ৰাজ্যৰ বিভিন্ন প্ৰান্তত মাইক্ৰ’ফাইনেন্স প্ৰতিষ্ঠানৰ বিৰুদ্ধে গ্ৰাহকসকলে বিভিন্ন অভিযোগ উত্থাপনেৰে প্ৰতিবাদী কাৰ্যসূচী গ্ৰহণ কৰি আহিছে।
দেশৰ লগতে ৰাজ্যতো অতিমাৰী ক’ৰ’ণাৰ প্ৰতিৰোধৰ বাবে লকডাউন বলৱৎ কৰাৰ ফলত এই আন্দোলনসমূহ কিছু পৰিমাণে স্তিমিত হৈ পৰা দেখা গৈছিল।
আনলক বলৱৎ কৰি চৰকাৰে লকডাউনৰ বিভিন্ন ক্ষেত্ৰত শীথিলতা অনাৰ লগে লগে পুনৰ ৰাজ্যত মাক্ৰ’ফাইনেন্স প্ৰতিষ্ঠানৰ বিৰুদ্ধে গ্ৰাহকসকলে প্ৰতিবাদী কাৰ্যসূচী পুনৰ আৰম্ভ কৰিছে।
আজি যোৰহাট জিলাৰ টিয়কতো বিভিন্ন মাইক্ৰ’ফাইনেন্সকে ধৰি সকলো ক্ষুদ্ৰ ঋণ চৰকাৰে মাফ কৰা, মাইক্ৰ’ফাইনেন্সৰ শোষণ অত্যাচাৰ বন্ধ কৰা, প্ৰচেচিং চাৰ্ভিচ টেস্ক ৰিচিভ আৰু ঋণদাতাসকলক অতি শীঘ্ৰেই ইঞ্চুৰেন্স পলিচি প্ৰদান কৰাৰ দাবীৰে প্ৰতিবাদ সাৱ্যস্ত কৰা হয়।
বন্ধন গোটৰ কাৰ্যালয়ত সদৌ অসম চাহ জনগোষ্ঠী অধিকাৰ সংগ্ৰাম সমিতি, সন্মিলিত নাৰী অধিকাৰ সংগ্ৰাম সমিতি আৰু মাইক্ৰ’ফাইনেন্স শোষণ বিৰোধী সংগ্ৰামী মঞ্চৰ উদ্যোগত এক প্ৰতিবাদী কাৰ্যসূচী ৰূপায়ণ কৰে।
প্ৰায় শতাধিক পুৰুষ মহিলাই এই প্ৰতিবাদত অংশগ্ৰহণ কৰি মাইক্ৰ’ফাইনেন্স বন্ধ কৰক, কিস্তি তোলা বন্ধ কৰক আদি শ্ল’গানেৰে উত্তাল কৰি তোলে সমগ্ৰ পৰিবেশl
কিস্তি তুলিবলৈ যোৱা এজেন্টসকলৰ ব্যৱহাৰৰ ওপৰতো প্ৰশ্ন উত্থাপন কৰে প্ৰতিবাদীসকলে।
ইয়াৰ লগতে এনেকুৱা ফাইনেন্স কোম্পানীবোৰক নাকি লগাবলৈ চৰকাৰক দাবী জনায় প্ৰতিবাদকাৰীসকলে।
উল্লেখযোগ্য যে প্ৰতিবাদী কাৰ্যসূচী চলি থকাৰ অৱস্থাতে বন্ধন গোটৰ দুই কৰ্মচাৰীৰে প্ৰতিবাদকাৰীৰ লগত খণ্ড যুদ্ধত লিপ্ত হোৱাত উত্তপ্ত পৰিস্থিতিৰ সৃষ্টি হয় যদিও পৰৱৰ্তী সময়ত আৰক্ষীৰ উপস্থিতিত সংগ্ৰামী ছাত্ৰ নেতা লক্ষ্মণ চাওৰাৰ সহযোগত ঘটনাটো মীমাংসা হয়।