ইংলেণ্ডৰ অলৰাউণ্ডাৰ মঈন আলীয়ে টেষ্ট ক্ৰিকেটৰ পৰা অৱসৰ লোৱাৰ সিদ্ধান্ত লৈছে। ইংলেণ্ড এণ্ড ৱেলছ ক্ৰিকেট ব’ৰ্ডে (ECB) সোমবাৰে এক বিজ্ঞপ্তিত এই কথা সদৰী কৰে।
বৰ্তমান চেন্নাই চুপাৰ কিংছৰ সৈতে ইণ্ডিয়ান প্ৰিমিয়াৰ লীগ (আই পি এল) ২০২১ ত খেলি থকা মঈন আলীয়ে কয় যে যদিও তেওঁ টেষ্ট ক্ৰিকেট উপভোগ কৰিছিল, তেওঁ বৰ্তমান ইয়াৰ পৰা অব্যাহতি ল’ব বিচাৰে।
তেওঁ এতিয়া ক্ৰিকেটক উপভোগ কৰিব বিচাৰে আৰু যিমান সময় পাৰে সিমান সময় খেলিব বিচাৰে। টেষ্ট ক্ৰিকেটত তেওঁ যি প্ৰদৰ্শন আগবঢ়ালে তাত তেওঁ “সুখী আৰু সন্তুষ্ট” আছিল বুলিও মন্তব্য কৰে ৩৪ বৰ্ষীয় খেলুৱৈ গৰাকীয়ে।
“মোৰ বয়স এতিয়া ৩৪ বছৰ আৰু মই যিমান সময় পাৰোঁ খেলিব বিচাৰো আৰু মই কেৱল মোৰ ক্ৰিকেট উপভোগ কৰিব বিচাৰো।” ইচিবিৰ বিবৃতিত এই দৰে মঈন আলীৰ বক্তব্য উদ্ধৃত কৰা হয়।
২০১৪ চনত শ্ৰীলঙ্কাৰ বিৰুদ্ধে নিজৰ টেষ্ট কেৰিয়াৰ আৰম্ভ কৰা মঈন আলীয়ে ৬৪ খন টেষ্টত ইংলেণ্ডক প্ৰতিনিধিত্ব কৰি ২৮.২৯ গড়ে ২,৯১৪ ৰাণ সংগ্ৰহ কৰিছিল। দীৰ্ঘতম ফৰ্মেটটোত বাঁওহতীয়া বেটছমেনজনৰ নামত আছে পাঁচটা শতক আৰু ১৪ টা অৰ্ধ-শতক।
সোঁহাতীয়া অফ স্পিনাৰ হিচাপেও অলৰাউণ্ডাৰ গৰাকীয়ে ব্যাপক প্ৰভাৱ পেলাইছিল । টেষ্টত সৰ্বমুঠ ১৯৫ টা উইকেট লাভ কৰিছিল মঈন আলীয়ে। টেষ্ট ক্ৰিকেটত পাঁচবাৰ পাঁচ বা তাতকৈ অধিক উইকেট দখল কৰা মঈন আলীৰ শ্ৰেষ্ঠ প্ৰদৰ্শন হৈছে ৬/৫৩, দক্ষিণ আফ্ৰিকাৰ বিৰুদ্ধে লৰ্ডছত তেওঁ এই সফলতা পাইছিল।
মইন আলীয়ে তেওঁৰ টেষ্ট কেৰিয়াৰত তেওঁলোকৰ সমৰ্থনৰ বাবে তেওঁৰ প্ৰশিক্ষক, অধিনায়ক আৰু তেওঁৰ পৰিয়ালৰ সকলোকে ধন্যবাদ জনায়।
