ইথিওপিয়াৰ হাইলি গুব্বি আগ্নেয়গিৰিত যোৱা ২৩ নৱেম্বৰত প্ৰায় ১২ হাজাৰ বছৰৰ পিছত প্ৰথমবাৰৰ বাবে বিস্ফোৰণ ঘটিছিল। এই বিস্ফোৰণৰ ফলত প্ৰায় ১৪ কিলোমিটাৰ ওখকৈ এক বৃহৎ ছাইৰ স্তম্ভ নিৰ্গত হয়।
এই ছাই ডাৱৰটো উত্তৰ ভাৰতৰ দিশে ঘণ্টাত ১০০-১২০ কিলোমিটাৰ বেগেৰে গতি কৰি আছে আৰু মঙলবাৰে নিশাৰ ভিতৰত গুজৰাট, ৰাজস্থান, উত্তৰ-পশ্চিম মহাৰাষ্ট্ৰ, দিল্লী, হাৰিয়ানা, পঞ্জাৱ আদি ৰাজ্যত উপস্থিত হোৱাৰ সম্ভাৱনা আছে। পিছলৈ হিমালয় অঞ্চলতো ইয়াৰ প্ৰভাৱ পৰিব পাৰে বুলি বিশেষজ্ঞ সকলে সদৰী কৰিছে ।
উল্লেখ্য যে ইথিওপিয়াৰ ৰিফ্ট ভেলীৰ আফাৰ অঞ্চলত অৱস্থিত এই আগ্নেয়গিৰিটোৰ উচ্চতা প্ৰায় ৫০০ মিটাৰ। আগ্নেয়গিৰিৰ ছাইত চালফাৰ ডাই অক্সাইড, মিহি শিল আৰু কাঁচৰ কণা থাকে আৰু ই ১৫,০০০ৰ পৰা ৪৫,০০০ ফুটৰ উচ্চতাত গতি কৰি আছে।
ইতিমধ্যে ইয়াৰ ফলত ভাৰতত বিমান পৰিবহণত প্ৰভাৱ পৰিছে। ইণ্ডিগ’, আকাছা এয়াৰকে ধৰি বিমান সংস্থাসমূহে ক্ষতিগ্ৰস্ত পথসমূহৰ বাবে বিমান সেৱা বাতিল কৰিছে। আকাছা এয়াৰে জেদ্দা, কুৱেইট, আৰু আবুধাবিলৈ অহা-যোৱা কৰা বিমান সেৱা বাতিল কৰে। ইণ্ডিগোৱে পৰিস্থিতি নিবিড়ভাৱে নিৰীক্ষণ কৰি আছে আৰু যাত্ৰীসকলক সহায় কৰিবলৈ সাজু হৈ আছে বুলি জানিবলৈ দিছে। এয়াৰ ইণ্ডিয়াই এই পৰ্যন্ত কোনো উৰণ বাতিল নকৰিলেও, পৰিস্থিতিৰ ওপৰত তীক্ষ্ণ দৃষ্টি ৰাখিছে।
অসামৰিক বিমান পৰিবহণ সঞ্চালকালয়ে (ডিজিচিএ) সকলো ভাৰতীয় অপাৰেটৰলৈ বিশেষ নিৰ্দেশনা জাৰি কৰিছে। এই নিৰ্দেশনা অনুসৰি, অপাৰেটৰসকলে উৰণ পৰিকল্পনা সংশোধন কৰা, ছাই ডাৱৰৰ দ্বাৰা প্ৰভাৱিত অঞ্চল এৰাই চলি, ইন্ধনৰ বোজা সামঞ্জস্য কৰা, আৰু আগ্নেয়গিৰিৰ ছাইৰ ওচৰত উৰণৰ সময়ত সুৰক্ষা প্ৰট’কল কঠোৰভাৱে পালন কৰিব লাগিব।
সামগ্ৰিকভাৱে এই বিস্ফোৰণৰ ফলত এতিয়ালৈকে কোনো লোকৰ মৃত্যু হোৱা নাই যদিও ইয়াৰ ফলত ওচৰৰ গাঁওসমূহ ছাইৰে আবৃত হৈ পৰিছে, যাৰ ফলত ইথিওপিয়াৰ স্থানীয় পশুধনসমূহৰ ওপৰত প্ৰভাৱ পৰিছে। এই পৰিঘটনাটো ভূতাত্ত্বিক বিশেষজ্ঞ আৰু বিমান কৰ্তৃপক্ষই নিবিড়ভাৱে নিৰীক্ষণ কৰি আছে যাতে ছাইৰ ডাৱৰ দক্ষিণ এছিয়াৰ দিশে গতি কৰাৰ লগে লগে বিঘিনি কম হয় আৰু সুৰক্ষা নিশ্চিত কৰিব পাৰি।
