কাৰ্বি আংলং আৰু হোজাই সীমান্তৰ লংকাইজানত শুকুৰবাৰে বেদখলকাৰীৰ বিৰুদ্ধে উচ্ছেদ অভিযানৰ সময়ত তীব্ৰ উত্তেজনাৰ সৃষ্টি হয়। কাৰ্বি আংলং জিলা প্ৰশাসনে অবৈধভাৱে আশ্ৰয় লৈ থকা বেদখলকাৰীসকলক উচ্ছেদ কৰি অঞ্চলটো বেদখল মুক্ত কৰাৰ চেষ্টা চলোৱাৰ সময়তে এই উত্তেজনাময় পৰিস্থিতিৰ সৃষ্টি হয়।
উচ্ছেদ অভিযান আৰম্ভ কৰাৰ পাছতে কৃষক মুক্তি সংগ্ৰাম সমিতিৰ সদস্যই স্থানীয় লোকৰ সহযোগত ঘটনাস্থলীত উপস্থিত হয় আৰু উচ্ছেদৰ বিৰুদ্ধে তীব্ৰ প্ৰতিবাদ সাৱ্যস্ত কৰে।
প্ৰতিবাদকাৰীসকলে উচ্ছেদ অভিযান চলোৱা ১নং চৰকেবস্তি অঞ্চলটো হোজাই জিলাৰ অধীনত পৰা বুলি দাবী কৰি কাৰ্বি আংলং জিলা প্ৰশাসন কৰ্তৃপক্ষৰ অঞ্চলটোৰ লোকসকলক উচ্ছেদ কৰা কোনো অধিকাৰ নাই বুলি প্ৰতিবাদত মুখৰ হৈ পৰে।
আনহাতে, উত্তেজিত প্ৰতিবাদকাৰীসকলক ছত্ৰভংগ দিয়াবলৈ আৰক্ষীয়ে লাঠী চালনা কৰে। আৰক্ষীৰ লাঠী চালনাৰ ফলত এজন প্ৰতিবাদকাৰী আহত হোৱা বুলি জানিব পৰা গৈছে।
উল্লেখযোগ্য যে কাৰ্বি আংলং জিলা প্ৰশাসনে যোৱা শনিবাৰৰ পৰাই লংকাইজান অঞ্চলৰ ১৫,০০০ বিঘা ভূমিত এক উচ্ছেদ অভিযান আৰম্ভ কৰিছিল।
জানিব পৰা মতে, বেদখলকাৰীসকলৰ মুঠ ১০১৬টা পৰিয়ালে প্রত্যেকে দহ বিঘাৰ পৰা পঞ্চাশ বিঘালৈকে মাটি দখল কৰি তাত খেতি কৰি আহিছিল। কিন্তু কাৰো হাততেই কোনো কাগজ-পত্র নথকাত সেয়া অবৈধভাৱে দখল কৰা বুলি নিশ্চিত হৈ পৰিছিল। ধুবুৰী, ছয়গাঁও, মৈৰাবাৰী আদি ঠাইৰ পৰা অহা এই লোকসকলে দীৰ্ঘদিনৰ পৰা ইয়াত কৃষি কৰ্ম কৰি বসবাস কৰি আহিছিল।