‘সকলোৰে এটাই আশা খিলঞ্জীয়াৰ অস্তিত্ব সুৰক্ষিত হ’ব লাগে’ : নতুন ৰাজনৈতিক দলক লৈ মুখ খুলিলে বৰষাই
কালি আত্মপ্ৰকাশ হোৱা নতুন ৰাজনৈতিক দল ‘অসম জাতীয় পৰিষদ’ৰ সন্দৰ্ভত মুখ খুলিছে অভিনেত্ৰী বৰষা ৰাণী বিষয়াই।
গুৱাহাটী প্ৰেছ ক্লাৱৰ এক অনুষ্ঠানত অংশগ্ৰহণ কৰি অভিনেত্ৰীগৰাকীয়ে এই সন্দৰ্ভত কয় ‘সকলোৰে এটাই আশা খিলঞ্জীয়াৰ অস্তিত্ব সুৰক্ষিত হ’ব লাগে। জাতি, ভাষা, সংস্কৃতি সুৰক্ষিত হ’ব লাগে।’
ইপিনে, নতুনকৈ গঠন হোৱা ৰাজনৈতিক দলটোক আদৰণি জনোৱা বুলি উল্লেখ কৰি ভৱিষ্যৎ কৰ্মপন্থা কেনেকুৱা হ’ব তাৰ উত্তৰ পাছতহে পোৱা যাব বুলি তেওঁ মন্তব্য কৰে।
তেওঁ কয় ‘নতুন আহিব, আহি থাকিব আৰু আমি আদৰি লৈ থাকো, নতুনে কি দি আহিছে সেয়া ভৱিষ্যতেহে উত্তৰ পোৱা যাব।‘
ইপিনে, নতুনকৈ গঠিত হোৱা ৰাজনৈতিক দলটোৰ নেতৃত্বই বিষয়াৰ সৈতে যোগাযোগ কৰিছে নেকি বা তেওঁ যোগদানৰ সম্ভাৱনা আছে নেকি বুলি সাংবাদিকে প্ৰশ্ন কৰে।
উত্তৰত তেওঁ কয় ‘আমি শিল্পী আমাৰ সকলোৰে লগতে ভাল গতিকে আমি কি কৰিম? মই প্ৰত্যক্ষ ৰাজনীতিৰ লগত জড়িত নহওঁ।‘
ইপিনে, ৰাজ্যৰ ৬৩ শতাংশ যুৱ ভোটাৰে ধৰ্ম, আঠুৱা কম্বলৰ উৰ্দ্ধত ৰাজনীতি হোৱাটো বিচাৰে বুলি তেওঁ উল্লেখ কৰে।
তেওঁ কয় ‘৬৩ শতাংশ যুৱ প্ৰজন্মৰ ভোটাৰ আৰু আমাকো ধৰ্ম, আঠুৱা, কম্বলৰ উৰ্দ্ধত ৰাজনীতি লাগে।আমাক প্ৰগতি লাগে আৰু জাতি সুৰক্ষিত হ’ব লাগে।‘