নিউজিলেণ্ডৰ পথকে অনুসৰণ কৰিলে এইবাৰ ইংলেণ্ডেও। একেদৰে পাকিস্তান ভ্ৰমণ বাতিল কৰাৰ সিদ্ধান্ত ল’লে ইংলেণ্ড ক্ৰিকেট বোৰ্ডে।
সোমবাৰে আনুষ্ঠানিকভাৱে জনাই দিয়া হ’ল যে অহা মাহত পাকিস্তানত অনুষ্ঠিত হ’বলগীয়া মহিলা আৰু পুৰুষ দলৰ ছিৰিজৰ বাবে দল প্ৰেৰণ নকৰে ইংলেণ্ডে।
যোৱা ১৭ ছেপ্টেম্বৰত পাকিস্তানৰ মাটিত নিউজিলেণ্ডৰ ছিৰিজ আৰম্ভ হোৱাৰ কথা আছিল। কিন্তু খেলাৰ প্ৰাক মুহূৰ্ততে হঠাতে নিউজিলেণ্ডে দেশখনত নেখেলাৰ কথা জনাই দিয়ে।
নিৰাপত্তাক লৈ অসন্তুষ্টি প্ৰকাশ কৰিয়েই এই সিদ্ধান্ত লোৱা হৈছিল। খেলপথাৰত নমাৰ পৰিৱৰ্তে নিজ দেশলৈ উভতি যায় নিউজিলেণ্ড ক্ৰিকেট দল।
নিউজিলেণ্ডৰ এনে সিদ্ধান্তৰ বাবে ক্ষোভ প্ৰকাশ কৰে পাকিস্তান ক্ৰিকেট বোৰ্ডে। নিউজিলেণ্ড ক্ৰিকেট বোৰ্ডক আক্ৰমণ কৰি পাকিস্তানৰ ক্ৰিকেটাৰ তথা প্ৰাক্তন ক্ৰিকেটাৰসকলে বক্তৱ্য প্ৰকাশ কৰে।
কিন্তু ইয়াৰ ঢৌ মাৰ নৌযাওতেই পুনৰ ইংলেণ্ড ক্ৰিকেট বোৰ্ডে দিলে হাতাশাজনক খৱৰ। ক্ৰিকেটাৰ তথা ষ্টাফসকলৰ নিৰাপত্তাৰ কথা ভাৱিয়েই পাকিস্তান ভ্ৰমণ বাতিল কৰাৰ কথা সদৰী কৰে ইংলেণ্ড ক্ৰিকেট বোৰ্ডে। এনে সিদ্ধান্ত বাবে পাকিস্তান ক্ৰিকেট বোৰ্ডৰ ওচৰত ক্ষমাও বিচাৰে।
সূচী অনুসৰি, অহা ১৩ আৰু ১৪ অক্টোবৰত ৰাৱালপিণ্ডিত পাকিস্তানৰ বিৰুদ্ধে ইংলেণ্ডৰ মহিলা আৰু পুৰুষ দলে টী-২০ মেচ খেলাৰ কথা আছিল। সেইদৰে, ১৭ৰ পৰা ২১ অক্টোবৰলৈকে ইংলেণ্ডৰ মহিলা দলে তিনিখন এদিনীয়া মেচৰ ছিৰিজ খেলাৰ কথা আছিল।
কিন্তু এই সমস্ত কাৰ্যসূচী বাতিল কৰি পাকিস্তানলৈ দল নপঠিওৱাৰ সিদ্ধান্ত লয় ইংলেণ্ড ক্ৰিকেট বোৰ্ডে। অৱশ্যে ২০২২ত ইংলেণ্ড দলৰ পাকিস্তান ভ্ৰমণৰ আশ্বাস দিছে বোৰ্ডখনে।
দেশখনত সন্ত্ৰাসবাদ তথা সন্ত্ৰাসবাদী আক্ৰমণৰ বাবে দীৰ্ঘদিন ধৰি পাকিস্তানৰ মাটিত ক্ৰিকেট বন্ধ আছিল। লাহে লাহে পৰিস্থিতি স্বাভাৱিক হৈছে যদিও সকলো দেশে ইয়াত খেলিবলৈ সাজু হোৱা নাই। নিউজিলেণ্ডৰ পাছত এইবাৰ ইংলেণ্ডৰ সিদ্ধান্তত স্বাভাৱিকতে হতাশ হৈ পৰিছে পাকিস্তান ক্ৰিকেট বোৰ্ড।