কেন্দ্ৰীয় পৰিৱেশ, বন আৰু জলবায়ু পৰিৱৰ্তন মন্ত্ৰালয়ে পৰিৱেশ (সুৰক্ষা) আইন, ১৯৮৬ৰ অধীনত অসমৰ গুৱাহাটীৰ দীপৰ বিল বন্যপ্ৰাণী অভয়াৰণ্যৰ কাষৰীয়া অঞ্চলসমূহক পৰিৱেশন সংবেদনশীল অঞ্চল(ইক’ চেন্সিটিভ জ’ন) ৰ প্ৰস্তাৱেৰে এক অধিসূচনা প্ৰকাশ কৰিছে।
অধিসূচনা অনুসৰি খচৰা প্ৰস্তাৱৰ ওপৰত আপত্তি বা পৰামৰ্শ দাখিল কৰিবলৈ আগ্ৰহী যিকোনো ব্যক্তিয়ে ৬০ দিনৰ ভিতৰত আপত্তি বা পৰামৰ্শ দাখিল কৰিব পাৰিব।
খচৰা অনুসৰি ‘ইক’–চেন্সিটিভ জ’নৰ পৰিসৰ দীপৰ বিল বন্যপ্ৰাণী অভয়াৰণ্যৰ সীমাৰ চাৰিওফালে ২৫.২৯৪ মিটাৰৰ পৰা ৫ কিলোমিটাৰলৈকে থাকিব। ই মুঠ ৩৮.৮৪ বৰ্গ কিলোমিটাৰ অঞ্চল সামৰি ল’ব।
মন্ত্ৰালয়ৰ মতে, জলাশয় আৰু ইয়াৰ বন্যপ্ৰাণীক প্ৰদূষণ আৰু ক্ৰমবৰ্ধমান উন্নয়নৰ পৰা ৰক্ষা কৰিবলৈ এই প্ৰস্তাৱ আগবঢ়োৱা হৈছে।
দীপৰ বিলৰ কাষৰীয়া অঞ্চলক পৰিৱেশন সংবেদনশীল অঞ্চল হিচাপে ঘোষণা কৰিলে নিৰ্মাণ, খনন আৰু পৰ্যটনৰ দৰে কাৰ্য্যকলাপ নিয়ন্ত্ৰণত থকাৰ লগতে প্ৰদূষণৰ মাত্ৰাও হ্ৰাস পাব।
উল্লেখ্য যে দীপৰ বিলত প্ৰায় ১৫০ টা প্ৰজাতিৰ চৰাই পোৱা যায়। ইয়াৰে দুটা প্ৰজাতি সংকটজনকভাৱে বিপন্ন, এটা বিলুপ্তপ্ৰায়, পাঁচটা দুৰ্বল আৰু চাৰিটা ভাবুকিৰ সন্মুখীন হোৱা প্ৰজাতি। ইয়াৰ উপৰিও দীপৰ বিলত ১২টা প্ৰজাতি সৰীসৃপ, ৫০ প্ৰজাতিৰ মাছ, ৬ প্ৰজাতিৰ উভচৰ আৰু ১৫৫ প্ৰজাতিৰ জলজ পতংগ পোৱা যায়।
গ্ৰীষ্মকালত এই জলাশয় ৩০ বৰ্গ কিলোমিটাৰ পৰ্যন্ত প্ৰসাৰিত হয় আৰু শীতকালত প্ৰায় ১০ বৰ্গ কিলোমিটাৰলৈ হ্ৰাস পায়। এই জলাশয়ৰ ভিতৰত বন্যপ্ৰাণী অভয়াৰণ্যখনৰ পৰিসৰ ৪.১ বৰ্গ কিলোমিটাৰ।
ইয়াৰ পূৰ্বে গুৱাহাটী উচ্চ ন্যায়ালয়ে দীপৰ বিল বন্যপ্ৰাণী অভয়াৰণ্যৰ কাষৰীয়া অঞ্চলক পৰিৱেশ সংবেদনশীল অঞ্চল হিচাপে নিৰ্ধাৰণ কৰি ২০২৪ চনৰ ১৮ জানুৱাৰীৰ ভিতৰত অসম চৰকাৰক অধিসূচনা জাৰি কৰিবলৈ নিৰ্দেশ দিছিল।
২০২৪ চনৰ ফেব্ৰুৱাৰী মাহত ৰাজ্য চৰকাৰে উচ্চ ন্যায়ালয়ৰ সন্মুখত দাখিল কৰিছিল যে দীপৰ বিল বন্যপ্ৰাণী অভয়াৰণ্যক পৰিৱেশ সংবেদনশীল অঞ্চল হিচাপে ঘোষণা কৰা খচৰা অধিসূচনা প্ৰস্তুত কৰা হৈছিল আৰু এতিয়া সেই খচৰা দুসপ্তাহৰ ভিতৰত অনুমোদনৰ বাবে ৰাজ্যিক মন্ত্ৰীসভাৰ সন্মুখত ৰখা হ’ব, আৰু কেবিনেটে সমৰ্থন কৰাৰ পিছত অনুমোদনৰ বাবে কেন্দ্ৰলৈ প্ৰেৰণ কৰা হ’ব।
