত্ৰী ভাগৱত মান আদিয়ে এই সমাৱেশত অংশগ্ৰহণ কৰে।

উল্লেখ্য যে, ভূমি জালিয়াতিৰ অভিযোগৰ সৈতে জড়িত ধন সৰবৰাহৰ গোচৰত যোৱা ৩১ জানুৱাৰীত এনফৰ্চমেণ্ট ডাইৰেক্টৰেটে গ্ৰেপ্তাৰ কৰিছিল হেমন্ত ছোৰেনক। আনহাতে ইডিয়েই যোৱা ২১ মাৰ্চত দিল্লীৰ সুৰা নীতিৰ কেলেংকাৰিৰ অভিযোগত কেজৰিৱালক গ্ৰেপ্তাৰ কৰিছিল।