ভুৱনেশ্বৰৰ কলিংগা ইনষ্টিটিউট অৱ ইণ্ডাষ্ট্ৰিয়েল টেকন’লজি ইউনিভাৰ্চিটিৰ এগৰাকী শিক্ষাৰ্থীৰ মৃতদেহ উদ্ধাৰৰ ঘটনাৰ উত্তেজনা এতিয়াও মাৰ যোৱা নাই। তাৰ মাজতে এইবাৰ কেৰালাত মিজোৰামৰ এজন ইঞ্জিনিয়াৰিঙৰ ছাত্ৰক হত্যা কৰাৰ অভিযোগ উত্থাপন হৈছে।
ভি এল ভেলেণ্টাইন নামৰ ছাত্ৰজনক হত্যা কৰাৰ অভিযোগত একেখন মহাবিদ্যালয়ৰে আন এগৰাকী ছাত্ৰক গ্ৰেপ্তাৰ কৰা হৈছে। ধৃত ছাত্ৰজনৰ নাম লামছাং। আৰক্ষীৰ সূত্ৰ অনুসৰি ভেলেণ্টাইনৰ এই সহপাঠীজনৰ ঘৰো মিজোৰামত।
কিছুদিন পূৰ্বে ছাত্ৰ-ছাত্ৰীৰ প্ৰতিবাদত উত্তাল হৈছিল ওড়িশাৰ কেআইআইটি। সেই শিক্ষানুষ্ঠানৰ হোষ্টেলৰ পৰা উদ্ধাৰ হয় প্ৰকৃতি লামছালৰ ওলমি থকা মৃতদেহ। ইয়াৰ পিছতে কলিংগা ইনষ্টিটিউট অৱ ইণ্ডাষ্ট্ৰিয়েল টেকন’লজি ইউনিভাৰ্চিটি (কে আই আই টি)ত নেপালী ছাত্ৰ-ছাত্ৰীয়ে প্ৰতিবাদ সাব্যস্ত কৰে। কাৰণ ২০ বছৰীয়া প্ৰকৃতি লামছালৰ ওলমি থকা মৃতদেহটো কেআইআইটিৰ হোষ্টেলৰ কোঠাৰ পৰা উদ্ধাৰ কৰা হৈছে। তাৰ পিছত সকলো নেপালী ছাত্ৰ-ছাত্ৰীক ঘৰলৈ পঠিয়াই দিয়াৰ অভিযোগ উত্থাপন হৈছে। মহাবিদ্যালয় কৰ্তৃপক্ষই তেওঁলোকক বলপূৰ্বকভাৱে বহিষ্কাৰ কৰাৰ অভিযোগ উত্থাপন কৰে ছাত্ৰ-ছাত্ৰীসকলে।
সেই ঘটনাৰ ঢৌ মাৰ যোৱাৰ আগতেই কেৰালাত মিজোৰামৰ এজন ২৩ বছৰীয়া ছাত্ৰক হত্যা কৰা হৈছে। আৰক্ষীৰ সূত্ৰ অনুসৰি ভেলেণ্টাইন তিৰুৱনন্তপুৰমৰ নাগাৰুৰপ ৰাজধানী ইনষ্টিটিউট অৱ ইঞ্জিনিয়াৰিং এণ্ড টেকন’লজিৰ চতুৰ্থ বৰ্ষৰ ছাত্ৰ। তেওঁৰ সহপাঠী লামছাঙে তেওঁক ঘপিয়াই হত্যা কৰাৰ অভিযোগ উঠে।
জানিব পৰা মতে, শনিবাৰে নিশা প্ৰায় ১০:৪৫ বজাত তাত থকা এখন ব্যক্তিগত অভিযান্ত্ৰিক মহাবিদ্যালয়ৰ সমীপত সংঘটিত হয় এই হত্যাকাণ্ড। আৰক্ষীৰ সূত্ৰৰ পৰা জানিব পৰা মতে, ছাত্ৰ-ছাত্ৰীৰ এটা দল বহি সুৰাপান কৰি আছিল। তেতিয়াই সিহঁতৰ মাজত কাজিয়া আৰম্ভ হ’ল। সেই সময়ত একাংশ ছাত্ৰই ভেলেণ্টাইনক আঘাত কৰিবলৈ ধৰে। গুৰুতৰভাৱে আঘাতপ্ৰাপ্ত হোৱা তেওঁক স্থানীয় চিকিৎসালয়লৈ লৈ যোৱা হয়। পিছত তেওঁক কেআইএমছ হাস্পতাললৈ লৈ যোৱা হয়। দেওবাৰে তাতেই তেওঁৰ মৃত্যু হয়।
এই ঘটনাত আৰক্ষীয়ে লামছাঙক জিম্মাত লৈছে। জনা যায় যে পূৰ্বে ভেলেণ্টাইনৰ লগত লামছাঙৰ কাজিয়া হৈছিল।
উল্লেখ্য যে কেৰালাৰ শিক্ষানুষ্ঠানসমূহত ছাত্ৰ-ছাত্ৰীৰ মাজত সংঘৰ্ষৰ ঘটনা ক্ৰমাৎ বৃদ্ধি পাইছে। এই সংঘৰ্ষৰ ফলত একাধিক শিক্ষাৰ্থীৰ মৃত্যু হৈছে।
