উত্তৰ-পূব সীমান্ত ৰেলৱেই বেদখল চিনাক্ত কৰিবলৈ নিয়মীয়া জৰীপ চলাই আহিছে আৰু সেইসমূহ উচ্ছেদ কৰাৰ বাবে প্ৰয়োজনীয় ব্যৱস্থা গ্ৰহণ কৰিছে। অননুমোদিত দখলে ৰে’ল পৰিচালনত ব্যাঘাত জন্মায়, সুৰক্ষাৰ প্ৰতি বিপদ মাতি অনাৰ লগতে ট্ৰেক ৰক্ষণাবেক্ষণ আৰু আন্তঃগাঁথনিৰ বিকাশ কাৰ্যত বাধা দিয়ে।
ইয়াৰ উপৰিও, এনেধৰণৰ বেদখলে অপৰাধমূলক কাৰ্যকলাপ আৰু নিচাযুক্ত দ্ৰব্যৰ ব্যৱহাৰত অৰিহণা যোগায়, যাৰ ফলত অঞ্চলটোৰ সুৰক্ষাৰ বাবে এক গুৰুতৰ ভাবুকিৰ সৃষ্টি হয়। উত্তৰ পূব সীমান্ত ৰে’লৱেই এই কাৰ্যকলাপসমূহ প্ৰতিৰোধ কৰিবলৈ আৰু ৰে’লৱে সম্পত্তি আৰু ৰে’লৱে সম্প্ৰদায়ৰ নিৰাপত্তা নিশ্চিত কৰিবলৈ প্ৰতিশ্ৰুতিবদ্ধ হৈ আহিছে।
এই প্ৰচেষ্টাৰ অংশ হিচাপে, উত্তৰ পূব সীমান্ত ৰে’লৱেৰ অধীনৰ লামডিং মণ্ডলৰ নিউ গুৱাহাটী কমপ্লেক্সত ৭ ফেব্ৰুৱাৰী ২০২৫ তাৰিখে উচ্ছেদ অভিযান চলোৱা হয়। ৰে’লৱে সুৰক্ষা বাহিনীৰ সহযোগত নিউ গুৱাহাটীৰ ২০ জন ৰে’ল কৰ্মচাৰীৰ লগতে স্থানীয় আৰক্ষীৰ ২৪ জন বিষয়া আৰু কৰ্মচাৰীৰ উপস্থিতিত এই অভিযান চলোৱা হয়।
চান্দমাৰীৰ সহকাৰী আৰক্ষী আয়ুক্ত (এচিপি)ৰ তত্বাৱধানত এই অভিযান সম্পাদন কৰা হয়।উচ্ছেদ অভিযানৰ সময়ত, মুঠ ৬৮টা অননুমোদিত কোৱাৰ্টাৰ খালী কৰা হয় আৰু এনেদৰে মাহটোৰ ভিতৰত মুঠ ১০৩টা কোৱাৰ্টাৰ দখলমুক্ত কৰা হয়।
উল্লেখ্য যে পূৰ্বতে উচ্ছেদ কৰা ৰে’ল কোৱাৰ্টাৰসমূহত অবৈধভাৱে প্ৰৱেশ কৰাৰ বাবে ৪ জন লোকক কৰায়ত্ত কৰা হয়। উচ্ছেদৰ পূৰ্বে, চান্দমাৰীৰ এচিপিয়ে সকলো আৰক্ষী কৰ্মীক অৱগত আৰু নিশ্চিত কৰে যে এই অভিযানটো যাতে এক প্ৰণালীবদ্ধ, আইনসঙ্গত আৰু শান্তিপূৰ্ণভাৱে পৰিচালন কৰা হয়। ৰে’লৱে কৰ্তৃপক্ষ আৰু আইন প্ৰৱৰ্তনকাৰী সংস্থাসমূহৰ মাজত সম্পূৰ্ণ সহযোগিতাৰে এই উচ্ছেদ সুচাৰুৰূপে আগবাঢ়ে।
একেদিনাই এক পৃথক উচ্ছেদ অভিযানত উত্তৰ-পূব সীমান্ত ৰে’লৱেই লামডিং মণ্ডলৰ মালিগাঁও আৰু পাণ্ডু অঞ্চলত অননুমোদিত অধিবাসীসকলক আঁতৰাবলৈ এক অভিযান চলায়। কামাখ্যা চকীৰ পৰা ৰে’লৱে সুৰক্ষা বাহিনী আৰু জালুকবাৰী আৰক্ষী থানাৰ স্থানীয় আৰক্ষীৰ সহায়ত ৰে’লৱে অভিযান্ত্ৰিক বিভাগে সফলতাৰে উচ্ছেদ অভিযান সম্পন্ন কৰে।
অভিযানৰ সময়ত, ১০টা ৰে’লৱে কোৱাৰ্টাৰৰ পৰা অবৈধ অধিবাসীসকলক কোনো হস্তক্ষেপ অবিহনে সুচাৰুৰূপে উচ্ছেদ কৰা হয়। ৰে’ল সম্পত্তি সুৰক্ষিত কৰিবলৈ উত্তৰ পূব সীমান্ত ৰে’লৱে প্ৰতিশ্ৰুতিবদ্ধ আৰু অননুমোদিত দখল প্ৰতিৰোধ কৰিবলৈ প্ৰয়োজনীয় পদক্ষেপ অব্যাহত ৰাখিব।
উত্তৰ-পূব সীমান্ত ৰে’লৱেই সকলো ব্যক্তিক আইনসন্মত নিয়মাৱলী মানি চলিবলৈ আৰু অননুমোদিত দখলখালী কৰিবলৈ আহ্বান জনাইছে। নিৰ্মাণাধীন আন্তঃগাঁথনি উন্নয়নমূলক কাৰ্যসূমহত সুবিধা প্ৰদান কৰাৰ লগতে সুৰক্ষিত আৰু দক্ষ ৰে’ল পৰিচালন নিশ্চিত কৰিবলৈ ৰে’লৱে প্ৰশাসন প্ৰতিশ্ৰুতিবদ্ধ।
