শুকুৰবাৰে দিছপুৰত অনুষ্ঠিত এক গুৰুত্বপূৰ্ণ গণ সন্মিলনত উত্তৰ-পূবৰ ১৫টাতকৈও অধিক জনজাতীয় আৰু থলুৱা সংগঠনে একত্ৰিত হৈ এক ঐতিহাসিক ঘোষণা পত্ৰত স্বাক্ষৰ কৰে। ভূমি অধিকাৰ যৌথ সংগ্ৰাম সমিতিৰ উদ্যোগত আয়োজিত এই সন্মিলনত অসম, অৰুণাচল প্ৰদেশ, মণিপুৰ আৰু ছিকিমৰ প্ৰতিনিধিসকলেও অংশগ্ৰহণ কৰে।
এই সন্মিলনৰ মূল লক্ষ্য আছিল চৰকাৰৰ শক্তি নীতিৰ ফলত উত্তৰ-পূৰ্বাঞ্চলৰ মানুহৰ ওপৰত পৰিব পৰা বিৰূপ প্ৰভাৱ আৰু থলুৱা লোকৰ ভূমি উচ্ছেদৰ বিৰুদ্ধে ঐক্যবদ্ধ হোৱা। সন্মিলনত অংশগ্ৰহণ কৰা বক্তাসকলে অভিযোগ কৰে যে বৰ্তমানৰ বৃহৎ জলবিদ্যুৎ প্ৰকল্প, খনি আৰু আন্তঃগাঁথনি নিৰ্মাণৰ নামত থলুৱা লোকৰ পৰা তেওঁলোকৰ ভূমিৰ অধিকাৰ কাঢ়ি নিয়া হৈছে।
প্ৰতিনিধিসকলে জানিবলৈ দিছে যে বৰ্তমানৰ চৰকাৰী আঁচনিসমূহৰ ফলত উত্তৰ-পূৰ্বাঞ্চলত প্ৰায় এক লাখৰো অধিক থলুৱা লোক গৃহহীন হোৱাৰ সম্ভাৱনা আছে। বিশেষকৈ অসম চৰকাৰৰ সমন্বিত স্বচ্ছ শক্তি নীতি ২০২৫-২০৩০ৰ জৰিয়তে যি বৃহৎ পৰিমাণৰ সৌৰ শক্তি আৰু জলবিদ্যুৎ উৎপাদনৰ লক্ষ্য লৈছে, তাৰ বাবে অপৰিসীম ভূমি আৰু প্ৰাকৃতিক সম্পদৰ প্ৰয়োজন হ’ব।
বক্তাসকলে প্ৰশ্ন উত্থাপন কৰি কয় যে সমগ্ৰ উত্তৰ-পূৰ্বাঞ্চলৰ মুঠ শক্তিৰ প্ৰয়োজনীয়তা ৫০০০ মেগাৱাটতকৈ কম হোৱা সত্ত্বেও কিয় ইয়াত ইমান বিশাল শক্তি প্ৰকল্প নিৰ্মাণ কৰিবলৈ খোজা হৈছে। এই শক্তি কাৰ স্বাৰ্থত উৎপাদন কৰা হৈছে তাক লৈ জনসাধাৰণৰ মাজত তীব্ৰ সন্দেহৰ সৃষ্টি হৈছে।
অৰুণাচল প্ৰদেশৰ মানৱ অধিকাৰ কৰ্মী ইবো মিলিয়ে উল্লেখ কৰিছে যে ৰাজ্যখনত ৬০ হাজাৰ মেগাৱাট শক্তি উৎপাদনৰ পৰিকল্পনাৰ দ্বাৰা জনসাধাৰণৰ অধিকাৰ খৰ্ব কৰি পূৰণ কৰিব বিচৰা হৈছে। এই ব্যৱস্থাই অঞ্চলটোৰ পৰিৱেশ আৰু থলুৱা সংস্কৃতিৰ প্ৰতি তীব্ৰ ভাবুকি কঢ়িয়াই আনিছে।
সন্মিলনত বাঘজানৰ অগ্নিকাণ্ড, মেঘালয়ৰ খনি দুৰ্ঘটনা আৰু নিম্ন সোৱণশিৰি বান্ধৰ ভাবুকিৰ কথা উল্লেখ কৰি উন্নয়নৰ নামত চলা এই ধ্বংসলীলাৰ বিৰোধিতা কৰা হয়। জনজাতীয় সংগঠনসমূহে অভিযোগ কৰিছে যে চৰকাৰে বৃহৎ কৰ্পোৰেট গোষ্ঠীসমূহক সুবিধা কৰি দিবলৈ পৰিৱেশ সংৰক্ষণৰ দৰে গুৰুত্বপূৰ্ণ আইনসমূহ সংশোধন কৰিছে।
এই সন্মিলনৰ জৰিয়তে সংগঠনসমূহে কেইবাটাও গুৰুত্বপূৰ্ণ দাবী উত্থাপন কৰিছে। তেওঁলোকে ২০২৩ চনৰ বন সংৰক্ষণ সংশোধনী আইন বাতিল কৰাৰ দাবী জনাইছে যিয়ে সীমান্তৰ পৰা ১০০ কিলোমিটাৰ ভিতৰৰ বনাঞ্চল ধ্বংসৰ পথ মুকলি কৰিছে। ইয়াৰ উপৰি ষষ্ঠ অনুসূচীৰ সম্পূৰ্ণ ৰূপায়ণ, ভূমি অধিকাৰ আইন আৰু বন অধিকাৰ আইন ২০০৬ৰ সঠিক কাৰ্যকৰীকৰণৰ দাবী তোলা হৈছে। যিকোনো প্ৰকল্পৰ পূৰ্বে স্থানীয় ৰাইজৰ সন্মতি লোৱা আৰু বিস্থাপিত লোকক ১০০ শতাংশ সংস্থাপন দিয়াটো বাধ্যতামূলক কৰিবলৈ তেওঁলোকে চৰকাৰক সকীয়াই দিছে। উত্তৰ-পূবৰ জনসাধাৰণক নিজৰ মাটি আৰু অধিকাৰৰ বাবে এক শক্তিশালী গণতান্ত্ৰিক আন্দোলন গঢ়ি তুলিবলৈ আহ্বান জনাইছে এই সন্মিলনে ।
