ৰাজ্যৰ বিত্তীয় ভৱিষ্যতক লৈ ‘কেগ’-এ বাৰম্বাৰ উদ্বেগ প্ৰকাশ কৰাৰ পাছতো ঋণ লোৱাৰ পৰা বিৰত থকা নাই ডঃ হিমন্ত বিশ্ব শৰ্মাৰ অসম চৰকাৰে। ২০২৬ৰ নিৰ্বাচনৰ প্ৰাকক্ষণত হিতাধিকাৰী আঁচনিৰ ধন বিতৰণৰ বাবে বিদায়ী ২০২৫ বৰ্ষৰ অন্তিমটো ঋণ হিচাপে পুনৰ ১,০০০ কোটি টকা ল’বলৈ সাজু হৈছে ড° হিমন্ত বিশ্ব শৰ্মা নেতৃত্বাধীন চৰকাৰ।
বণ্ড বন্ধকত দি চলিত মাহৰ ৩০ ডিচেম্বৰত ৰাজ্য চৰকাৰে এই ১,০০০ কোটি টকাৰ ঋণ ল’ব। ইয়াৰ বাবে ২০ বছৰৰ বাবে চৰকাৰী বণ্ড বন্ধকত থ’বলৈ ভাৰতীয় ৰিজাৰ্ভ বেংকৰ ওচৰত ইতিমধ্যে প্ৰস্তাৱ দাখিল কৰা হৈছে। উল্লেখযোগ্য যে মাত্ৰ দুসপ্তাহ পূৰ্বে অর্থাৎ ১৬ ডিচেম্বৰত ৯০০ কোটি টকাৰ ঋণ লৈছিল হিমন্ত বিশ্ব শৰ্মাৰ চৰকাৰে।
২০২৫ চনৰ ৭ জানুৱাৰীত ৫০০ কোটি টকাৰ ঋণেৰে বছৰটো আৰম্ভ কৰা চৰকাৰখনে ৩০ ডিচেম্বৰৰ এই ঋণ যোগ কৰিলে কেৱল চলিত বৰ্ষটোতে লোৱা মুঠ ঋণৰ পৰিমাণ হ’বগৈ ১৭,২০০ কোটি টকা। ইয়াৰ উপৰিও নিৰ্বাচনৰ পূৰ্বে হিতাধিকাৰী আঁচনিসমূহ সুচাৰুৰূপে চলাবলৈ অহা ফেব্ৰুৱাৰী মাহৰ ভিতৰত আৰু ৩,০০০ কোটি টকাৰ ঋণ লোৱাৰ পৰিকল্পনা কৰিছে বিত্ত বিভাগে।
ৰিজাৰ্ভ বেংক আৰু কেগৰ তথ্য অনুসৰি, হিমন্ত বিশ্ব শৰ্মাৰ চৰকাৰখনে পাঁচ বছৰীয়া কাৰ্যকালত লোৱা ঋণৰ পৰিমাণে পূৰ্বৰ সকলো অভিলেখ ভংগ কৰিছে। মুখ্যমন্ত্ৰী হিমন্ত বিশ্ব শৰ্মাই এটা কাৰ্যকালতে প্ৰায় ৮৮,২৭৪ কোটি টকাৰ ঋণ লৈ অসমৰ ইতিহাসত সৰ্বাধিক ঋণ লোৱা মুখ্যমন্ত্ৰী হিচাপে পৰিগণিত হ’বলৈ আগবাঢ়িছে।
উল্লেখ্য যে, ঋণত পোত যোৱা চৰকাৰখনে অহা ১০ বছৰৰ ভিতৰত সুতসহ মুঠ ১,৫৯,২০৯.৮৫ কোটি টকাৰ ঋণ পৰিশোধ কৰিব লাগিব, যিটো ৰাজ্যৰ অৰ্থনীতিৰ বাবে এক বিৰাট প্ৰত্যাহ্বান হৈ পৰিছে।
ইপিনে চৰকাৰে ব্যাপক উন্নয়নৰ ‘জয়ঢোল’ বজাই থাকিলেও, কেগৰ প্ৰতিবেদনে উদঙাই দিছে ৰাজ্যৰ ফোপোলা বিত্তীয় স্বৰূপটো। ‘বাহিৰে ৰংচং ভিতৰে কোৱাভাতুৰী’ সদৃশ এই বিত্তীয় নীতিয়ে অসমৰ ভৱিষ্যত প্ৰজন্মক এক গভীৰ অৰ্থনৈতিক সংকটৰ ফালে ঠেলি দিয়াৰ আশংকাই এতিয়া সচেতন মহলক চিন্তিত কৰি তুলিছে।
