যোৱা নিশাৰ পৰা অন্ধ্ৰ প্ৰদেশত ধাৰাসাৰ বৰষুণ আৰম্ভ হৈছে। ইয়াৰ লগত প্ৰচণ্ড বতাহ। বতৰ বিজ্ঞান বিভাগৰ পূৰ্বাভাস অনুসৰি মঙলবাৰে বিয়লি মোন্থা ঘূৰ্ণীবতাহে আঘাত হানিব। প্ৰবল নিম্নচাপ ইতিমধ্যে ঘূৰ্ণীবতাহলৈ ৰূপান্তৰিত হৈছে।
ৰাজ্যজুৰি জাৰি কৰা হৈছে ৰেড এলাৰ্ট। আগতীয়া সতৰ্কতা হিচাপে ৰে’লৱেই বাতিল কৰিছে ৬৫খনতকৈও অধিক স্থানীয় আৰু এক্সপ্ৰেছ ৰে’ল। ইণ্ডিগ’ আৰু এয়াৰ ইণ্ডিয়া এক্সপ্ৰেছৰ সকলো বিমানো বাতিল কৰা হৈছে।
ইষ্ট ক’ষ্ট ৰে’লৱেই জনাইছে যে ২৯ অক্টোবৰলৈকে বিশাখাপট্টনম-তিৰুপতি, বিশাখাপট্টনম-চেন্নাই, বিশাখাপট্টনম-কিৰাণ্ডুল, বিশাখাপট্টনম-কোৰাপুট পথত ৰে’ল সেৱা বন্ধ থাকিব। বতৰ স্বাভাৱিক নোহোৱালৈকে সেৱা আৰম্ভ নহ’ব বুলি ৰে’ল বিভাগৰ বিষয়াসকলে জনাইছে।
ঘূৰ্ণীবতাহৰ প্ৰভাৱৰ বাবে বিমান যাতায়তো ব্যাহত হৈ পৰিছে। ২৮ অক্টোবৰ মঙলবাৰে ইণ্ডিগ’ আৰু এয়াৰ ইণ্ডিয়া এক্সপ্ৰেছৰ সকলো বিমান বাতিল কৰা হৈছে। বিমান সংস্থাই যাত্ৰীসকলক বিমানবন্দৰলৈ যোৱাৰ পূৰ্বে বিমানৰ ষ্টেটাছ পৰীক্ষা কৰিবলৈ পৰামৰ্শ দিছে। উপকূলীয় অন্ধ্ৰ প্ৰদেশ আৰু ওড়িশাৰ সকলো বিদ্যালয়ো বন্ধ কৰি দিয়া হৈছে। বৃহস্পতিবাৰলৈকে সাগৰলৈ যোৱাত নিষেধাজ্ঞা আৰোপ কৰিছে ৰাজ্য চৰকাৰে।
চন্দ্ৰবাবু নাইডু চৰকাৰে অন্ধ্ৰ প্ৰদেশৰ উপকূলীয় অঞ্চলৰ পৰা স্থানীয় বাসিন্দাক সুৰক্ষিত স্থানলৈ স্থানান্তৰিত কৰাৰ কাম আৰম্ভ কৰিছে। এনডিআৰএফ আৰু এছডিআৰএফ নিয়োগ কৰা হৈছে। ৰাজ্যজুৰি মুকলি কৰা হৈছে ৪০০টা অস্থায়ী শিবিৰ। বতৰ বিজ্ঞান বিভাগে প্ৰতি ঘণ্টাত ঘূৰ্ণীবতাহৰ গতিবিধি নিৰীক্ষণ কৰি আছে। প্ৰধানমন্ত্ৰী নৰেন্দ্ৰ মোদীয়েও পৰিস্থিতি মোকাবিলাৰ বাবে গ্ৰহণ কৰা পদক্ষেপ সন্দৰ্ভত মুখ্যমন্ত্ৰীৰ সৈতে ফোনযোগে বাৰ্তালাপ কৰে।
বতৰ বিজ্ঞান বিভাগৰ পূৰ্বাভাস অনুসৰি মঙলবাৰে বিয়লি বা সন্ধিয়া মাচিলিপট্টনম আৰু কলিংগপট্টনমৰ মাজত ঘূৰ্ণীবতাহ মোন্থাই আঘাত কৰিব পাৰে। সেই সময়ত বতাহৰ গতিবেগ ঘণ্টাত ৯০ৰ পৰা ১০০ কিলোমিটাৰ হ’ব পাৰে। অনুমান কৰা হৈছে যে ধুমুহাৰ গতি সৰ্বাধিক ১০০ কিলোমিটাৰ পৰ্যন্ত হ’ব পাৰে।
ওড়িশাতো দুৰ্যোগৰ আশংকা আছে। ইতিমধ্যে ওড়িশাৰ উপকূলৰ ৮খন জিলাৰ বাসিন্দাক নিৰাপদ স্থানলৈ স্থানান্তৰ কৰা হৈছে। বতৰ বিজ্ঞান বিভাগে তেলেংগানা আৰু চেন্নাইত প্ৰবল বৰষুণৰ ভৱিষ্যদ্বাণী কৰিছে।
